ਬੰਗਾ, 16 ਜੂਨ (ਕੁਲਦੀਪ ਸਿੰਘ ਪਾਬਲਾ)-ਹਾਈਵੇ ਰੋਡ 'ਤੇ ਐਕਸਿਸ ਬੈਂਕ ਬੰਗਾ ਦੇ ਸਾਹਮਣੇ ਪਿਆ ਇੱਕ ਡੂੰਘਾ ਟੋਇਆ ਕਿਸੇ ਸਮੇਂ ਵੀ ਵੱਡੇ ਹਾਦਸੇ ਨੂੰ ਅੰਜਾਮ ਦੇ ਸਕਦਾ ਹੈ | ਇਸ ਸਬੰਧੀ ਜਾਣਕਾਰੀ ਦਿੰਦੇ ਹੋਏ ਲੋਕਾਂ ਨੇ ਦੱਸਿਆ ਕਿ ਕਈ ਵਾਰ ਅਸੀਂ ਇਸ ਖੱਡੇ ਨੂੰ ਇੱਟਾਂ ਰੋੜਿਆਂ ਨਾਲ ਭਰ ਚੁੱਕੇ ਹਾਂ ਪਰ ਇਸ ਦਾ ਪਾਣੀ ਬੰਦ ਨਹੀਂ ਹੋ ਰਿਹਾ | ਉਹਨਾਂ ਕਿਹਾ ਅਸੀਂ ਮਹਿਕਮੇ ਦੇ ਕਰਮਚਾਰੀਆਂ ਨੂੰ ਵੀ ਕਹਿ ਚੁੱਕੇ ਹਾਂ ਪਰ ਇਸ ਵੱਲ ਕੋਈ ਵੀ ਧਿਆਨ ਨਹੀਂ ਦੇ ਰਿਹਾ | ਲੋਕਾਂ ਨੇ ਕਿਹਾ ਕਿ ਇਹ ਸੀਵਰੇਜ ਦਾ ਢੱਕਣ ਟੁੱਟਣ ਕਾਰਨ ਖੱਡਾ ਹੋਰ ਡੂੰਘਾ ਹੋ ਰਿਹਾ ਹੈ | ਉਹਨਾਂ ਕਿਹਾ ਕਿ ਜਦੋਂ ਵੀ ਕੋਈ ਤੇਜ਼ ਰਫਤਾਰ ਵਿੱਚ ਬੱਸ ਜਾਂ ਹੋਰ ਭਾਰੀ ਗੱਡੀ ਲੰਘਦੀ ਹੈ ਤਾਂ ਇਸ ਵਿੱਚ ਖੜ੍ਹੇ ਪਾਣੀ ਨਾਲ ਆਸ-ਪਾਸ ਖੜੀਆਂ ਗੱਡੀਆਂ ਉੱਤੇ ਗੰਦੇ ਪਾਣੀ ਦੇ ਛਿੱਟੇ ਪੈ ਜਾਂਦੇ ਹਨ | ਲੋਕਾਂ ਨੇ ਹਾਈਵੇ ਅਤੇ ਪ੍ਰਸ਼ਾਸਨ ਕੋਲੋਂ ਮੰਗ ਕੀਤੀ ਹੈ ਕਿ ਇਸ ਖੱਡੇ ਨੂੰ ਜਲਦੀ ਬੰਦ ਕਰਵਾਇਆ ਜਾਵੇ ਤਾਂ ਕਿ ਕੋਈ ਦੁਖਦਾਈ ਘਟਨਾ ਨਾ ਵਾਪਰ ਜਾਵੇ |
