ਐਬਟਸਫੋਰਡ, 19 ਜੂਨ (ਗੁਰਦੀਪ ਸਿੰਘ ਗਰੇਵਾਲ)- ਕੈਨੇਡਾ ਦੇ ਬਿ੍ਟਿਸ਼ ਕੋਲੰਬੀਆ ਸੂਬੇ ਦੇ ਸ਼ਹਿਰ ਵਾਈਟ ਰੌਕ ਨਿਵਾਸੀ 47 ਸਾਲਾ ਪੰਜਾਬੀ ਸਚਿਨ ਲਾਟੀ 7500 ਕਿੱਲੋਮੀਟਰ ਦੀ ਦੌੜ ਲਾਏਗਾ | ਕੈਨੇਡਾ ਬਾਰਡਰ ਸਰਵਿਸਿਜ਼ ਏਜੰਸੀ ਦੇ ਸਾਬਕਾ ਅਧਿਕਾਰੀ ਸਚਿਨ ਲਾਟੀ ਨੇ ਬੀਤੇ ਕੱਲ੍ਹ ਬਿ੍ਟਿਸ਼ ਕੋਲੰਬੀਆ ਦੀ ਰਾਜਧਾਨੀ ਵਿਕਟੋਰੀਆ ਦੇ ਕਲੋਵਰ ਪੁਆਇੰਟ ਪਾਰਕ ਤੋਂ ਆਪਣੀ ਦੌੜ ਸ਼ੁਰੂ ਕੀਤੀ | ਸਚਿਨ ਲਾਟੀ ਨੇ ਦੱਸਿਆ ਕਿ 7500 ਕਿੱਲੋਮੀਟਰ ਦੌੜ 75 ਦਿਨਾਂ ਵਿਚ ਪੂਰੀ ਕਰਨ ਦਾ ਟੀਚਾ ਰੱਖਿਆ ਗਿਆ ਹੈ ਤੇ ਇਹ ਦੌੜ ਵੈਨਕੂਵਰ, ਐਬਟਸਫੋਰਡ, ਕੈਲਗਰੀ, ਵਿਨੀਪੈਗ, ਟੋਰਾਂਟੋ, ਓਟਾਵਾ, ਮਾਂਟਰੀਅਲ, ਕਿਊਬੈਕ ਤੇ ਹੈਲੀਫੈਕਸ ਹੁੰਦੀ ਹੋਈ ਨਿਊਫਾਊਾਡਲੈਂਡ ਦੀ ਰਾਜਧਾਨੀ ਸੇਂਟ ਜੌਹਨ ਵਿਖੇ ਸਮਾਪਤ ਹੋਵੇਗੀ | ਟੈਰੀ ਫੌਕਸ ਤੋਂ ਪ੍ਰਭਾਵਿਤ ਸਚਿਨ ਲਾਟੀ ਦਾ ਕਹਿਣਾ ਹੈ ਕਿ ਇਸ ਦੌੜ ਦਾ ਮੁੱਖ ਮਕਸਦ ਲੋਕਾਂ ਨੂੰ ਮਾਨਸਿਕ ਸਿਹਤ ਬਾਰੇ ਜਾਗਰੂਕ ਕਰਨਾ ਹੈ | 2023 'ਚ ਸਚਿਨ ਨੇ 22 ਦਿਨਾਂ 'ਚ 22 ਮੈਰਾਥਾਨ ਦੌੜਾਂ ਲਾਈਆਂ ਸਨ ਤੇ ਉਸ ਦਾ ਇਕ ਦਿਨ ਵਿਚ 103 ਕਿੱਲੋਮੀਟਰ ਦੌੜ ਲਾਉਣ ਦਾ ਰਿਕਾਰਡ ਹੈ |
