ਰਾਮ ਮੰਦਰ ਦਾਨ ਵਿਵਾਦ : ਐਸ.ਆਈ.ਟੀ. ਜਾਂਚ ਜਲਦੀ ਪੂਰੀ ਕਰ ਰਿਪੋਰਟ ਦਾਇਰ ਕਰੇ-ਸੁਪਰੀਮ ਕੋਰਟ

ਨਵੀਂ ਦਿੱਲੀ, 17 ਅਗਸਤ (ਪੀ.ਟੀ.ਆਈ.)-ਸੁਪਰੀਮ ਕੋਰਟ ਨੇ ਸੋਮਵਾਰ ਨੂੰ ਅਯੁੱਧਿਆ ਦੇ ਰਾਮ ਮੰਦਰ ਵਿਚ ਦਾਨ ਦੇ ਕਥਿਤ ਗਬਨ ਦੀ ਜਾਂਚ ਕਰ ਰਹੀ ਅਦਾਲਤ ਦੁਆਰਾ ਨਿਯੁਕਤ ਵਿਸ਼ੇਸ਼ ਜਾਂਚ ਟੀਮ (ਐਸ.ਆਈ.ਟੀ.) ਨੂੰ ਆਪਣੀ ਜਾਂਚ ਤੇਜ਼ੀ ਨਾਲ ਪੂਰੀ ਕਰਨ ਅਤੇ ਇਸਨੂੰ ਇੱਕ ਤਰਕਪੂਰਨ ਸਿੱਟੇ ’ਤੇ ਲੈ ਜਾਣ ਲਈ ਕਿਹਾ। ਚੀਫ਼ ਜਸਟਿਸ ਸੂਰਿਆਕਾਂਤ ਅਤੇ ਜਸਟਿਸ ਜੋਇਮਾਲਿਆ ਬਾਗਚੀ ਅਤੇ ਵੀ. ਮੋਹਨਾ ਦੇ ਬੈਂਚ ਨੇ ਐਸ.ਆਈ.ਟੀ. ਨੂੰ ਜਾਂਚ ਵਿਚ ਹੋਈ ਪ੍ਰਗਤੀ ’ਤੇ ਸੀਲਬੰਦ ਲਿਫ਼ਾਫ਼ੇ ਵਿਚ ਸਥਿਤੀ ਰਿਪੋਰਟ ਦਾਇਰ ਕਰਨ ਦੇ ਨਿਰਦੇਸ਼ ਵੀ ਦਿੱਤੇ । ਐਸ.ਆਈ.ਟੀ. ਜਿਸ ਵਿਚ ਇਕ ਫੋਰੈਂਸਿਕ ਆਡੀਟਰ ਸ਼ਾਮਿਲ ਹੈ, ਆਪਣੀ ਸਥਿਤੀ ਰਿਪੋਰਟ ਸੀਲਬੰਦ ਲਿਫ਼ਾਫ਼ੇ ਵਿਚ ਸੁਪਰੀਮ ਕੋਰਟ ਨੂੰ ਸੌਂਪੇਗੀ । ਰਿਪੋਰਟ ਦਾ ਪਹਿਲਾਂ ਸਾਡੇ ਵਲੋਂ ਅਧਿਐਨ ਕੀਤਾ ਜਾਵੇਗਾ। ਬੈਂਚ ਨੇ ਐਸ.ਆਈ.ਟੀ. ਨੂੰ ਜਾਂਚ ਦੇ ਗੁਣਾਤਮਿਕ ਸੁਧਾਰ ਅਤੇ ਇਸਦੀ ਪਾਰਦਰਸ਼ਤਾ ਲਈ ਅਦਾਲਤ ਦੇ ਸਾਹਮਣੇ ਵੱਖ-ਵੱਖ ਮੁਕੱਦਮੇਬਾਜ਼ਾਂ ਦੁਆਰਾ ਕੀਤੇ ਗਏ ਕਿਸੇ ਵੀ ਸੁਝਾਅ ’ਤੇ ਨਿਰਪੱਖਤਾ ਨਾਲ ਵਿਚਾਰ ਕਰਨ ਲਈ ਵੀ ਕਿਹਾ। ਇਸ ਨੇ ਪਟੀਸ਼ਨਰਾਂ ਨੂੰ ਇਕ ਸੁਤੰਤਰ ਏਜੰਸੀ ਜਾਂ ਸੀ.ਬੀ.ਆਈ. ਦੁਆਰਾ ਅਦਾਲਤ-ਨਿਗਰਾਨੀ ਹੇਠ ਜਾਂਚ ਦੀ ਮੰਗ ਕਰਨ ਦੀ ਇਜਾਜ਼ਤ ਦੇ ਦਿੱਤੀ ਤੇ ਹੋਰ ਜਨਤਕ-ਭਾਵਨਾ ਵਾਲੇ ਵਿਅਕਤੀਆਂ ਨੂੰ ਦਾਨ ਚੋਰੀ ਦੇ ਦੋਸ਼ਾਂ ਦੇ ਸੰਬੰਧ ਵਿਚ ਐਸ.ਆਈ.ਟੀ. ਦੁਆਰਾ ਜਾਂਚ ਕੀਤੇ ਜਾਣ ਵਾਲੇ ਕਿਸੇ ਵੀ ਪਹਿਲੂ ’ਤੇ ਸਾਲਿਸਟਰ ਜਨਰਲ ਦੇ ਦਫ਼ਤਰ ਨੂੰ ਸੁਝਾਅ ਜਮ੍ਹਾਂ ਕਰਾਉਣ ਦੀ ਇਜਾਜ਼ਤ ਦਿੱਤੀ। ਇਸ ਨੇ ਕਿਹਾ ਕਿ ਸਾਲਿਸਟਰ ਜਨਰਲ ਤੁਸ਼ਾਰ ਮਹਿਤਾ ਦਾ ਦਫ਼ਤਰ ਸੁਝਾਵਾਂ ਨੂੰ ਐਸ.ਆਈ.ਟੀ. ਨੂੰ ਭੇਜੇਗਾ, ਜਿਸ ’ਤੇ ਨਿਰਪੱਖ ਤੌਰ ’ਤੇ ਵਿਚਾਰ ਕੀਤਾ ਜਾਵੇਗਾ।