ਜਵਾਬ ਚਾਹੀਦਾ ਹੈ ਭਾਸ਼ਨ ਨਹੀਂ-ਰਾਹੁਲ ਗਾਂਧੀ

ਲੋਕ ਸਭਾ ’ਚ ਵਿਰੋਧੀ ਧਿਰ ਦੇ ਨੇਤਾ ਰਾਹੁਲ ਗਾਂਧੀ ਨੇ ਗ੍ਰਹਿ ਮੰਤਰੀ ਅਮਿਤ ਸ਼ਾਹ ਦੇ ‘ਚਰਚਾ’ ਵਾਲੇ ਪ੍ਰਸਤਾਵ ਨੂੰ ਖਾਰਜ ਕਰਦਿਆਂ ਕਿਹਾ ਕਿ ਵਿਰੋਧੀ ਧਿਰਾਂ ਨੂੰ ਭਾਸ਼ਨ ਨਹੀਂ ਚਾਹੀਦਾ, ਸਗੋਂ ਵਿਦਿਆਰਥੀਆਂ ’ਤੇ ਪੁਲਿਸ ਕਾਰਵਾਈ ਲਈ ਜਵਾਬ ਅਤੇ ਜਵਾਬਦੇਹੀ ਚਾਹੀਦੀ ਹੈ। ਰਾਹੁਲ ਗਾਂਧੀ ਨੇ ਸੰਸਦ ਭਵਨ ਦੇ ਬਾਹਰ ਅਮਿਤ ਸ਼ਾਹ ਦੇ ਪ੍ਰਸਤਾਵ ਦੇ ਪ੍ਰਤੀਕਰਮ ਸਵਾਲ ਕੀਤਾ ਕਿ ਵਿਦਿਆਰਥੀਆਂ ’ਤੇ ਕਥਿਤ ਗੋਲੀਬਾਰੀ ਅਤੇ ਲਾਠੀਚਾਰਜ ਦਾ ਆਦੇਸ਼ ਕਿਸ ਨੇ ਦਿੱਤਾ? ਦਿੱਲੀ ਪੁਲਿਸ ਅਤੇ ਆਰ.ਏ.ਐਫ. ਗ੍ਰਹਿ ਮੰਤਰਾਲੇ ਦੇ ਅਧੀਨ ਆਉਂਦੇ ਹਨ। ਕੀ ਅਮਿਤ ਸ਼ਾਹ ਨੇ ਆਦੇਸ਼ ਦਿੱਤਾ? ਜੇਕਰ ਉਨ੍ਹਾਂ ਦਿੱਤਾ, ਤਾਂ ਉਹ ਦੋਸ਼ੀ ਹਨ। ਜੇਕਰ ਉਨ੍ਹਾਂ ਨਹੀਂ ਦਿੱਤਾ ਤਾਂ ਉਹ ਨਾਕਾਮ ਹਨ। ਦੋਵਾਂ ਹੀ ਮਾਮਲਿਆਂ ’ਚ ਉਨ੍ਹਾਂ ਨੂੰ ਅਸਤੀਫ਼ਾ ਦੇਣਾ ਚਾਹੀਦਾ ਹੈ।