ਬਾਬਾ ਬਕਾਲਾ ਸਾਹਿਬ, 16 ਜੂਨ (ਸ਼ੇਲਿੰਦਰਜੀਤ ਸਿੰਘ ਰਾਜਨ)-ਦਲਿਤਾਂ ਦੇ ਸਮਾਜਿਕ ਮੁੱਦਿਆਂ ਦੀ ਠੋਸ ਢੰਗ ਨਾਲ ਸੰਸਦ 'ਚ ਪੈਰਵਾਈ ਕਰਨ ਦੀ ਮੰਗ ਨੂੰ ਲੈ ਕੇ ਘੱਟ ਗਿਣਤੀ ਲੋਕ ਭਲਾਈ ਸੰਸਥਾ (ਰਜਿ:) ਦੇ ਪ੍ਰਧਾਨ ਸਤਨਾਮ ਸਿੰਘ ਗਿੱਲ ਤੇ ਚੇਅਰਮੈਨ ਪੰਜਾਬ ਸੰਦੀਪ ਸਿੰਘ ਰਾਜੂ ਨੇ ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਪੰਜਾਬ ਚਰਨਜੀਤ ਸਿੰਘ ਚੰਨੀ ਅਤੇ ਮੈਂਬਰ ਪਾਰਲੀਮੈਂਟ ਨਾਲ ਮੁਲਾਕਾਤ ਕੀਤੀ | ਇਸ ਮੁਲਾਕਾਤ ਦੌਰਾਨ ਸ: ਗਿੱਲ ਨੇ ਦਲਿਤ ਹਲਕਿਆਂ 'ਚ ਭੇਦ-ਭਾਵ ਅਤੇ ਵਿਤਕਰੇ ਨੂੰ ਲੈ ਕੇ ਪ੍ਰਸ਼ਾਸਨਿਕ ਪੱਧਰ 'ਤੇ ਅਣ-ਸੁਣਿਆ ਕਰਨ ਅਤੇ ਨਜ਼ਰ ਅੰਦਾਜ਼ ਕੀਤੇ ਜਾ ਰਹੇ ਭਾਈਚਾਰੇ ਪ੍ਰਤੀ ਸਕਰਾਤਮਕ ਪਹੁੁੰਚ ਅਪਨਾਉਣ ਲਈ ਅਪੀਲ ਕੀਤੀ | ਉਨ੍ਹਾਂ ਸੂਬੇ 'ਚ ਵੱਖ-ਵੱਖ ਵਿਭਾਗਾਂ 'ਚ ਨੌਕਰੀ ਕਰ ਰਹੇ ਵਿਭਾਗੀ ਮਾਮਲਿਆਂ 'ਚ ਕਰਮਚਾਰੀਆਂ ਨੂੰ ਰਾਹਤ ਦਵਾਉਣ ਅਤੇ ਵਿਭਾਗੀ ਤਰੱਕੀ 'ਚ ਆ ਰਹੀਆਂ ਅੜਚਨਾ ਦੂਰ ਕਰਨ ਦੇ ਮਾਮਲੇ 'ਚ ਠੋਕਵੀਂ ਵਕਾਲਤ ਕਰਨ ਦੀ ਤਾਕੀਦ ਕੀਤੀ | ਘੱਟ ਗਿਣਤੀ ਲੋਕ ਭਲਾਈ ਸੰਸਥਾ ਰਜਿ: ਦੇ ਵਫ਼ਦ 'ਚ ਸ਼ਾਮਿਲ ਚੇਅਰਮੈਨ ਸੰਦੀਪ ਸਿੰਘ, ਹਰਪਾਲ, ਸਿੰਘ, ਮਿਲਨ ਸਿੰਘ ਗਿੱਲ, ਪੀ. ਏ. ਗੁਰਪ੍ਰੀਤ ਸਿੰਘ ਖਾਲਸਾ, ਅੰਮਿ੍ਤਪਾਲ ਸਿੰਘ ਕਲਿਆਣ, ਅੰਮਿ੍ਤਪਾਲ ਸਿੰਘ ਸ਼ਾਹਪੁਰ, ਡਾ: ਸੁਖਚੈਨ ਸਿੰਘ ਘੁੰਮਣ ਆਦਿ ਨੇ ਚਰਨਜੀਤ ਸਿੰਘ ਚੰਨੀ ਨੂੰ ਅਪੀਲ ਕਰਦਿਆਂ ਸੱਦਾ ਦਿੱਤਾ ਕਿ ਸਰਹੱਦੀ ਇਲਾਕੇ ਦਿਆਂ ਪਿੰਡਾਂ 'ਚ ਗ਼ਰੀਬ ਪਰਿਵਾਰਾਂ ਨੂੰ ਮਿਲਣ ਦਾ ਪ੍ਰੋਗਰਾਮ ਰੱਖੋ | ਸ. ਚੰਨੀ ਨੇ ਇਸ ਸਹਿਚਾਰਕ ਮੁਲਾਕਾਤ ਕਰਨ ਤੋਂ ਬਾਅਦ ਮੀਡੀਆ ਨੂੰ ਦੱਸਿਆ ਕਿ ਬਾਬਾ ਬਕਾਲਾ ਸਾਹਿਬ ਤਹਿਸੀਲ ਦੇ ਪਿੰਡ ਜੋਧੇ ਤੋਂ ਇਕ ਪੰਜਾਬ ਹਿਤੈਸ਼ੀਆਂ ਦਾ ਡੈਪੂਟੇਸ਼ਨ ਉਨ੍ਹਾਂ ਨੂੰ ਮਿਲਿਆ ਹੈ | ਉਨ੍ਹਾਂ ਵਿਸ਼ਵਾਸ ਦਿਵਾਇਆ ਕਿ ਉਹ ਦੱਬੇ-ਕੁਚਲੇ ਸਮਾਜ ਨਾਲ ਹਰ ਪੱਧਰ 'ਤੇ ਹੋ ਰਹੀ ਜ਼ਿਆਦਤੀ ਨੂੰ ਠੱਲ੍ਹਣ ਲਈ ਠੋਸ ਨੀਤੀ ਹੋਂਦ 'ਚ ਲੈ ਕੇ ਆਉਣਗੇ | ਇਸ ਮੌਕੇ ਖੁਸ਼ਵੰਤ ਸਿੰਘ ਨਿੱਜੀ ਸਹਾਇਕ ਚਰਨਜੀਤ ਸਿੰਘ ਚੰਨੀ ਵੀ ਹਾਜ਼ਰ ਸਨ |
