ਸ਼ਰਮੀਲਾ ਨੇ ਸੋਨ, ਹਰਜਿੰਦਰ ਕੌਰ, ਗੁਲਵੀਰ ਸਿੰਘ, ਸਰਵੇਸ਼ ਤੇ ਅਜੇ ਬਾਬੂ ਨੇ ਜਿੱਤੇ ਚਾਂਦੀ ਦੇ ਤਗਮੇ

ਗਲਾਸਗੋ, 28 ਜੁਲਾਈ (ਹਰਜੀਤ ਸਿੰਘ ਦੁਸਾਂਝ ਪੁਆਦੜਾ)-ਰਾਸ਼ਟਰਮੰਡਲ ਖੇਡਾਂ ’ਚ ਭਾਰਤੀ ਖਿਡਾਰੀਆਂ ਦਾ ਸ਼ਾਨਦਾਰ ਪ੍ਰਦਰਸ਼ਨ ਜਾਰੀ ਹੈ। ਪੈਰਾ ਅਥਲੈਟਿਕਸ ਦੀ ਮਹਿਲਾ ਐੱਫ-57 ਸ਼ਾਟ ਪੁੱਟ ਵਿਚ ਸ਼ਰਮੀਲਾ ਧਨਖੜ ਨੇ ਸੋਨ ਤਗਮਾ ਜਿੱਤਿਆ, ਜਦਕਿ ਇਸੇ ਮੁਕਾਬਲੇ ’ਚ ਸ਼ਿਲਪਾ ਸ਼ਾਇਲਾ ਨੇ ਕਾਂਸੀ ਦਾ ਤਗਮਾ ਆਪਣੇ ਨਾਂਅ ਕੀਤਾ। ਅਥਲੈਟਿਕਸ ਦੀ ਪੁਰਸ਼ ਉੱਚੀ ਛਾਲ ’ਚ ਸਰਵੇਸ਼ ਕੁਸ਼ਾਰੇ ਨੇ ਚਾਂਦੀ ਦਾ ਤਗਮਾ ਜਿੱਤਿਆ, ਜਦਕਿ ਮਹਿਲਾ ਭਾਰਤੋਲਕਾਂ ਦੇ 69 ਕਿੱਲੋਗ੍ਰਾਮ ਵਰਗ ’ਚ ਹਰਜਿੰਦਰ ਕੌਰ ਅਤੇ ਪੁਰਸ਼ਾਂ ਦੇ 79 ਕਿੱਲੋਗ੍ਰਾਮ ਵਰਗ ਵਿਚ ਅਜੈ ਬਾਬੂ ਵੱਲੂਰੀ ਨੇ ਚਾਂਦੀ ਦਾ ਤਗਮਾ ਅਤੇ ਲੰਬੀ ਦੂਰੀ ਦੇ ਦੌੜਾਕ ਗੁਲਵੀਰ ਸਿੰਘ ਨੇ 10,000 ਮੀਟਰ ’ਚ ਤਗਮਾ ਜਿੱਤਣ ਵਾਲਾ ਪਹਿਲਾ ਭਾਰਤੀ ਬਣ ਕੇ ਇਤਿਹਾਸ ਰਚ ਦਿੱਤਾ। ਰਾਸ਼ਟਰੀ ਰਿਕਾਰਡ ਧਾਰਕ ਨੇ ਗਲਾਸਗੋ ਦੇ ਸਕਾਟਸਟਨ ਸਟੇਡੀਅਮ ’ਚ ਇਸ ਈਵੈਂਟ ’ਚ 27:49.8 ਦਾ ਸਮਾਂ ਕੱਢ ਕੇ ਚਾਂਦੀ ਦਾ ਤਗਮਾ ਹਾਸਿਲ ਕਰਕੇ ਦੇਸ਼ ਦਾ ਮਾਣ ਵਧਾਇਆ। ਇਸ ਤੋਂ ਪਹਿਲਾਂ ਸ਼ਰਮੀਲਾ ਧਨਖੜ ਨੇ ਰਾਸ਼ਟਰਮੰਡਲ ਖੇਡਾਂ ’ਚ ਦੇਸ਼ ਦਾ ਪਹਿਲਾ ਪੈਰਾ-ਐਥਲੈਟਿਕਸ ਸੋਨ ਤਗਮਾ ਜਿੱਤ ਕੇ ਇਤਿਹਾਸ ਰਚ ਦਿੱਤਾ ਹੈ। ਉਸ ਨੇ ਗਲਾਸਗੋ ’ਚ ਮਹਿਲਾ ਸ਼ਾਟ ਪੁੱਟ ਐਫ57 ਈਵੈਂਟ ’ਚ ਸ਼ਾਨਦਾਰ ਪ੍ਰਦਰਸ਼ਨ ਕਰ ਕੇ ਸੋਨ ਤਗਮਾ ਹਾਸਿਲ ਕੀਤਾ, ਜਿਸ ’ਚ ਉਸ ਨੇ 9.81 ਮੀਟਰ ਦਾ ਸੀਜ਼ਨ-ਸਰਬੌਤਮ ਥਰੋਅ ਰਿਕਾਰਡ ਕੀਤਾ। ਸ਼ਰਮੀਲਾ ਦੀ ਸੋਨ ਤਗਮਾ ਜਿੱਤ ਕੇ ਪੈਰਾ-ਐਥਲੈਟਿਕਸ ’ਚ ਰਾਸ਼ਟਰਮੰਡਲ ਖੇਡਾਂ ਦੇ ਤਗਮੇ ਲਈ ਭਾਰਤ ਦੀ 20 ਸਾਲਾਂ ਦੀ ਉਡੀਕ ਖ਼ਤਮ ਕਰ ਦਿੱਤੀ। ਇਹ ਇਨ੍ਹਾਂ ਖੇਡਾਂ ’ਚ ਭਾਰਤ ਦਾ ਦੂਜਾ ਸੋਨ ਤਗਮਾ ਹੈ। ਇਸੇ ਈਵੈਂਟ ’ਚ ਇਕ ਹੋਰ ਭਾਰਤੀ ਐਥਲੀਟ ਸ਼ਿਲਪਾ ਸ਼ਾਏਲਾ, ਨੇ ਕਾਂਸੀ ਦਾ ਤਗਮਾ ਜਿੱਤਿਆ। ਹਾਲਾਂਕਿ ਸ਼ਿਲਪਾ ਦੇ ਤਗਮੇ ਦੀ ਪੁਸ਼ਟੀ ਘਟਨਾਵਾਂ ਦੇ ਇਕ ਨਾਟਕੀ ਮੋੜ ਤੋਂ ਬਾਅਦ ਹੀ ਹੋਈ। ਸ਼ਿਲਪਾ ਨੇ 7.26 ਮੀਟਰ ਦਾ ਨਿੱਜੀ ਸਰਵੋਤਮ ਥਰੋਅ ਪ੍ਰਾਪਤ ਕੀਤਾ ਸੀ ਅਤੇ ਸ਼ੁਰੂ ’ਚ ਉਸਨੂੰ ਚੌਥਾ ਸਥਾਨ ਮਿਲਿਆ ਸੀ, ਜਦੋਂ ਕਿ ਨਾਈਜੀਰੀਆ ਦੀ ਯੂਚਾਰੀਆ ਇਯਾਜ਼ੀ ਨੂੰ ਸ਼ੁਰੂ ’ਚ ਕਾਂਸੀ ਦਾ ਤਗਮਾ ਦਿੱਤਾ ਗਿਆ ਸੀ। ਹਾਲਾਂਕਿ, ਭਾਰਤ ਦੁਆਰਾ ਉਠਾਏ ਗਏ ਇਤਰਾਜ਼ ਤੋਂ ਬਾਅਦ, ਇੱਕ ਅਧਿਕਾਰਤ ਸਮੀਖਿਆ ਕੀਤੀ ਗਈ ਅਤੇ ਨਾਈਜੀਰੀਅਨ ਐਥਲੀਟ ਦੇ ਇਕੋ ਇਕ ਵੈਧ ਥਰੋਅ ਨੂੰ ਫਾਊਲ ਘੋਸ਼ਿਤ ਕੀਤਾ ਗਿਆ। ਨਤੀਜੇ ਵਜੋਂ, ਸ਼ਿਲਪਾ ਨੂੰ ਚੌਥੇ ਸਥਾਨ ਤੋਂ ਤੀਜੇ ਸਥਾਨ ‘ਤੇ ਤਰੱਕੀ ਦਿੱਤੀ ਗਈ ਤੇ ਕਾਂਸੀ ਦਾ ਤਗਮਾ ਦਿੱਤਾ ਗਿਆ। ਤਗਮਾ ਪ੍ਰਾਪਤ ਕਰਨ’’ਤੇ ਭਾਵੁਕ ਹੋ ਕੇ ਸ਼ਿਲਪਾ ਹੰਝੂਆਂ ਨਾਲ ਭਰ ਗਈ। ਉਸਨੇ ਸ਼ਰਮੀਲਾ ਦੇ ਨਾਲ ਇਸ ਇਤਿਹਾਸਕ ਪ੍ਰਾਪਤੀ ਦਾ ਜਸ਼ਨ ਮਨਾਇਆ। ਹਾਲਾਂਕਿ, ਇਸ ਗੱਲ ਦੀ ਸੰਭਾਵਨਾ ਹੈ ਕਿ ਨਾਈਜੀਰੀਆ ਇਸ ਫੈਸਲੇ ਦੇ ਖਿਲਾਫ ਜਵਾਬੀ ਵਿਰੋਧ ਦਰਜ ਕਰ ਸਕਦਾ ਹੈ। ਇਹ ਧਿਆਨ ਦੇਣਯੋਗ ਹੈ ਕਿ ਐਫ਼57 ਵਰਗੀਕਰਨ ਉਨ੍ਹਾਂ ਪੈਰਾ-ਐਥਲੀਟਾਂ ਲਈ ਮਨੋਨੀਤ ਕੀਤਾ ਗਿਆ ਹੈ ਜਿਨ੍ਹਾਂ ਦੇ ਹੇਠਲੇ ਅੰਗਾਂ ’ਚ ਕਮਜ਼ੋਰੀ ਹੈ, ਜਿਵੇਂ ਕਿ ਅੰਗਾਂ ਦੀ ਘਾਟ ਜਾਂ ਮਾਸਪੇਸ਼ੀਆਂ ਦੀ ਤਾਕਤ ’ਚ ਕਮੀ। ਸ਼ਰਮੀਲਾ ਨੂੰ 2 ਸਾਲ ਦੀ ਉਮਰ ਵਿੱਚ ਆਪਣੀ ਖੱਬੀ ਲੱਤ ਵਿੱਚ ਪੋਲੀਓ ਹੋ ਗਿਆ ਸੀ। ਉਸਨੇ ਇਸ ਸਾਲ ਦੇ ਸ਼ੁਰੂ ਵਿੱਚ ਫਜ਼ਾ ਇੰਟਰਨੈਸ਼ਨਲ ਪੈਰਾ ਐਥਲੈਟਿਕਸ ਚੈਂਪੀਅਨਸ਼ਿਪ ’ਚ ਸੋਨ ਤਗਮਾ ਵੀ ਜਿੱਤਿਆ ਸੀ। ਉਸਨੇ ਪਹਿਲਾਂ 2022 ਬਰਮਿੰਘਮ ਰਾਸ਼ਟਰਮੰਡਲ ਖੇਡਾਂ ’ਚ ਹਿੱਸਾ ਲਿਆ ਸੀ, ਜਿੱਥੇ ਉਹ ਚੌਥੇ ਸਥਾਨ ’ਤੇ ਰਹੀ ਸੀ।
ਭਾਰਤੋਲਕ ਵੱਲੂਰੀ ਅਜੇ ਬਾਬੂ ਨੇ ਜਿੱਤਿਆ ਚਾਂਦੀ ਦਾ ਤਗਮਾ
ਭਾਰਤ ਦੀ ਤਗਮਾ ਸੂਚੀ ’ਚ ਵਾਧਾ ਕਰਦੇ ਹੋਏ ਵੱਲੂਰੀ ਅਜੇ ਬਾਬੂ ਨੇ ਪੁਰਸ਼ਾਂ ਦੇ 79 ਕਿਲੋਗ੍ਰਾਮ ਵੇਟਲਿਫਟਿੰਗ ਮੁਕਾਬਲੇ ’ਚ ਚਾਂਦੀ ਦਾ ਤਗਮਾ ਜਿੱਤਣ ਲਈ ਸ਼ਾਨਦਾਰ ਪ੍ਰਦਰਸ਼ਨ ਕੀਤਾ। ਉਸ ਨੇ ਕੁੱਲ 330 ਕਿਲੋਗ੍ਰਾਮ ਭਾਰ ਚੁੱਕਿਆ, ਸੋਨ ਤਗਮਾ ਸਿਰਫ਼ ਇਕ ਕਿਲੋਗ੍ਰਾਮ ਨਾਲ ਖੁੰਝ ਗਿਆ। ਮਲੇਸ਼ੀਆ ਦੇ ਮੁਹੰਮਦ ਅਨਿਕ ਕਸਦਾਨ (ਏਰੀ ਹਿਦਾਇਤ ਮੁਹੰਮਦ) ਨੇ ਕੁੱਲ 331 ਕਿਲੋਗ੍ਰਾਮ ਭਾਰ ਚੁੱਕ ਕੇ ਸੋਨ ਤਗਮਾ ਜਿੱਤਿਆ। ਵਲੂਰੀ ਅਜੇ ਬਾਬੂ ਦੀ ਪ੍ਰਾਪਤੀ ਖਾਸ ਤੌਰ ’ਤੇ ਖਾਸ ਹੈ ਕਿਉਂਕਿ ਉਸਨੇ ਆਪਣੇ ਪਿਤਾ ਸ਼੍ਰੀਨਿਵਾਸ ਰਾਓ ਦੀ ਵਿਰਾਸਤ ਨੂੰ ਇਕ ਕਦਮ ਹੋਰ ਅੱਗੇ ਲੈ ਜਾਇਆ ਗਿਆ ਹੈ। ਉਸ ਦੇ ਪਿਤਾ ਨੇ 2010 ਦਿੱਲੀ ਰਾਸ਼ਟਰਮੰਡਲ ਖੇਡਾਂ ’ਚ ਪੁਰਸ਼ਾਂ ਦੇ 56 ਕਿਲੋਗ੍ਰਾਮ ਵੇਟਲਿਫਟਿੰਗ ਮੁਕਾਬਲੇ ਵਿਚ ਕਾਂਸੀ ਦਾ ਤਗਮਾ ਜਿੱਤਿਆ ਸੀ। ਹੁਣ, 16 ਸਾਲ ਬਾਅਦ, ਉਸਦੇ ਪੁੱਤਰ ਨੇ ਚਾਂਦੀ ਦਾ ਤਗਮਾ ਪ੍ਰਾਪਤ ਕਰਕੇ ਪਰਿਵਾਰ ਦੀ ਤਗਮਾ ਜਿੱਤਣ ਵਾਲੀ ਪਰੰਪਰਾ ਨੂੰ ਅੱਗੇ ਵਧਾਇਆ ਹੈ।
ਹਰਜਿੰਦਰ ਕੌਰ ਨੇ ਜਿੱਤਿਆ ਚਾਂਦੀ ਦਾ ਤਗਮਾ
ਭਾਰਤੋਲਕਾਂ ਦੇੇ ਮਹਿਲਾ 69 ਕਿਲੋ ਭਾਰ ਵਰਗ ਦੇ ਫਾਈਨਲ ’ਚ ਭਾਰਤ ਦੀ ਹਰਜਿੰਦਰ ਕੌਰ ਨੇ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਚਾਂਦੀ ਦਾ ਤਗਮਾ ਆਪਣੇ ਨਾਂਅ ਕੀਤਾ। ਹਰਜਿੰਦਰ ਕੌਰ ਨੇ 69 ਕਿਲੋਗ੍ਰਾਮ ਵਰਗ ’ਚ ਸ਼ਾਨਦਾਰ ਪ੍ਰਦਰਸ਼ਨ ਕਰਦਿਆਂ ਕੁੱਲ 227 ਕਿਲੋਗ੍ਰਾਮ (101 + 126 ਕਿਲੋਗ੍ਰਾਮ) ਭਾਰ ਚੁੱਕਿਆ। ਹਾਲਾਂਕਿ ਅੰਤ ’ਚ ਕੈਨੇਡਾ ਦੀ ਸ਼ਾਰਲਟ ਸਿਮੋਨੋ 240 ਕਿਲੋਗ੍ਰਾਮ ਨਾਲ ਪਹਿਲੇ ਸਥਾਨ ’ਤੇ ਰਹੀ।
ਮੁੱਕੇਬਾਜ਼ ਸਾਕਸ਼ੀ ਦੀ ਸ਼ਾਨਦਾਰ ਜਿੱਤ, ਪ੍ਰੀਤੀ ਤੇ ਪ੍ਰਿਆ ਨੇ ਕੀਤੇ ਤਗਮੇ ਪੱਕੇ
ਗਲਾਸਗੋ, 28 ਜੁਲਾਈ (ਹਰਜੀਤ ਸਿੰਘ ਦੁਸਾਂਝ ਪੁਆਦੜਾ)-ਗਲਾਸਗੋ ਰਾਸ਼ਟਰਮੰਡਲ ਖੇਡਾਂ 2026 ਦੇ ਵੱਖ-ਵੱਖ ਮੁਕਾਬਲਿਆਂ ਚ ਭਾਰਤੀ ਖਿਡਾਰੀਆਂ ਦਾ ਮਿਲਿਆ-ਜੁਲਿਆ ਪ੍ਰਦਰਸ਼ਨ ਦੇਖਣ ਨੂੰ ਮਿਲਿਆ। ਜਿੱਥੇ ਮੁੱਕੇਬਾਜ਼ ਸਾਕਸ਼ੀ ਚੌਧਰੀ ਨੇ ਇਕਤਰਫ਼ਾ ਜਿੱਤ ਨਾਲ ਕੁਆਰਟਰ ਫਾਈਨਲ ’ਚ ਥਾਂ ਬਣਾਈ, ਉੱਥੇ ਤੈਰਾਕੀ, ਅਥਲੈਟਿਕਸ, ਲਾਨ ਬੌਲਜ਼, ਵ੍ਹੀਲਚੇਅਰ ਬਾਸਕੇਟਬਾਲ ਅਤੇ ਮੁੱਕੇਬਾਜ਼ੀ ਦੇ ਹੋਰ ਮੁਕਾਬਲਿਆਂ ਵਿੱਚ ਭਾਰਤ ਨੂੰ ਨਿਰਾਸ਼ਾ ਦਾ ਸਾਹਮਣਾ ਕਰਨਾ ਪਿਆ।
ਸਾਕਸ਼ੀ ਦੀ ਇਕਤਰਫ਼ਾ ਜਿੱਤ, ਕੁਆਰਟਰ ਫਾਈਨਲ ਵਿੱਚ ਬਣਾਈ ਜਗ੍ਹਾ : ਮਹਿਲਾਵਾਂ ਦੇ 51 ਕਿੱਲੋਗ੍ਰਾਮ ਮੁੱਕੇਬਾਜ਼ੀ ਦੇ ਰਾਊਂਡ ਆਫ਼ 16 ਵਿੱਚ ਭਾਰਤ ਦੀ ਸਾਕਸ਼ੀ ਨੇ ਬੋਤਸਵਾਨਾ ਦੀ ਲੇਥਾਬੋ ਮੋਡੁਕਾਨੇਲੇ ਨੂੰ 5-0 ਨਾਲ ਹਰਾ ਕੇ ਸ਼ਾਨਦਾਰ ਜਿੱਤ ਦਰਜ ਕੀਤੀ। ਐੱਸ.ਈ.ਸੀ. ਹਾਲ ’ਚ ਹੋਏ ਮੁਕਾਬਲੇ ’ਚ ਸਾਕਸ਼ੀ ਨੇ ਸ਼ੁਰੂ ਤੋਂ ਅੰਤ ਤੱਕ ਦਬਦਬਾ ਬਣਾਈ ਰੱਖਿਆ ਅਤੇ ਪੰਜਾਂ ਜੱਜਾਂ ਨੇ ਉਸਦੇ ਹੱਕ ’ਚ ਫ਼ੈਸਲਾ ਦਿੱਤਾ। ਇਸ ਜਿੱਤ ਨਾਲ ਉਹ ਕੁਆਰਟਰ ਫਾਈਨਲ ਵਿੱਚ ਪਹੁੰਚ ਗਈ ਹੈ ਅਤੇ ਹੁਣ ਤਮਗੇ ਤੋਂ ਸਿਰਫ਼ ਇੱਕ ਜਿੱਤ ਦੂਰ ਹੈ।
ਪ੍ਰੀਤੀ ਤੇ ਪ੍ਰਿਆ ਨੇ ਕੀਤੇ ਤਗਮੇ ਪੱਕੇ : ਭਾਰਤੀ ਮੁੱਕੇਬਾਜ਼ ਪ੍ਰੀਤੀ ਪਵਾਰ ਅਤੇ ਪ੍ਰਿਆ ਨੇ 2 ਤਗਮੇ ਪੱਕੇ ਕਰ ਲਏ ਹਨ। ਪ੍ਰੀਤੀ 54 ਕਿਲੋਗ੍ਰਾਮ ਮਹਿਲਾ ਮੁੱਕੇਬਾਜ਼ੀ ਵਰਗ ਅਤੇ ਪ੍ਰਿਆ 60 ਕਿਲੋਗ੍ਰਾਮ ਭਾਰ ਵਰਗ ਦੇ ਸੈਮੀਫਾਈਨਲ ’ਚ ਪਹੁੰਚ ਗਈਆਂ ਹਨ। 22 ਸਾਲਾ ਪ੍ਰੀਤੀ ਨੇ ਕੁਆਰਟਰ ਫਾਈਨਲ ’ਚ ਉੱਤਰੀ ਆਇਰਲੈਂਡ ਦੀ ਖਿਡਾਰਨ ਨਿਕੋਲ ਕਲਾਈਡ ਨੂੰ 5-0 ਨਾਲ ਹਰਾਇਆ। ਜਦੋਂ ਕਿ, ਪ੍ਰਿਆ ਨੇ ਸਕਾਟਲੈਂਡ ਦੀ ਨਿਆ ਮਿਸ਼ੇਲ ਨੂੰ 4-1 ਨਾਲ ਹਰਾਇਆ। ਪ੍ਰੀਤੀ ਦਾ ਸੈਮੀਫਾਈਨਲ ਮੈਚ 31 ਜੁਲਾਈ ਨੂੰ ਜਮੈਕਾ ਦੀ ਕੈਥਰੀਨ ਮਵਾਪੇ ਵਿਰੁੱਧ ਹੋਵੇਗਾ।