19-11-2026
ਅੱਖਰ:
ਵਿਚਾਰ ਪ੍ਰਵਾਹ
ਪ੍ਰਕਾਸ਼ਿਤ: 01-03-2026

ਰਿਆੜਕੀ ਪਬਲਿਕ ਸਕੂਲ ਵਲੋਂ 1857 ਦੇ 282 ਸ਼ਹੀਦਾਂ ਨੂੰ ਸ਼ਰਧਾਂਜਲੀ ਭੇਟ

ਅਜੀਤ ਡੈਸਕ 01-03-2026
ਬਟਾਲਾ, 28 ਫਰਵਰੀ (ਸਤਿੰਦਰ ਸਿੰਘ)-ਰਿਆੜਕੀ ਪਬਲਿਕ ਸਕੂਲ ਤੁਗਲਵਾਲਾ ਵਿਚ ਸੰਨ 1857 ਦੀ ਪਹਿਲੀ ਆਜ਼ਾਦੀ ਦੀ ਲੜਾਈ ਦੌਰਾਨ ਅਜਨਾਲੇ ਵਿਚ ਸ਼ਹੀਦ ਕੀਤੇ ਗਏ 282 ਸ਼ਹੀਦ ਸੈਨਿਕਾਂ ਦੀ ਯਾਦ ਵਿਚ ਇਕ ਬਹੁਤ ਹੀ ਗੰਭੀਰ ਤੇ ਇਤਿਹਾਸਕ ਮਹੱਤਵ ਵਾਲਾ ਸਮਾਗਮ ਇੰਟੈਕ ਪੰਜਾਬ ਵਲੋਂ ਰਿਆੜਕੀ ਸੰਸਥਾਵਾਂ ਦੇ ਸਹਿਯੋਗ ਨਾਲ ਸਕੂਲ ਦੇ ਡਾ. ਐੱਮ.ਐੱਸ. ਰੰਧਾਵਾ ਹਾਲ ਵਿਚ ਕਰਵਾਇਆ ਗਿਆ, ਜੋ 28 ਫਰਵਰੀ 2014 ਨੂੰ ਕੀਤੀ ਗਈ ਇਤਿਹਾਸਕ ਖੁਦਾਈ ਦੀ 12ਵੀਂ ਵਰ੍ਹੇਗੰਢ ਨੂੰ ਸਮਰਪਿਤ ਸੀ, ਜਿਸ ਦੌਰਾਨ ਉਸ ਖੂਹ ਵਿਚੋਂ ਅਸਥੀਆਂ ਬਾਹਰ ਕੱਢੀਆਂ ਗਈਆਂ ਸਨ, ਜਿਸ ਨੂੰ ਅੰਗਰੇਜ਼ਾਂ ਨੇ ਤੋਹੀਨਜਨਕ ਢੰਗ ਨਾਲ Tਕਾਲਿਆਂਵਾਲਾ ਖੂਹU ਕਿਹਾ ਸੀ | ਸਮਾਗਮ ਦੌਰਾਨ ਵਿਸ਼ੇਸ਼ ਲੈਕਚਰ ਸੰਨ 1857 ਦੇ ਵਿਦਰੋਹ ਅਤੇ ਖੂਹ ਦੀ ਮੁੜ-ਖੋਜ ਸੰਬੰਧੀ ਜਾਣਕਾਰੀ ਦਿੰਦੀਆਂ ਪਾਵਰਪੋਇੰਟ ਪੇਸ਼ਕਾਰੀਆਂ ਅਤੇ ਇਕ ਇਤਿਹਾਸਕ ਪ੍ਰਦਰਸ਼ਨੀ ਲਗਾਈ ਗਈ, ਜਿਸ ਵਿਚ ਵਿਰਲੇ ਫੋਟੋ ਦਸਤਾਵੇਜ਼ ਅਤੇ 2014 ਦੀ ਖੁਦਾਈ ਨਾਲ ਜੁੜੇ ਦਿ੍ਸ਼ ਪ੍ਰਦਰਸ਼ਿਤ ਕੀਤੇ ਗਏ | ਇਹ ਪ੍ਰਦਰਸ਼ਨੀ ਵਿਦਿਆਰਥੀਆਂ ਅਤੇ ਹਾਜ਼ਰੀਨ ਲਈ ਇਤਿਹਾਸ ਨਾਲ ਜੀਵੰਤ ਜੋੜ ਬਣਾਉਣ ਵਾਲਾ ਮਾਧਿਅਮ ਸਾਬਤ ਹੋਈ | ਸਮਾਗਮ ਦੀ ਸ਼ੁਰੂਆਤ ਵਿਦਿਆਰਥੀਆਂ ਵਲੋਂ ਸ਼ਬਦ ਗਾਇਨ ਅਤੇ ਅਰਦਾਸ ਨਾਲ ਕੀਤੀ ਗਈ | ਵਿਦਿਆਰਥੀਆਂ ਨੇ ਸ਼ਹੀਦਾਂ ਨੂੰ ਸ਼ਰਧਾ ਦੇ ਫੁੱਲ ਭੇਟ ਕਰ ਕੇ ਸਮਾਗਮ ਨੂੰ ਆਤਮਿਕ ਅਤੇ ਦੇਸ਼ ਭਗਤੀ ਭਰੇ ਮਾਹੌਲ ਨਾਲ ਭਰ ਦਿੱਤਾ | ਇਸ ਮੌਕੇ ਰਿਆੜਕੀ ਪਬਲਿਕ ਸਕੂਲ ਦੇ ਵਿਦਿਆਰਥੀਆਂ ਵਲੋਂ ਇਸ ਵਿਸ਼ੇ 'ਤੇ ਪ੍ਰਭਾਵਸ਼ਾਲੀ ਤੇ ਜਾਣਕਾਰੀ ਭਰਪੂਰ ਭਾਸ਼ਣ ਦਿੱਤੇ | ਇਸ ਦੇ ਨਾਲ ਹੀ ਸ਼ਹੀਦਾਂ ਨੂੰ ਸਮਰਪਿਤ ਇਕ ਪ੍ਰਭਾਵਸ਼ਾਲੀ ਨਾਟਕ ਵੀ ਪੇਸ਼ ਕੀਤਾ ਗਿਆ, ਜਿਸ ਨੇ 1857 ਦੇ ਘਟਨਾ-ਚੱਕਰ ਅਤੇ ਸੈਨਿਕਾਂ ਦੀ ਪੀੜਾ ਨੂੰ ਜੀਵੰਤ ਕਰ ਦਿੱਤਾ | ਪ੍ਰਸਿੱਧ ਇਤਿਹਾਸਕਾਰ ਸ੍ਰੀ ਸੁਰਿੰਦਰ ਕੋਛੜ, ਜਿਨ੍ਹਾਂ ਦੀ ਅਣਥੱਕ ਖੋਜ ਅਤੇ ਦਿ੍ੜ ਨਿਸ਼ਚੇ ਨਾਲ ਇਸ ਸਥਾਨ ਦੀ ਪਛਾਣ ਅਤੇ ਖੁਦਾਈ ਸੰਭਵ ਹੋਈ, ਸਮਾਗਮ ਦੇ ਮੁੱਖ ਮਹਿਮਾਨ ਅਤੇ ਮੁੱਖ ਬੁਲਾਰੇ ਸਨ | ਉਨ੍ਹਾਂ ਨੇ ਆਪਣੇ ਅਦਭੁਤ ਖੋਜ-ਸਫ਼ਰ ਬਾਰੇ ਦੱਸਿਆ ਕਿ ਕਿਵੇਂ ਉਨ੍ਹਾਂ ਨੇ ਅੰਗਰੇਜ਼ ਅਧਿਕਾਰੀ ਫ੍ਰੈਡਰਿਕ ਹੈਨਰੀ ਕੂਪਰ ਦੀ ਪੁਸਤਕ ਵਰਗੇ ਦਸਤਾਵੇਜ਼ਾਂ ਤੋਂ ਸੂਤਰ ਲੱਭੇ, ਗੁਰਦੁਆਰਾ ਕਮੇਟੀ ਨੂੰ ਵਿਸ਼ਵਾਸ ਦਿਵਾਇਆ ਅਤੇ ਆਖਿਰਕਾਰ 28 ਫਰਵਰੀ 2014 ਨੂੰ ਖੁਦਾਈ ਕਰਵਾ ਕੇ ਸੈਂਕੜੇ ਪਿੰਜਰਾਂ, ਖੋਪੜੀਆਂ ਤੇ ਹੋਰ ਨਿਸ਼ਾਨੀਆਂ ਨੂੰ ਬਾਹਰ ਕੱਢਿਆ, ਜਿਸ ਨਾਲ 26ਵੀਂ ਬੰਗਾਲ ਨੇਟਿਵ ਇਨਫੈਂਟਰੀ ਦੇ ਸਿਪਾਹੀਆਂ ਦੇ ਕਤਲੇਆਮ ਦੀ ਪੁਸ਼ਟੀ ਹੋਈ | ਕਿਤਾਬ 'ਰਿਵੋਲਟ ਆਫ ਅਜਨਾਲਾ 1857 - ਦ ਨਰਸੰਹਾਰ' ਦੀ ਲੇਖਿਕਾ ਸ੍ਰੀਮਤੀ ਅਨੀਤਾ ਸਰੀਨ ਨੇ ਵੀ ਸੰਬੋਧਨ ਕੀਤਾ | ਰਿਆੜਕੀ ਕਾਲਜ ਤੁਗਲਵਾਲਾ ਦੇ ਪਿ੍ੰਸੀਪਲ ਸ: ਸਵਰਨ ਸਿੰਘ ਵਿਰਕ ਨੇ ਕਿਹਾ ਕਿ ਅਜਿਹੇ ਇਤਿਹਾਸਕ ਸਮਾਗਮ ਵਿਦਿਆਰਥੀਆਂ ਵਿਚ ਆਪਣੇ ਵਿਰਸੇ ਪ੍ਰਤੀ ਪਿਆਰ ਤੇ ਜ਼ਿੰਮੇਵਾਰੀ ਦੀ ਭਾਵਨਾ ਪੈਦਾ ਕਰਦੇ ਹਨ | ਮੇਜਰ ਜਨਰਲ ਬਲਵਿੰਦਰ ਸਿੰਘ (ਰਿਟਾ.), ਵੀ.ਐੱਸ.ਐੱਮ. ਕਨਵੀਨਰ ਇੰਟੈਕ ਪੰਜਾਬ ਨੇ ਕਿਹਾ ਕਿ 1857 ਦੀ ਲੜਾਈ ਵਿਚ ਪੰਜਾਬ ਦੀ ਭੂਮਿਕਾ ਮਹੱਤਵਪੂਰਨ ਰਹੀ ਹੈ ਅਤੇ ਦੇਸ਼ ਇਨ੍ਹਾਂ ਸ਼ਹੀਦਾਂ ਦੀਆਂ ਕੁਰਬਾਨੀਆਂ ਨੂੰ ਕਦੇ ਨਹੀਂ ਭੁੱਲ ਸਕਦਾ | ਗਗਨਦੀਪ ਸਿੰਘ ਵਿਰਕ ਕਨਵੀਨਰ ਇੰਟੈਕ ਅੰਮਿ੍ਤਸਰ ਨੇ ਸਰਕਾਰ ਕੋਲ ਮੰਗ ਕੀਤੀ ਕਿ ਅੰਮਿ੍ਤਸਰ ਦੀ ਕੂਪਰ ਰੋਡ ਦਾ ਨਾਂਅ ਬਦਲ ਕੇ ਇਸ ਨੂੰ 282 ਸ਼ਹੀਦ ਸੈਨਿਕਾਂ ਨੂੰ ਸਮਰਪਿਤ ਕੀਤਾ ਜਾਵੇ ਤਾਂ ਜੋ ਜਨਤਕ ਥਾਵਾਂ 'ਤੇ ਕੌਲੋਨੀਆਈ ਅਧਿਕਾਰੀਆਂ ਦੀ ਬਜਾਏ ਸ਼ਹੀਦਾਂ ਦੀ ਯਾਦ ਨੂੰ ਸਨਮਾਨ ਮਿਲੇ | Tਕਾਲਿਆਂਵਾਲਾ ਖੂਹU ਤੋਂ Tਸ਼ਹੀਦ ਗੰਜ-ਸ਼ਹੀਦਾਂ ਵਾਲਾ ਖੂਹU ਤੱਕ ਦਾ ਇਹ ਸਫ਼ਰ ਸੱਚਾਈ, ਖੋਜ ਅਤੇ ਸ਼ਹੀਦਾਂ ਦੀ ਇੱਜ਼ਤ ਦੀ ਪੁਨਰਸਥਾਪਨਾ ਦਾ ਪ੍ਰਤੀਕ ਬਣ ਗਿਆ |
ਪਿਛਲੀ ਖ਼ਬਰ ਸਾਬਕਾ ਵਿਧਾਇਕ ਲੋਧੀਨੰਗਲ ਨੇ 13 ਦੀ ਰੈਲੀ ਸੰਬੰਧੀ ਕੀਤੀ ਇਕੱਤਰਤਾ ਅਗਲੀ ਖ਼ਬਰ ਖ਼ਾਲਸਾ ਕਾਲਜ ਗੁਰਦਾਸ ਨੰਗਲ ਦੇ ਇਤਿਹਾਸ ਵਿਭਾਗ ਵਲੋਂ ਇਤਿਹਾਸਕ ਸਥਾਨਾਂ ਦਾ ਦੌਰਾ

Subscribers Only Story

ਇਸ ਖ਼ਬਰ ਨੂੰ ਪੂਰਾ ਪੜ੍ਹਨ ਲਈ ਸਬਸਕ੍ਰਾਈਬਰ ਲਾਗਇਨ ਕਰੋ।