ਨਵਾਂਸ਼ਹਿਰ, 18 ਜੂਨ (ਹਰਮਿੰਦਰ ਸਿੰਘ ਪਿੰਟੂ)-ਪਿੰਡ ਡੇਰੋਂ ਤਹਿਸੀਲ ਗੜ੍ਹਸ਼ੰਕਰ ਦੀ ਪੰਜਾਬਣ ਧੀ ਨਰੇਸ਼ ਰਾਣੀ ਪੁੱਤਰੀ ਜਸਪਾਲ ਸਿੰਘ ਅਤੇ ਮਾਤਾ ਕੁਲਵਿੰਦਰ ਕੌਰ ਨੇ ਸਖ਼ਤ ਮਿਹਨਤ ਕਰਕੇ ਕੈਨੇਡਾ ਦੀ ਧਰਤੀ 'ਤੇ ਆਪਣਾ, ਆਪਣੇ ਮਾਤਾ- ਪਿਤਾ ਅਤੇ ਪਿੰਡ ਦਾ ਨਾਂਅ ਰੌਸ਼ਨ ਕੀਤਾ | ਜਾਣਕਾਰੀ ਦਿੰਦਿਆਂ ਲੜਕੀ ਦੇ ਚਾਚਾ ਕੁਲਬੀਰ ਬਾਬਾ ਨੇ ਦੱਸਿਆ ਕਿ ਨਰੇਸ਼ ਰਾਣੀ 2018 'ਚ ਕੈਨੇਡਾ ਚਲੀ ਗਈ | ਜਿੱਥੇ ਉਸ ਨੇ ਸਖ਼ਤ ਮਿਹਨਤ ਕਰਕੇ ਪੀ. ਆਰ ਪ੍ਰਾਪਤ ਕੀਤੀ ਉਸ ਤੋਂ ਬਾਅਦ ਉਸ ਨੇ ਕੈਨੇਡਾ ਨੇਵੀ 'ਚ ਅਪਲਾਈ ਕੀਤਾ | ਉਸ ਦੀ ਮਿਹਨਤ ਨੂੰ ਭਾਗ ਲੱਗਾ ਅਤੇ ਉਹ ਕੈਨੇਡਾ ਨੇਵੀ 'ਚ ਭਰਤੀ ਹੋ ਗਈ | ਇਸ ਸਮੇਂ ਉਹ ਮਿਸੀਸਾਗਾ 'ਚ 6 ਮਹੀਨੇ ਦੀ ਟ੍ਰੇਨਿੰਗ ਕਰ ਰਹੀ ਹੈ | ਇਸ ਤੋਂ ਬਾਅਦ ਉਹ ਕਲੈਰੀਕਲ ਜੌਬ 'ਚ ਸੇਵਾਵਾਂ ਦੇਵੇਗੀ | ਨਰੇਸ਼ ਰਾਣੀ ਦੀਆਂ ਦੋ ਭੈਣਾਂ ਜੋ ਕਿ ਕੈਨੇਡਾ 'ਚ ਸੈਟਲ ਹਨ ਅਤੇ ਇੱਕ ਭਰਾ ਜੋ ਕਿ ਇਟਲੀ ਵਿੱਚ ਹੈ | ਬਾਬਾ ਕੁਲਬੀਰ ਸਿੰਘ ਨੇ ਕਿਹਾ ਕਿ ਲੜਕੀਆਂ ਕਿਸੇ ਵੀ ਖੇਤਰ 'ਚ ਪਿੱਛੇ ਨਹੀਂ ਹਨ | ਨਰੇਸ਼ ਰਾਣੀ ਨੇ ਆਪਣੀ ਮਿਹਨਤ ਸਦਕਾ ਇਹ ਮੁਕਾਮ ਹਾਸਲ ਕੀਤਾ ਹੈ | ਉਨ੍ਹਾਂ ਕਿਹਾ ਕਿ ਸਾਨੂੰ ਕੁੜੀਆਂ ਅਤੇ ਮੁੰਡਿਆਂ 'ਚ ਭੇਦ ਭਾਵ ਨਹੀਂ ਕਰਨਾ ਚਾਹੀਦਾ | ਇਸ ਦੌਰਾਨ ਉਨ੍ਹਾਂ ਸਮੂਹ ਪਰਿਵਾਰ ਨੂੰ ਵਧਾਈ ਦਿੱਤੀ |
