ਮੁੰਬਈ, 14 ਜੂਨ (ਏਜੰਸੀ)-ਕੁਝ ਸ਼ਿਵ ਸੈਨਾ (ਯੂ.ਬੀ.ਟੀ.) ਸੰਸਦ ਮੈਂਬਰਾਂ ਦੇ ਰੁਖ ਬਦਲ ਸਕਣ ਦੀਆਂ ਚਰਚਾਵਾਂ ਵਿਚਾਲੇ ਪਾਰਟੀ ਮੁਖੀ ਉਧਵ ਠਾਕਰੇ ਨੇ ਆਪਣੇ ਗੁੱਟ ਦੇ ਸੰਸਦ ਮੈਂਬਰਾਂ ਨਾਲ ਮੀਟਿੰਗ ਕੀਤੀ | ਇਸ ਮੀਟਿੰਗ 'ਚ ਸਾਰੇ 9 ਸੰਸਦ ਮੈਂਬਰਾਂ ਨੇ ਜਾਂ ਤਾਂ ਵਰਚੁਅਲ ਜਾਂ ਨਿੱਜੀ ਰੂਪ ਨਾਲ ਹਿੱਸਾ ਲਿਆ | ਮੀਟਿੰਗ ਤੋਂ ਬਾਅਦ ਪਾਰਟੀ ਦੇ ਰਾਜ ਸਭਾ ਮੈਂਬਰ ਸੰਜੇ ਰਾਓਤ ਨੇ ਕਿਹਾ ਕਿ ਸਾਰੇ ਸੰਸਦ ਮੈਂਬਰ ਮਜ਼ਬੂਤੀ ਨਾਲ ਪਾਰਟੀ ਨਾਲ ਖੜੇ ਹਨ | ਉਨ੍ਹਾਂ ਦੱਸਿਆ ਕਿ ਚਾਰ ਸੰਸਦ ਮੈਂਬਰਾਂ ਨੇ ਨਿੱਜੀ ਤੌਰ 'ਤੇ ਮੀਟਿੰਗ 'ਚ ਹਿੱਸਾ ਲਿਆ, ਜਦੋਂਕਿ ਚਾਰ ਹੋਰਾਂ ਨੇ ਵਰਚੁਅਲ ਰਾਹੀਂ ਆਪਣੀ ਮੌਜੂਦਗੀ ਦਰਜ ਕਰਵਾਈ ਤੇ ਇਕ ਸੰਸਦ ਮੈਂਬਰਾਂ ਨੇ ਫ਼ੋਨ 'ਤੇ ਠਾਕਰੇ ਨਾਲ ਗੱਲਬਾਤ ਕੀਤੀ | ਇਹ ਮੀਟਿੰਗ ਦੁਪਹਿਰ ਸਮੇਂ ਬਾਂਦਰਾ ਈਸਟ ਇਲਾਕੇ 'ਚ ਠਾਕਰੇ ਦੇ 'ਮਾਤੋਸ਼੍ਰੀ' ਨਿਵਾਸ 'ਤੇ ਹੋਈ | ਮੀਟਿੰਗ ਇਸ ਲਈ ਵੀ ਅਹਿਮ ਸੀ ਕਿਉਂਕਿ ਅਜਿਹੀ ਚਰਚਾ ਹੈ ਕਿ ਕੁਝ ਸੰਸਦ ਮੈਂਬਰ ਮਹਾਰਾਸ਼ਟਰ ਦੇ ਉਪ ਮੁੱਖ ਮੰਤਰੀ ਏਕਨਾਥ ਸ਼ਿੰਦੇ ਦੀ ਅਗਵਾਈ ਵਾਲੀ ਸੱਤਾਧਾਰੀ ਸ਼ਿਵ ਸੈਨਾ 'ਚ ਸ਼ਾਮਿਲ ਹੋ ਸਕਦੇ ਹਨ, ਜੋ ਸ਼ਿੰਦੇ ਦੇ 'ਆਪ੍ਰੇਸ਼ਨ ਟਾਈਗਰ' ਦਾ ਹਿੱਸਾ ਹੈ | ਰਾਓਤ ਨੇ ਕਿਹਾ ਕਿ ਸਾਰੇ ਸੰਸਦ ਮੈਂਬਰ ਇਕਜੁੱਟਤਾ ਨਾਲ ਪਾਰਟੀ ਨਾਲ ਖੜੇ ਹਨ, ਸਾਨੂੰ ਉਮੀਦ ਹੈ ਕਿ ਅਫ਼ਵਾਹਾਂ ਦਾ ਦੌਰ ਬੰਦ ਹੋ ਜਾਵੇਗਾ |
