ਫ਼ਾਜ਼ਿਲਕਾ, 3 ਜੂਨ (ਦਵਿੰਦਰ ਪਾਲ ਸਿੰਘ)-ਸਮਾਜ ਸੇਵਾ ਦੇ ਖੇਤਰ ਵਿਚ ਮੋਹਰੀ ਰਹਿਣ ਵਾਲੀ ਸੰਸਥਾ ਜਨ ਸੇਵਾ ਸੁਸਾਇਟੀ ਵਲੋਂ 'ਆਪਕਾ ਸਾਮਾਨ, ਮਾਨਵਤਾ ਕੇ ਕਾਮ' ਪ੍ਰਕਲਪ ਦੇ ਤਹਿਤ ਇਕ ਸ਼ਲਾਘਾਯੋਗ ਅਤੇ ਅਨੋਖੀ ਪਹਿਲ ਕੀਤੀ ਗਈ ਹੈ | ਸੁਸਾਇਟੀ ਵਲੋਂ ਮੋਦੀ ਬਿ੍ਕਸ 'ਤੇ ਕੰਮ ਕਰਨ ਵਾਲੇ ਪ੍ਰਵਾਸੀ ਮਜ਼ਦੂਰਾਂ ਦੇ ਛੋਟੇ ਬੱਚਿਆਂ ਲਈ 7 ਪੁਰਾਣੇ ਝੂਲੇ ਭੇਟ ਕੀਤੇ ਗਏ | ਸੁਸਾਇਟੀ ਦੇ ਪ੍ਰਧਾਨ ਰਮਨ ਸੇਤੀਆ, ਇੰਚਾਰਜ ਰਾਜੀਵ ਕੁੱਕੜ ਅਤੇ ਸਕੱਤਰ ਆਕਾਸ਼ ਡੋਡਾ ਨੇ ਦੱਸਿਆ ਕਿ ਇਹ ਸੇਵਾ ਕਾਰਜ ਪਿਛਲੇ 5 ਸਾਲਾਂ ਤੋਂ ਲਗਾਤਾਰ ਚਲਾਇਆ ਜਾ ਰਿਹਾ ਹੈ | ਇਸ ਮੁਹਿੰਮ ਦੇ ਤਹਿਤ ਲੋਕਾਂ ਦੇ ਘਰਾਂ ਵਿਚ ਪਿਆ ਪੁਰਾਣਾ ਪਰ ਵਰਤੋਂ ਯੋਗ ਸਾਮਾਨ-ਜਿਵੇਂ ਕਿ ਕੱਪੜੇ, ਜੁੱਤੀਆਂ, ਬਰਤਨ, ਖਿਡੌਣੇ, ਬੈੱਡ-ਸ਼ੀਟਾਂ, ਪਾਣੀ ਦੀਆਂ ਬੋਤਲਾਂ ਜਾਂ ਹੋਰ ਕੋਈ ਵੀ ਵਾਧੂ ਸਾਮਾਨ ਇਕੱਠਾ ਕਰਕੇ ਲੋੜਵੰਦ ਪਰਿਵਾਰਾਂ ਵਿਚ ਵੰਡਿਆ ਜਾਂਦਾ ਹੈ | ਇਸੇ ਲੜੀ ਤਹਿਤ ਪ੍ਰਵਾਸੀ ਮਜ਼ਦੂਰਾਂ ਦੇ ਬੱਚਿਆਂ ਨੂੰ 7 ਪੁਰਾਣੇ ਝੂਲੇ ਦਿੱਤੇ ਗਏ, ਜਿਨ੍ਹਾਂ ਵਿਚ 2 ਕੈਰੀ ਕਾਰਟ, 2 ਵਾਕਰ, ਬੇਬੀ ਜਿੰਮ, ਅਲਮਾਰੀ ਅਤੇ ਸਵਿੰਗ ਝੂਲਾ ਸ਼ਾਮਲ ਸਨ | ਇੰਚਾਰਜ ਰਾਜੀਵ ਕੁੱਕੜ ਨੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਹੁਣ ਤੱਕ 42 ਪੜਾਵਾਂ ਵਿਚ 4420 ਲੋੜਵੰਦ ਲੋਕਾਂ ਨੂੰ ਇਹ ਸਾਮਾਨ ਵੰਡਿਆ ਜਾ ਚੁੱਕਾ ਹੈ | ਸੁਸਾਇਟੀ ਨੇ ਆਮ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਜਿਨ੍ਹਾਂ ਦੇ ਘਰਾਂ ਵਿਚ ਪੁਰਾਣਾ ਪਰ ਵਰਤੋਂ ਯੋਗ ਸਾਮਾਨ ਪਿਆ ਹੈ, ਉਹ ਇਸ ਨੂੰ ਸੁਸਾਇਟੀ ਨੂੰ ਦਾਨ ਕਰਨ, ਕਿਉਂਕਿ ਇਹ ਸਾਮਾਨ ਕਿਸੇ ਲੋੜਵੰਦ ਲਈ ਵਰਦਾਨ ਸਾਬਤ ਹੋ ਸਕਦਾ ਹੈ | ਸਾਮਾਨ ਜਮਾਂ ਕਰਵਾਉਣ ਲਈ ਇੰਚਾਰਜ ਰਾਜੀਵ ਕੁੱਕੜ ਦੇ ਮੋਬਾਈਲ ਨੰਬਰ 'ਤੇ ਸੰਪਰਕ ਕੀਤਾ ਜਾ ਸਕਦਾ ਹੈ | ਇਸ ਮੌਕੇ ਪਵਨ ਬੱਬਰ ਅਤੇ ਕਰਮਚਾਰੀ ਰਾਮ ਅਵਤਾਰ ਵੀ ਵਿਸ਼ੇਸ਼ ਤੌਰ 'ਤੇ ਮੌਜੂਦ ਸਨ |
