ਸ਼ੇਰਪੁਰ, 16 ਜੂਨ (ਮੇਘ ਰਾਜ ਜੋਸ਼ੀ)-ਪਿੰਡ ਫ਼ਤਿਹਗੜਪੰਜਗਰਾਈਆਂ ਵਿਖੇ 11 ਜੂਨ ਦੀ ਰਾਤ ਅਣਪਛਾਤੇ ਚੋਰਾਂ ਦੇ ਵਲੋਂ ਇੱਕ ਦੁਕਾਨ ਦੀ ਟਾਕੀ ਨੂੰ ਤੋੜ ਕੇ ਚੋਰੀ ਦੀ ਘਟਨਾ ਨੂੰ ਅੰਜਾਮ ਦਿੱਤਾ ਗਿਆ ਸੀ | ਚੋਰੀ ਦੀ ਘਟਨਾ ਦੀ ਸ਼ਿਕਾਰ ਹੋਈ ਦੁਕਾਨ ਬਬਲਾ ਟੈਲੀਲਾਮ ਦੇ ਮਾਲਕ ਸਾਬਕਾ ਫ਼ੌਜੀ ਸਾਧੂ ਖਾਂ ਨੇ ਦੱਸਿਆ ਕੇ ਦੁਕਾਨ ਵਿਚੋਂ ਕਰੀਬ ਅੱਠ ਹਜ਼ਾਰ ਨਕਦੀ ਚੋਰੀ ਹੋਈ ਸੀ ਤੇ ਉਨਾਂ ਨੇ 12 ਜੂਨ ਨੂੰ ਹੀ ਸਵੇਰੇ ਪੁਲਿਸ ਥਾਣਾ ਸ਼ੇਰਪੁਰ ਵਿਖੇ ਲਿਖਤੀ ਤੌਰ ਤੇ ਚੋਰੀ ਦੀ ਸੂਚਨਾ ਦੇ ਦਿੱਤੀ ਸੀ ਪਰ ਹੈਰਾਨੀ ਦੀ ਗੱਲ ਇਹ ਹੈ ਕਿ ਅੱਜ ਕਰੀਬ ਪੰਜਵੇਂ ਦੀ ਦੀ ਸ਼ਾਮ ਬੀਤਣ ਤੇ ਆ ਗਈ ਹੈ ਪਰ ਥਾਣਾ ਸ਼ੇਰਪੁਰ ਦੀ ਪੁਲਿਸ ਵਲੋਂ ਘਟਨਾ ਸਥਾਨ ਦਾ ਦੌਰਾ ਵੀ ਨਹੀਂ ਕੀਤਾ ਗਿਆ, ਉਨਾਂ ਦੁਖੀ ਮਨ ਨਾਲ ਦੱਸਿਆ ਕਿ ਚੋਰਾਂ ਨੂੰ ਫੜ ਕਿ ਉਨਾਂ ਦਾ ਨੁਕਸਾਨ ਪੂਰਾ ਕਰਾਉਣਾ ਤਾਂ ਦੂਰ ਦੀ ਗੱਲ ਹੈ, ਪਰ ਪੁਲਿਸ ਨੇ ਮੌਕਾ ਵੀ ਨੀ ਦੇਖਿਆ, ਅਜਿਹੇ ਵਿਚ ਪੀੜਤ ਆਿਖ਼ਰ ਕਿਸ ਕੋਲ ਜਾਵੇ ਅਤੇ ਕੀ ਕਰੇ, ਉਨਾਂ ਮੁੱਖ ਮੰਤਰੀ ਪੰਜਾਬ ਕੋਲ ਇਨਸਾਫ਼ ਦੀ ਗੁਹਾਰ ਲਾਉਂਦਿਆਂ ਕਿਹਾ ਕਿ ਪੁਲਿਸ ਵਲੋਂ ਦੁਕਾਨ ਤੇ ਹੋਈ ਚੋਰੀ ਨੂੰ ਕਿਉਂ ਗੰਭੀਰਤਾ ਨਾਲ ਨਹੀਂ ਲਿਆ ਗਿਆ? ਪੁਲਿਸ ਦੀ ਕੀ ਮਜਬੂਰੀ ਹੈ? ਇਸ ਮਾਮਲੇ ਦੀ ਜਾਂਚ ਹੋਣੀ ਚਾਹੀਦੀ ਹੈ, ਉਨਾਂ ਕਿਹਾ ਕਿ ਮੁੱਖ ਮੰਤਰੀ ਸਾਹਿਬ ਦੱਸ ਦਿਓ ਜੇ ਪੁਲਿਸ ਚੋਰੀ ਦੀ ਘਟਨਾ ਤੇ ਨਹੀਂ ਆਉਂਦੀ ਤਾਂ ਅਗਲੀ ਵਾਰ ਅਜਿਹੀ ਘਟਨਾ ਹੋਣ ਤੇ ਅਸੀਂ ਜਾਈਏ ਕਿੱਥੇ | ਇਸ ਬਾਰੇ ਉਨਾਂ ਅੱਗੇ ਕਿਹਾ ਕਿ ਉਹ ਇਸ ਮਾਮਲੇ ਵਿਚ ਜ਼ਿਲਾ ਪੁਲਿਸ ਮੁਖੀ ਸੰਗਰੂਰ ਅਤੇ ਡੀ. ਆਈ ਜੀ ਪਟਿਆਲਾ ਨੂੰ ਮਿਲ ਕਿ ਆਪਣੀ ਗੁਹਾਰ ਲਾਉਣਗੇ ਅਤੇ ਸਾਬਕਾ ਸੈਨਿਕ ਹੋਣ ਨਾਤੇ ਵੀ ਆਪਣੇ ਵਿਭਾਗ ਤੋਂ ਇਨਸਾਫ਼ ਦੀ ਮੰਗ ਕਰਨਗੇ, ਜ਼ਿਕਰਯੋਗ ਹੈ ਕੇ ਚੋਰੀ ਦਾ ਸ਼ਿਕਾਰ ਹੋਈ ਇਹ ਦੁਕਾਨ ਸਟੇਟ ਬੈਂਕ ਆਫ਼ ਇੰਡੀਆ ਦੇ ਨੇੜੇ ਹੈ ਅਤੇ ਬੱਸ ਸਟੈਂਡ ਦੇ ਬਿਲਕੁਲ ਸੈਂਟਰ ਵਿਚ ਹੈ ਅਜਿਹੇ ਵਿਚ ਚੋਰਾਂ ਵਲੋਂ ਬੇਡਰ ਚੋਰੀ ਕਰਨਾ ਜਿੱਥੇ ਵੱਡੇ ਸਵਾਲ ਖੜੇ ਕਰਦਾ ਹੈ ਉੱਥੇ ਹੀ ਬਾਕੀ ਦੁਕਾਨਦਾਰ ਆਪਣੀਆਂ ਦੁਕਾਨਾਂ ਨੂੰ ਲੈ ਕੇ ਚਿੰਤਾ ਦੇ ਵਿਚ ਹਨ | ਇਸ ਸੰਬੰਧੀ ਜਦੋਂ ਪੁਲਿਸ ਥਾਣਾ ਸ਼ੇਰਪੁਰ ਦੇ ਮੁਖੀ ਐਸ ਆਈ ਬਲੌਰ ਸਿੰਘ ਨਾਲ ਗੱਲ ਕੀਤੀ ਤਾਂ ਉਨਾਂ ਕਿਹਾ ਕਿ ਮੈ ਅਜੇ ਹੁਣੇ ਹੀ ਥਾਣਾ ਸ਼ੇਰਪੁਰ ਦਾ ਚਾਰਜ ਲਿਆ ਹੈ, ਤੁਸੀਂ ਮਾਮਲਾ ਮੇਰੇ ਧਿਆਨ ਵਿਚ ਲਿਆ ਦਿੱਤਾ ਹੈ ਤੇ ਤੁਰੰਤ ਹੀ ਪੁਲਿਸ ਕਾਰਵਾਈ ਕੀਤੀ ਜਾਵੇਗੀ |
