ਬਟਾਲਾ, 19 ਜੂਨ (ਰਾਕੇਸ਼ ਰੇਖੀ)-ਨਾਬਾਲਗ ਲੜਕੀ ਨੂੰ ਵਰਗਲਾ ਕੇ ਆਪਣੇ ਨਾਲ ਲੈ ਜਾਣ ਅਤੇ ਵਿਆਹ ਕਰਵਾ ਲੈਣ ਦੇ ਦੇਸ਼ ਤਹਿਤ ਪੁਲਿਸ ਨੇ ਇਕ ਨੌਜਵਾਨ ਨੂੰ ਗਿ੍ਫ਼ਤਾਰ ਕਰ ਲਿਆ ਹੈ | ਥਾਣਾ ਸਦਰ ਵਿਚ ਦਰਜ ਮਾਮਲੇ ਦੀ ਜਾਂਚ ਅਧਿਕਾਰੀ ਸਬ-ਇੰਸਪੈਕਟਰ ਨਵਨੀਤ ਕੌਰ ਨੇ ਦੱਸਿਆ ਕਿ ਥਾਣੇ ਹੇਠ ਆਉਂਦੇ ਇਕ ਇਲਾਕੇ ਦੀ ਰਹਿਣ ਵਾਲੀ 15 ਸਾਲ ਦੀ ਨਾਬਾਲਗ ਲੜਕੀ ਨੇ ਸ਼ਿਕਾਇਤ ਦਰਜ ਕਰਵਾਈ ਕਿ ਇਕ ਪਿੰਡ ਦਾ ਰਹਿਣ ਵਾਲਾ ਉਨ੍ਹਾਂ ਦੀ ਪਹਿਚਾਣ ਵਾਲਾ ਨੌਜਵਾਨ ਪੀਟਰ ਮਸੀਹ ਦਾ ਉਨ੍ਹਾਂ ਦੇ ਘਰ ਆਉਣਾ-ਜਾਣਾ ਸੀ, ਜਿਸ ਕਰ ਕੇ ਉਸ ਦੀ ਉਸ ਨਾਲ ਪਹਿਚਾਣ ਹੋ ਗਈ ਤੇ ਫ਼ੋਨ 'ਤੇ ਗੱਲਬਾਤ ਕਰਨੀ ਸ਼ੁਰੂ ਹੋ ਗਈ | ਪੀਟਰ ਨੇ ਉਸ ਨੂੰ ਕਿਹਾ ਕਿ ਉਹ ਉਸ ਨਾਲ ਵਿਆਹ ਕਰਵਾ ਲਵੇਗਾ | ਬੀਤੇ ਦਿਨੀਂ ਉਹ ਆਪਣੀ ਦਾਦੀ ਨਾਲ ਕਿਸੇ ਕੰਮ ਲਈ ਬਾਜ਼ਾਰ ਗਈ ਸੀ, ਰਸਤੇ ਵਿਚ ਉਸ ਨੂੰ ਪੀਟਰ ਮਸੀਹ ਮੋਟਰਸਾਈਕਲ 'ਤੇ ਮਿਲ ਗਿਆ | ਉਸ ਨੇ ਕਿਹਾ ਕਿ ਉਹ ਉਸ ਨਾਲ ਵਿਆਹ ਕਰਵਾ ਲਵੇਗਾ, ਜਿਸ ਕਰ ਕੇ ਉਹ ਉਸ ਦੇ ਨਾਲ ਮੋਟਰਸਾਈਕਲ 'ਤੇ ਬੈਠ ਕੇ ਚਲੀ ਗਈ | ਪੀਟਰ ਉਸ ਨੂੰ ਆਪਣੇ ਘਰ ਲੈ ਗਿਆ, ਜਿਥੇ ਵਿਆਹ ਦੀ ਰਸਮ ਤਹਿਤ ਉਸ ਨੂੰ ਚੂੜਾ ਪਹਿਨਾ ਦਿੱਤਾ ਗਿਆ ਅਤੇ ਉਸ ਨਾਲ ਸਰੀਰਕ ਸਬੰਧ ਬਣਾ ਲਏ | ਪਤਾ ਚੱਲਣ 'ਤੇ ਉਸ ਦੇ ਘਰ ਵਾਲੇ ਪੀਟਰ ਦੇ ਘਰ ਆਏ ਅਤੇ ਸਮਝਾ ਕੇ ਉਸ ਨੂੰ ਆਪਣੇ ਨਾਲ ਵਾਪਸ ਲੈ ਗਏ | ਪਹਿਲਾਂ ਤਾਂ ਉਨ੍ਹਾਂ ਨੇ ਸਾਮਾਜਿਕ ਬਦਨਾਮੀ ਕਰ ਕੇ ਕੋਈ ਕਾਨੂੰਨੀ ਕਾਰਵਾਈ ਨਹੀਂ ਕਰਵਾਈ, ਪਰ ਪੀਟਰ ਦੇ ਬਾਰ-ਬਾਰ ਤੰਗ ਪ੍ਰੇਸ਼ਾਨ ਕਰਨ 'ਤੇ ਪੁਲਿਸ ਨੂੰ ਸ਼ਿਕਾਇਤ ਦਿੱਤੀ ਗਈ, ਜਿਸ 'ਤੇ ਪੁਲਿਸ ਨੇ ਪੀਟਰ ਦੇ ਖ਼ਿਲਾਫ਼ ਧਾਰਾ-137 (2), 96, 64ਬੀ. ਐੱਨ. ਐੱਸ. 04/06ਪੋਕਸੋ ਐਕਟ ਤਹਿਤ ਮਾਮਲਾ ਦਰਜ ਕਰ ਕੇ ਉਸ ਨੂੰ ਗਿ੍ਫ਼ਤਾਰ ਕਰ ਲਿਆ |
