ਪਠਾਨਕੋਟ ਚੌਕ ਵਿੱਚ ਲੱਗਣ ਵਾਲਾ ਜਾਮ ਬਣ ਰਿਹਾ ਹਰ ਕਿਸੇ ਲਈ ਮੁਸੀਬਤ
ਸ਼ਾਮ 4:30 ਵਜੇ ਰੇਰੂ ਚੌਕ ਵਿੱਚ ਲੱਗੇ ਲੰਬੇ ਜਾਮ ਕਰਕੇ ਰਸਤੇ ਵਿੱਚ ਫਸੀ ਹੋਈ ਐਂਬੂਲੈਂਸ ਦੀ ਤਸਵੀਰ | (ਸੱਜੇ) ਸ਼ਾਮ 5 ਵਜੇ ਪਠਾਨਕੋਟ ਚੌਕ ਨੇੜੇ ਲੱਗੇ ਲੰਬੇ ਜਾਮ ਦੇ ਵਿਚ ਫਸੀ ਹੋਈ ਐਂਬੂਲੈਂਸ ਦੀ ਤਸਵੀਰ |
<br/>
19-10-2025
ਐਂਬੂਲੈਂਸਾਂ ਦਾ ਰਾਹ ਵੀ ਰੁਕਿਆ ਮਰੀਜ਼ਾਂ ਦੀ ਜ਼ਿੰਦਗੀ ਖਤਰੇ ਵਿੱਚ
ਇਸ ਜਾਮ ਦਾ ਸਭ ਤੋਂ ਦਰਦਨਾਕ ਪੱਖ ਇਹ ਹੈ ਕਿ ਸਿਰਫ ਆਮ ਵਾਹਨ ਹੀ ਨਹੀਂ, ਐਂਬੂਲੈਂਸਾਂ ਵੀ ਘੰਟਿਆਂ ਤੱਕ ਫਸੀਆਂ ਰਹਿੰਦੀਆਂ ਹਨ | ਕਈ ਵਾਰ ਹਸਪਤਾਲਾਂ ਤੱਕ ਸਮੇਂ ਸਿਰ ਨਾ ਪਹੁੰਚ ਸਕਣ ਕਾਰਨ ਮਰੀਜ਼ਾਂ ਦੀ ਜਾਨ ਨੂੰ ਖਤਰਾ ਪੈਦਾ ਹੋ ਜਾਂਦਾ ਹੈ | ਲੋਕਾਂ ਨੇ ਕਿਹਾ ਕਿ ਟਰੈਫਿਕ ਪੁਲਿਸ ਦੀ ਬੇਹਿਸੀ ਤੇ ਪ੍ਰਬੰਧਾਂ ਦੀ ਕਮੀ ਕਾਰਨ ਐਮਰਜੈਂਸੀ ਸੇਵਾਵਾਂ ਤੱਕ ਪ੍ਰਭਾਵਿਤ ਹੋ ਰਹੀਆਂ ਹਨ |
ਪ੍ਰਸ਼ਾਸਨ ਦਾ ਧਿਆਨ ਸਿਰਫ ਚਲਾਨ ਕੱਟਣ ਤੱਕ ਸੀਮਤ
ਲੋਕਾਂ ਨੇ ਰੋਸ ਜ਼ਾਹਰ ਕਰਦਿਆਂ ਕਿਹਾ ਕਿ ਟਰੈਫਿਕ ਨਿਯਮਾਂ ਦੀ ਉਲੰਘਣਾ 'ਤੇ ਚਲਾਨ ਕੱਟਣਾ ਹੀ ਪੁਲਿਸ ਦਾ ਏਕਮਾਤਰ ਕੰਮ ਬਣ ਗਿਆ ਹੈ, ਜਦਕਿ ਸ਼ਹਿਰ ਦੇ ਟਰੈਫਿਕ ਸੰਕਟ 'ਤੇ ਕੋਈ ਢੰਗ ਦਾ ਪ੍ਰਬੰਧ ਨਹੀਂ ਕੀਤਾ ਜਾ ਰਿਹਾ | ਜਾਮ ਦੇ ਸਮੇਂ ਪੁਲਿਸ ਮੁਲਾਜ਼ਮਾਂ ਦੀ ਘੱਟ ਮੌਜੂਦਗੀ ਨਾਲ ਹਾਲਾਤ ਹੋਰ ਬਿਗੜ ਜਾਂਦੇ ਹਨ | ਜਿੱਥੇ ਰਾਹ ਖੋਲ੍ਹਣ ਲਈ ਸੰਗਠਿਤ ਯੋਜਨਾ ਦੀ ਲੋੜ ਹੈ, ਉੱਥੇ ਕਾਰਵਾਈ ਸਿਰਫ ਕਾਗਜ਼ਾਂ ਤੱਕ ਸੀਮਤ ਦਿਖਾਈ ਦਿੰਦੀ ਹੈ | ਦਫ਼ਤਰ ਜਾਣ ਵਾਲੇ ਕਰਮਚਾਰੀ, ਸਕੂਲ ਦੇ ਵਿਦਿਆਰਥੀ, ਵਪਾਰੀ ਤੇ ਆਮ ਯਾਤਰੀ ਘੰਟਿਆਂ ਤੱਕ ਜਾਮ ਵਿੱਚ ਫਸੇ ਰਹਿੰਦੇ ਹਨ | ਛੋਟੇ ਫਾਸਲੇ ਲਈ ਵੀ ਅੱਧਾ ਘੰਟਾ ਲੱਗ ਜਾਣਾ ਆਮ ਗੱਲ ਬਣ ਗਈ ਹੈ | ਇਸ ਨਾਲ ਨਾ ਸਿਰਫ ਸਮਾਂ, ਸਗੋਂ ਇੰਧਨ ਦਾ ਵੀ ਵੱਡਾ ਨੁਕਸਾਨ ਹੋ ਰਿਹਾ ਹੈ | ਟਰੈਫਿਕ ਮਾਹਰਾਂ ਦੇ ਅਨੁਸਾਰ, ਪਠਾਨਕੋਟ ਚੌਂਕ ਤੇ ਭਾਰੀ ਵਾਹਨਾਂ ਦੀ ਆਵਾਜਾਈ ਨੂੰ ਸੁਚਾਰੂ ਬਣਾਉਣ ਲਈ ਸੜਕਾਂ ਦੇ ਵਿਸਥਾਰ, ਨਵੀਂ ਸਿਗਨਲ ਪ੍ਰਣਾਲੀ ਤੇ ਵੱਖਰਾ ਬਾਈਪਾਸ ਰੂਟ ਬਣਾਉਣ ਦੀ ਲੋੜ ਹੈ | ਇਸ ਤੋਂ ਇਲਾਵਾ, ਟਰੈਫਿਕ ਪੁਲਿਸ ਨੂੰ ਸਥਾਈ ਤੌਰ 'ਤੇ ਡਿਊਟੀ ਸਿਸਟਮ ਵਿੱਚ ਸੁਧਾਰ ਕਰਨਾ ਚਾਹੀਦਾ ਹੈ, ਤਾਂ ਜੋ ਜਾਮ ਦੀ ਦੁਹਰਾਈ ਨਾ ਹੋਵੇ | ਉੱਥੇ ਲੋਕਾਂ ਦਾ ਸਪੱਸ਼ਟ ਕਹਿਣਾ ਹੈ ਕਿ ਪ੍ਰਸ਼ਾਸਨ ਨੂੰ ਸਿਰਫ਼ ਚਲਾਨ ਕੱਟਣ ਦੀ ਬਜਾਏ ਅਸਲ ਹੱਲ ਕੱਢਣ 'ਤੇ ਧਿਆਨ ਦੇਣਾ ਚਾਹੀਦਾ ਹੈ | ਜਲੰਧਰ ਸ਼ਹਿਰ ਦੀ ਵਿਕਾਸਸ਼ੀਲ ਛਵੀ ਇਸ ਟਰੈਫਿਕ ਜਾਮ ਕਾਰਨ ਪ੍ਰਭਾਵਿਤ ਹੋ ਰਹੀ ਹੈ | ਜੇਕਰ ਜਲਦ ਹੀ ਕੋਈ ਠੋਸ ਕਦਮ ਨਾ ਚੁੱਕਿਆ ਗਿਆ, ਤਾਂ ਇਹ ਸਮੱਸਿਆ ਅਗਲੇ ਦਿਨਾਂ ਵਿੱਚ ਹੋਰ ਗੰਭੀਰ ਰੂਪ ਧਾਰ ਸਕਦੀ ਹੈ |
