ਫ਼ਾਜ਼ਿਲਕਾ, 22 ਅਕਤੂਬਰ (ਦਵਿੰਦਰ ਪਾਲ ਸਿੰਘ)- ਸ਼ਹਿਰ ਵਿਚ ਡੇਂਗੂ ਦੇ ਵਧਦੇ ਕੇਸਾਂ ਨੂੰ ਧਿਆਨ ਵਿਚ ਰੱਖਦੇ ਹੋਏ ਡਾ.ਰੋਹਿਤ ਗੋਇਲ ਸਿਵਲ ਸਰਜਨ ਫ਼ਾਜ਼ਿਲਕਾ ਦੇ ਹੁਕਮਾਂ ਅਨੁਸਾਰ ਡਾ.ਅਰਪਿਤ ਗੁਪਤਾ ਸਹਾਇਕ ਸਿਵਲ ਸਰਜਨ ਤੇ ਡਾ. ਸੁਨੀਤਾ ਕੰਬੋਜ ਜ਼ਿਲ੍ਹਾ ਐਪੀਡੀਮੋਲੋਜਿਸਟ ਦੀ ਦੇਖ-ਰੇਖ 'ਚ ਅਰਬਨ ਫ਼ਾਜ਼ਿਲਕਾ ਅਤੇ ਰੂਰਲ ਇਲਾਕਿਆਂ ਵਿਚ ਡੇਂਗੂ ਦੀ ਰੋਕਥਾਮ ਲਈ ਚੱਲ ਰਹੀਆਂ ਗਤੀਵਿਧੀਆਂ 'ਚ ਹੋਰ ਤੇਜ਼ੀ ਲਿਆਂਦੀ ਗਈ ਹੈ | ਡਾ. ਅਰਪਿਤ ਗੁਪਤਾ ਨੇ ਦੱਸਿਆ ਕਿ ਸਿਹਤ ਵਿਭਾਗ ਫ਼ਾਜ਼ਿਲਕਾ ਵਲੋਂ ਅਰਬਨ ਫ਼ਾਜ਼ਿਲਕਾ ਲਈ 14 ਟੀਮਾਂ ਦਾ ਗਠਨ ਕੀਤਾ ਗਿਆ ਹੈ | ਹਰੇਕ ਟੀਮ ਵਿਚ ਮਲਟੀਪਰਪਜ਼ ਹੈਲਥ ਵਰਕਰ, ਆਸ਼ਾ ਤੇ ਬਰੀਡ ਚੈੱਕਰ ਹਨ | ਇਹ ਟੀਮਾਂ ਹਰ ਰੋਜ਼ 14 ਵਾਰਡਾਂ ਦੇ ਘਰ-ਘਰ ਜਾ ਕੇ ਡੇਂਗੂ ਸਰਵੇ ਕਰਕੇ ਲਾਰਵਾ ਲੱਭ ਰਹੀਆਂ ਹਨ ਅਤੇ ਨਸ਼ਟ ਕਰਵਾ ਰਹੀਆਂ ਹਨ | ਜਾਗਰੂਕਤਾ ਗਤੀਵਿਧੀਆਂ ਕਰ ਰਹੀਆਂ ਹਨ | ਇਨ੍ਹਾਂ 14 ਟੀਮਾਂ ਤੋਂ ਇਲਾਵਾ 2 ਹੋਰ ਟੀਮਾਂ ਦਾ ਗਠਨ ਕੀਤਾ ਗਿਆ ਗਿਆ ਹੈ, ਜੋ ਪਾਜ਼ੇਟਿਵ ਡੇਂਗੂ ਕੇਸਾਂ ਦੇ ਘਰਾਂ ਤੇ ਆਲ਼ੇ ਦੁਆਲੇ ਡੇਂਗੂ ਵਿਰੋਧੀ ਗਤੀਵਿਧੀਆਂ ਕਰ ਰਹੀਆਂ ਹਨ | ਮਿਊਾਸੀਪਲ ਕੌਂਸਲ ਦੇ ਸਹਿਯੋਗ ਨਾਲ ਡੇਂਗੂ ਪਾਜ਼ੇਟਿਵ ਘਰਾਂ ਵਿਚ ਅਤੇ ਹੋਰ ਮੁਹੱਲਿਆਂ 'ਚ ਫੌਗਿੰਗ ਕਰਵਾਈ ਗਈ |
