ਰਾਤ ਚਲੀਆਂ ਬਟਾਲਾ ’ਚ ਗੋਲੀਆਂ, 2 ਨੌਜਵਾਨ ਜ਼ਖ਼ਮੀ
ਅਜੀਤ ਡੈਸਕ
07-06-2026
ਬਟਾਲਾ, 6 ਜੂਨ (ਹਰਦੇਵ ਸਿੰਘ ਸੰਧੂ)- ਬੀਤੀ ਰਾਤ ਬਟਾਲਾ ‘ਚ ਗੋਲੀਆਂ ਚੱਲਣ ਨਾਲ 2 ਨੌਜਵਾਨ ਜਖ਼ਮੀ ਹੋ ਗਏ। ਸਿਵਿਲ ਹਸਪਤਲਾ ‘ਚ ਜ਼ੇਰੇ ਇਲਾਜ ਜਖ਼ਮੀ ਨੌਜਵਾਨ ਅਸ਼ੀਸ ਮਸੀਹ ਪੁੱਤਰ ਸੁੱਚਾ ਮਸੀਹ, ਸਾਹਿਲ ਪੁੱਤਰ ਰਣਜੀਤ ਸਿੰਘ ਦੋਵੋਂ ਵਾਸੀ ਪਿੰਡ ਗਿਲਾਂ ਵਾਲੀ ਨੇ ਦੱਸਿਆ ਕਿ ਅਸੀਂ ਰਾਤ ਸਮੇਂ ਸ਼ਹਿਰ ਤੋਂ ਆਪਣੇ ਪਿੰਡ ਜਾ ਰਹੇ ਸੀ ਕਿ ਪਿਛੋਂ ਇਕ ਤੇਜ ਰਫ਼ਤਾਰ ਮੋਟਰਸਾਇਕਲ ‘ਤੇ ਕੁਝ ਨੌਜਵਾਨ ਸਾਡੇ ਕੋਲੋਂ ਲੰਘੇ। ਉਨ੍ਹਾਂ ਦੇ ਪਿੱਛੇ ਇਕ ਹੋਰ ਮੋਟਰਸਾਇਕਲ ਦੇ ਵਿਅਕਤੀ ਆਏ ਜਿਨ੍ਹਾਂ ਨੇ ਗੋਲੀਆਂ ਚਲਾ ਦਿੱਤੀਆਂ। ਜਿਹੜੀਆਂ ਸਾਡੇ ਦੋਵਾਂ ਦੇ ਲੱਗ ਗਈਆਂ। ਉਨ੍ਹਾਂ ਦੱਸਿਆ ਕਿ ਸ਼ਾਇਦ ਜਿਹੜਾ ਮੋਟਰਸਾਇਕਲ ਅੱਗੇ ਲੰਘ ਕੇ ਗਿਆ ਸੀ ਉਸ ਦੇ ਭੁਲੇਖੇ ਉਕਤ ਮੋਟਰਸਾਇਕਲ ਸਵਾਰਾਂ ਨੇ ਸਾਡੇ ਕਥਿਤ ਤੌਰ ‘ਤੇ ਗੋਲੀਆਂ ਚਲਾ ਦਿੱਤੀਆਂ ਤੇ ਫਰਾਰ ਹੋ ਗਏ। ਸਿਵਿਲ ਹਸਪਤਾਲ ਦੇ ਡਾਕਟਰ ਸੁਖਰਾਜ ਸਿੰਘ ਨੇ ਦੱਸਿਆ ਕਿ ਸਾਡੇ ਕੋਲ 2 ਜਖ਼ਮੀ ਨੌਜਵਾਨ ਆਏ ਸੀ ਜਿਨ੍ਹਾਂ ਚੋਂ ਆਸ਼ੀਸ ਦੇ ਲੱਤ ‘ਚ ਗੋਲੀ ਤੇ ਸਾਹਿਲ ਦੇ ਪਿੱਛੇ ਪੱਟ ਦੇ ਉੱਪਰ ਗੋਲੀ ਲੱਗੀ ਸੀ। ਡਾਕਟਰ ਨੇ ਦੱਸਿਆ ਕਿ ਦੋਵਾਂ ਦੀ ਹਾਲਤ ਠੀਕ ਹੈ। ਇਨ੍ਹਾਂ ਨੂੰ ਅੰਮ੍ਰਿਤਸਰ ਲਈ ਤਬਦੀਲ ਕਰ ਦਿੱਤਾ ਗਿਆ। ਇਸ ਬਾਰੇ ਸਿੰਬਲ ਪੁਲਿਸ ਚੋਂਕੀ ਇੰਚਾਰਜ ਸਬ ਇੰਸਪੈਕਟਰ ਮਨਪ੍ਰੀਤ ਸਿੰਘ ਨੇ ਦੱਸਿਆ ਕਿ ਇਸ ਘਟਨਾ ਸੰਬੰਧੀ ਬਾਰੀਕੀ ਨਾਲ ਜਾਂਚ ਕੀਤੀ ਜਾ ਰਹੀ ਹੈ। ਜੋ ਵੀ ਤੱਥ ਸਾਹਮਣੇ ਆਉਣਗੇ ਉਸੇ ਤਹਿਤ ਅਗਲੀ ਕਾਰਵਾਹੀ ਕੀਤੀ ਜਾਵੇਗੀ।
