ਚੌਂਕੀਮਾਨ, 28 ਫਰਵਰੀ (ਤੇਜਿੰਦਰ ਸਿੰਘ ਚੱਢਾ)-ਦੂਜੇ ਪਦਮ ਸ੍ਰੀ ਬੀਬੀ ਹਰਪ੍ਰਕਾਸ਼ ਕੌਰ ਮੈਮੋਰੀਅਲ ਮੂਟ ਕੋਰਟ ਮੁਕਾਬਲਾ, 2026 (ਰਾਸ਼ਟਰੀ ਦੌਰ) ਦਾ ਸ਼ੁਰੂਆਤੀ ਦੌਰ ਦਾ ਆਯੋਜਨ ਕੀਤਾ ਗਿਆ ਅਤੇ ਸੈਮੀ ਅਤੇ ਫਾਈਨਲ ਦੌਰ ਅੱਜ 1 ਮਾਰਚ ਨੂੰ ਜੀ.ਐੱਚ.ਜੀ. ਇੰਸਟੀਚਿਊਟ ਆਫ਼ ਲਾਅ, ਸਿੱਧਵਾਂ ਖੁਰਦ ਵਿਖੇ ਆਯੋਜਿਤ ਕੀਤੇ ਜਾਣਗੇ | ਇਹ ਸੰਸਥਾ ਜੋ ਕਿ ਸ਼੍ਰੀ ਗੁਰੂ ਹਰਿਗੋਬਿੰਦ ਉਜਾਗਰ ਹਰੀ ਟਰੱਸਟ ਸਿੱਧਵਾਂ ਖੁਰਦ ਦੇ ਅਧੀਨ ਕੰਮ ਕਰਦੀ ਹੈ, ਨੂੰ ਬਾਰ ਕੌਂਸਲ ਆਫ਼ ਇੰਡੀਆ, ਨੈਕ ਅਤੇ ਪੰਜਾਬ ਯੂਨੀਵਰਸਿਟੀ, ਚੰਡੀਗੜ੍ਹ ਦੁਆਰਾ ਮਾਨਤਾ ਪ੍ਰਾਪਤ ਹੈ | ਇਹ ਸਮਾਗਮ ਟਰੱਸਟ ਦੇ ਪ੍ਰਧਾਨ, ਕਿ੍ਪਾਲ ਸਿੰਘ ਭੱਠਲ, ਸਕੱਤਰ ਪ੍ਰੀਤਮ ਸਿੰਘ ਜੌਹਲ ਪੀ.ਸੀ.ਐਸ. ਏ.ਡੀ.ਸੀ.ਜੀ. (ਸੇਵਾਮੁਕਤ); ਮੈਨੇਜਰ ਡਾ. ਜੀ.ਐੱਸ. ਗਰੇਵਾਲ, ਮੈਂਬਰ ਬੀਰਿੰਦਰ ਸਿੰਘ ਸਿੱਧੂ, ਡਾ. ਹਰਮੇਲ ਸਿੰਘ ਸਿੱਧੂ, ਦਵਿੰਦਰ ਸਿੰਘ ਮਾਨ, ਜਰਨੈਲ ਸਿੰਘ ਢਿੱਲੋਂ ਅਤੇ ਪਿ੍ੰਸੀਪਲ ਪ੍ਰੋ. (ਡਾ.) ਸ਼ਵੇਤਾ ਢੰਡ ਦੀ ਯੋਗ ਅਗਵਾਈ ਹੇਠ ਕਰਵਾਇਆ ਗਿਆ | ਇਸ ਸਮਾਗਮ ਵਿਚ ਵੱਖ-ਵੱਖ ਰਾਜ ਅਤੇ ਰਾਸ਼ਟਰੀ ਯੂਨੀਵਰਸਿਟੀਆਂ ਦੇ 102 ਭਾਗੀਦਾਰਾਂ ਦੇ ਨਾਲ-ਨਾਲ ਦੇਸ਼ ਭਰ ਦੀਆਂ ਮਾਨਤਾ ਪ੍ਰਾਪਤ ਨਾਮਵਰ ਸੰਸਥਾਵਾਂ ਦੀਆਂ 34 ਟੀਮਾਂ ਨੇ ਹਿੱਸਾ ਲਿਆ | ਇਨ੍ਹਾਂ ਵਿਚੋਂ 12 ਟੀਮਾਂ ਸੈਮੀਫਾਈਨਲ ਵਿਚ ਅਤੇ 4 ਟੀਮਾਂ ਫਾਈਨਲ ਰਾਊਾਡ ਵਿਚ ਜਾਣਗੀਆਂ, ਜੋ ਕਿ 1 ਮਾਰਚ 2026 ਨੂੰ ਹੋਵੇਗਾ | ਇਸ ਸਮਾਗਮ ਦੀ ਸ਼ੁਰੂਆਤ ਪ੍ਰੋ. (ਡਾ.) ਜੈ ਸ਼ੰਕਰ ਸਿੰਘ ਵਾਈਸ ਚਾਂਸਲਰ ਰਾਜੀਵ ਗਾਂਧੀ ਨੈਸ਼ਨਲ ਯੂਨੀਵਰਸਿਟੀ ਆਫ਼ ਲਾਅ, ਪਟਿਆਲਾ ਦੁਆਰਾ ਸੰਬੋਧਿਤ ਇਕ ਉਦਘਾਟਨੀ ਸੈਸ਼ਨ ਨਾਲ ਹੋਈ | ਉਨ੍ਹਾਂ ਦੇ ਅਨੁਸਾਰ, ਮੂਟ ਕੋਰਟ ਮੁਕਾਬਲਾ ਕਾਨੂੰਨ ਦੇ ਵਿਦਿਆਰਥੀਆਂ ਲਈ ਆਪਣੇ ਕਾਨੂੰਨੀ ਗਿਆਨ ਅਤੇ ਅਦਾਲਤੀ ਹੁਨਰ ਦਾ ਪ੍ਰਦਰਸ਼ਨ ਕਰਨ ਲਈ ਇਕ ਪਲੇਟਫਾਰਮ ਵਜੋਂ ਕੰਮ ਕਰਦਾ ਹੈ | ਭਾਗੀਦਾਰਾਂ ਨੇ ਉਤਸ਼ਾਹ ਨਾਲ ਸਿਮੂਲੇਟਡ ਅਦਾਲਤੀ ਕਾਰਵਾਈਆਂ ਵਿਚ ਹਿੱਸਾ ਲਿਆ, ਮੌਖਿਕ ਦਲੀਲਾਂ ਪੇਸ਼ ਕੀਤੀਆਂ ਅਤੇ ਗੁੰਝਲਦਾਰ ਕਾਨੂੰਨੀ ਮੁੱਦਿਆਂ ਦਾ ਵਿਸ਼ਲੇਸ਼ਣ ਕੀਤਾ | ਉੱਘੇ ਕਾਨੂੰਨੀ ਪੇਸ਼ੇਵਰਾਂ ਨੇ ਰਾਸ਼ਟਰੀ ਮੂਟ ਕੋਰਟ ਮੁਕਾਬਲੇ ਵਿਚ ਜੱਜਿੰਗ ਪੈਨਲ ਦੇ ਮੈਂਬਰਾਂ ਵਜੋਂ ਸੇਵਾ ਨਿਭਾਈ | ਉਨ੍ਹਾਂ ਨੇ ਭਾਗੀਦਾਰਾਂ ਦੇ ਪ੍ਰਦਰਸ਼ਨ ਦਾ ਮੁਲਾਂਕਣ ਉਨ੍ਹਾਂ ਦੀ ਕਾਨੂੰਨੀ ਮੁਹਾਰਤ, ਪੇਸ਼ਕਾਰੀ ਹੁਨਰ ਅਤੇ ਪ੍ਰੇਰਕ ਦਲੀਲਾਂ ਨੂੰ ਸਪਸ਼ਟ ਤੌਰ 'ਤੇ ਬਿਆਨ ਕਰਨ ਦੀ ਯੋਗਤਾ ਦੇ ਆਧਾਰ 'ਤੇ ਕੀਤਾ | ਮੈਨੇਜਮੈਂਟ ਕਮੇਟੀ ਮੈਂਬਰ ਜਰਨੈਲ ਸਿੰਘ ਢਿੱਲੋਂ ਨੇ ਸਾਰੇ ਮਹਿਮਾਨਾਂ ਅਤੇ ਭਾਗੀਦਾਰਾਂ ਦਾ ਸਵਾਗਤ ਕੀਤਾ ਅਤੇ ਸਿੱਧਵਾਂ ਗਰੁੱਪ ਆਫ਼ ਇੰਸਟੀਚਿਊਸ਼ਨਜ਼ ਦੇ ਇਤਿਹਾਸ ਅਤੇ ਵਿਕਾਸ 'ਤੇ ਚਾਨਣਾ ਪਾਇਆ | ਸਮਾਗਮ ਦੇ ਪਹਿਲੇ ਦਿਨ ਜੱਜਾਂ ਦੇ ਪੈਨਲ ਵਿਚ ਡਾ: ਇਸ਼ਿਤਾ, ਐਡਵੋਕੇਟ ਵਿਸ਼ਾਲ ਤਿਵਾੜੀ, ਡਾ: ਦਿਵਿਆ ਖੁਰਾਣਾ, ਐਡਵੋਕੇਟ ਹਰਸ਼ ਜੋਸ਼ੀ, ਡਾ: ਸੰਗੀਤਾ ਟਾਕ, ਐਡਵੋਕੇਟ ਮਨਦੀਪ ਕੌਰ, ਡਾ: ਨੀਰੂ ਮਿੱਤਲ, ਐਡਵੋਕੇਟ ਅਮਨਦੀਪ ਸਿੰਘ, ਡਾ: ਜਸਵਿੰਦਰ, ਐਡਵੋਕੇਟ ਗੁਰਪ੍ਰੀਤ ਮਹਿੰਦਰੂ, ਐਡਵੋਕੇਟ ਹਰਸਿਮਰਨ ਮਾਲਵਾ, ਡਾ. ਜਸਦੀਪ ਕੌਰ, ਐਡਵੋਕੇਟ ਅਭੈ ਜਿੰਦਲ, ਡਾ: ਸੀਮਾ ਰਾਣੀ, ਐਡਵੋਕੇਟ ਕੇ.ਐਮ. ਸੇਠੀ, ਡਾ: ਮਾਨਵਪ੍ਰੀਤ ਕੌਰ ਢੀਂਡਸਾ, ਡਾ. ਇੰਦਰਜੋਤ ਕੌਰ ਸਿੱਧੂ ਅਤੇ ਐਡਵੋਕੇਟ ਪਰਮਦੀਪ ਸਿੰਘ ਥਿੰਦ ਸ਼ਾਮਿਲ ਸਨ | ਪਿ੍ੰਸੀਪਲ ਡਾ. ਸ਼ਵੇਤਾ ਢੰਡ ਨੇ ਸਾਰੇ ਮਹਿਮਾਨਾਂ, ਪ੍ਰਬੰਧਕ ਕਮੇਟੀ ਦੇ ਮੈਂਬਰਾਂ, ਭਾਗੀਦਾਰਾਂ, ਫੈਕਲਟੀ ਮੈਂਬਰਾਂ ਅਤੇ ਵਿਦਿਆਰਥੀਆਂ ਦਾ ਸਮਾਗਮ ਦੀ ਸਫ਼ਲਤਾ ਵਿਚ ਯੋਗਦਾਨ ਪਾਉਣ ਲਈ ਧੰਨਵਾਦ ਕੀਤਾ |