ਬਨੂੜ, 22 ਦਸੰਬਰ (ਭੁਪਿੰਦਰ ਸਿੰਘ)-ਬਨੂੜ ਵਿਖੇ ਸਥਿਤ ਚੰਡੀਗੜ੍ਹ ਡਿਸਟਿਲਰੀ ਐਂਡ ਬੌਟਲਰਜ਼ ਨਾਮੀ ਸ਼ਰਾਬ ਫ਼ੈਕਟਰੀ ਦੀਆਂ ਪਰਾਲੀ ਦੀਆਂ ਗੱਠਾਂ ਨੂੰ ਭਿਆਨਕ ਅੱਗ ਲੱਗ ਗਈ | ਫ਼ੈਕਟਰੀ ਦੇ ਨੇੜਲੇ ਪਲਾਂਟ ਵਿਚ ਰੱਖੀਆਂ ਹੋਈਆਂ ਵੱਡੀ ਮਾਤਰਾ ਵਿਚ ਪਰਾਲੀ ਦੀਆਂ ਗੱਠਾਂ ਨੂੰ ਅੱਗ ਲੱਗਦਿਆਂ ਸਾਰ ਹੀ ਉੱਚੀਆਂ ਲਾਟਾਂ ਉੱਠ ਗਈਆਂ ਅਤੇ ਲੋਕੀਂ ਇਕੱਠੇ ਹੋ ਗਏ | ਰਾਜਪੁਰਾ, ਮੁਹਾਲੀ, ਡੇਰਾਬਸੀ, ਸਰਹਿੰਦ ਅਤੇ ਹੋਰਨਾਂ ਥਾਵਾਂ ਤੋਂ ਦਰਜਨ ਦੇ ਕਰੀਬ ਫਾਇਰ ਬਿ੍ਗੇਡ ਦੀਆਂ ਗੱਡੀਆਂ ਵੀ ਮੌਕੇ 'ਤੇ ਪਹੁੰਚੀਆਂ ਤੇ ਉਨ੍ਹਾਂ ਨੂੰ ਅੱਗ 'ਤੇ ਕਾਬੂ ਪਾਉਣ ਲਈ ਭਾਰੀ ਸੰਘਰਸ਼ ਕਰਨਾ ਪੈ ਰਿਹਾ ਹੈ | ਖ਼ਬਰ ਲਿਖੇ ਜਾਣ ਤੱਕ ਫਾਇਰ ਬਿ੍ਗੇਡ ਦੀਆਂ ਸਾਰੀਆਂ ਅੱਗ 'ਤੇ ਕਾਬੂ ਪਾਉਣ ਦੀ ਕੋਸ਼ਿਸ਼ ਕਰ ਰਹੀਆਂ ਸਨ | ਸ਼ਰਾਬ ਫ਼ੈਕਟਰੀ ਬਿਲਕੁਲ ਨੇੜੇ ਹੋਣ ਕਾਰਨ ਫਾਇਰ ਬਿ੍ਗੇਡ ਦੀਆਂ ਗੱਡੀਆਂ ਫ਼ੈਕਟਰੀ ਦੇ ਅਹਾਤੇ ਵੱਲ ਅੱਗ ਨੂੰ ਵਧਣ ਤੋਂ ਰੋਕਣ ਦੀ ਵੀ ਕੋਸ਼ਿਸ਼ ਕਰਦੀਆਂ ਰਹੀਆਂ | ਸਥਾਨਿਕ ਪੁਲਿਸ, ਪ੍ਰਸ਼ਾਸਨ ਤੇ ਸ਼ਰਾਬ ਫ਼ੈਕਟਰੀ ਦੇ ਅਧਿਕਾਰੀ ਵੀ ਮੌਕੇ 'ਤੇ ਪਹੁੰਚੇ ਹੋਏ ਸਨ | ਸ਼ਰਾਬ ਫ਼ੈਕਟਰੀ ਦੇ ਅਧਿਕਾਰੀ ਐੱਚ.ਐੱਸ. ਸੰਧੂ ਨੇ ਦੱਸਿਆ ਕਿ ਅੱਗ ਦੇ ਕਾਰਨਾਂ ਦਾ ਪਤਾ ਨਹੀਂ ਲੱਗ ਸਕਿਆ | ਪੁਲਿਸ ਅਧਿਕਾਰੀਆਂ ਨੇ ਕਿਹਾ ਕਿ ਅੱਗ 'ਤੇ ਕਾਬੂ ਪਾਇਆ ਜਾ ਰਿਹਾ ਹੈ ਅਤੇ ਅੱਗ ਨੂੰ ਅੱਗੇ ਵਧਣ ਤੋਂ ਰੋਕ ਦਿੱਤਾ ਜਾਵੇਗਾ | ਅੱਗ ਨਾਲ ਟਨਾਂ ਦੇ ਹਿਸਾਬ ਨਾਲ ਇੱਥੇ ਸਟੋਰ ਕੀਤੀਆਂ ਸਾਰੀਆਂ ਗੱਠਾਂ ਸੜ ਗਈਆਂ | ਪਰਾਲੀ ਦੀਆਂ ਇਹ ਗੱਠਾਂ ਸ਼ਰਾਬ ਬਣਾਉਣ ਲਈ ਬਾਇਲਰਾਂ ਵਿਚ ਅੱਗ ਬਾਲਣ ਲਈ ਵਰਤੀਆਂ ਜਾਂਦੀਆਂ ਹਨ |
