ਪਟਿਆਲਾ, 16 ਅਕਤੂਬਰ (ਧਰਮਿੰਦਰ ਸਿੰਘ ਸਿੱਧੂ)-ਪਟਿਆਲਾ ਦੇ ਨਿੱਜੀ ਸਕੂਲ ਵਿਖੇ ਸਕੂਲ ਦੀ ਪਿ੍ੰਸੀਪਲ ਸ੍ਰੀਮਤੀ ਜਸਜੀਤ ਸੋਹੀ ਦੁਆਰਾ 50 ਕਿੱਲੋਵਾਟ ਸਮਰੱਥਾ ਦੇ ਸੋਲਰ ਪਲਾਂਟ ਦਾ ਸਫਲਤਾਪੂਰਵਕ ਉਦਘਾਟਨ ਕੀਤਾ ਗਿਆ | ਇਸ ਮੌਕੇ ਜੇਈਸੀ ਕੰਪਨੀ ਦੀ ਇੰਜੀਨੀਅਰ ਪ੍ਰਭਜੋਤ ਕੌਰ ਨੇ ਦੱਸਿਆ ਕਿ ਇਹ ਪਲਾਂਟ 75000 ਯੂਨਿਟ ਪ੍ਰਤੀ ਸਾਲ ਪੈਦਾ ਕਰੇਗਾ ਅਤੇ ਸਕੂਲ ਲਈ 6 ਲੱਖ ਰੁਪਏ ਪ੍ਰਤੀ ਸਾਲ ਬਚਾਏਗਾ | ਜਿਸ ਨਾਲ ਪਲਾਂਟ ਦੀ ਪੂਰੀ ਲਾਗਤ 3 ਸਾਲਾਂ ਦੇ ਅੰਦਰ ਵਸੂਲ ਕੀਤੀ ਜਾਵੇਗੀ ਅਤੇ ਉਸ ਤੋਂ ਬਾਅਦ ਪਲਾਂਟ ਘੱਟੋ-ਘੱਟ ਐਫ.ਆਈ.ਆਰ. ਚੱਲੇਗਾ | ਬਿਜਲੀ ਦੇ ਖ਼ਰਚਿਆਂ ਵਿਚ ਕਮੀ ਆਉਣ 'ਤੇ ਸਾਲਾਨਾ ਲੱਖਾਂ ਰੁਪਏ ਦੀ ਬੱਚਤ ਹੋਵੇਗੀ | ਉਨ੍ਹਾਂ ਦੱਸਿਆ ਕਿ ਪਲਾਂਟ ਦੀ ਕੁੱਲ ਲਾਗਤ 16 ਲੱਖ ਰੁਪਏ ਹੈ | ਸੋਲਰ ਪਲਾਂਟ ਦੀ ਆਦਰਸ਼ ਸਮਰੱਥਾ ਲਗਭਗ 125 ਕਿੱਲੋਵਾਟ ਹੈ, ਪਰ ਇਸ ਵੇਲੇ 50 ਕਿੱਲੋਵਾਟ ਸਥਾਪਤ ਕੀਤਾ ਗਿਆ ਹੈ ਅਤੇ ਲੋਡ ਪ੍ਰਵਾਨਗੀ ਤੋਂ ਬਾਅਦ ਹੋਰ ਲੋਡ ਵਧਾ ਦਿੱਤਾ ਜਾਵੇਗਾ | ਪ੍ਰਬੰਧਕਾਂ ਨੇ ਦਸਿਆ ਕਿ ਕੰਪਨੀ ਨੇ ਹੁਣ ਤੱਕ ਰਾਜ ਭਰ ਵਿੱਚ 4 ਮੈਗਾਵਾਟ ਤੋਂ ਵੱਧ ਦੀ ਕੁੱਲ ਸਮਰੱਥਾ ਵਾਲੇ 500 ਤੋਂ ਵੱਧ ਪਲਾਂਟ ਲਗਾਏ ਹਨ |
