ਅਮਰਕੋਟ, 28 ਜੁਲਾਈ (ਭੱਟੀ)-ਅਮਰਕੋਟ ਪਾਵਰਕਾਮ ਸਟੇਸ਼ਨ ’ਚ ਤੜਕੇ ਚਾਰ ਵਜੇ ਤੋਂ ਪਹਿਲਾ ਦਾ ਕੋਈ ਤਕਨੀਕੀ ਨੁਕਸ ਪੈਣ ਕਾਰਨ ਬਿਜਲੀ ਸਪਲਾਈ ਪੂਰੀ ਤਰ੍ਹਾਂ ਠੱਪ ਹੋ ਕੇ ਰਹਿ ਗਈ। ਆਮ ਲੋਕਾਂ ਦੇ ਇਨਵਰਟਰ ਵੀ ਜਵਾਬ ਦੇ ਗਏ, ਜਿਸ ਕਾਰਨ ਬੱਚਿਆਂ, ਬਜ਼ੁਰਗਾਂ, ਮਰੀਜ਼ਾਂ ਦਾ ਅੱਤ ਦੀ ਗਰਮੀ ’ਚ ਮੰਦਾ ਹਾਲ ਹੋਇਆ ਪਿਆ ਹੈ। ਹਰ ਪਾਸੇ ਇਕ ਤਰ੍ਹਾਂ ਨਾਲ ਹਾਹਾਕਾਰ ਮਚੀ ਪਈ ਹੈ। 16 ਘੰਟੇ ਤੋਂ ਬਿਜਲੀ ਸਪਲਾਈ ਠੱਪ ਹੋਣ ਕਰਕੇ ਕਸਬਾ ਨਿਵਾਸੀਆਂ ਤੇ ਆਸ-ਪਾਸ ਪਿੰਡਾਂ ਦੇ ਲੋਕਾਂ ਦੇ ਘਰਾਂ ਦਾ ਪੀਣ ਵਾਲਾ ਪਾਣੀ ਵੀ ਖ਼ਤਮ ਹੋ ਗਿਆ, ਜਿਸ ਕਾਰਨ ਲੋਕਾਂ ਡਾਹਢੀ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰਨਾ ਪਿਆ। ਪਾਵਰਕਾਮ ਕਰਮਚਾਰੀਆਂ ਦੀ ਹੜਤਾਲ ਕਾਰਨ ਪਹਿਲਾ ਵੀ ਬਿਜਲੀ ਸਪਲਾਈ ’ਤੇ ਕਾਫੀ ਅਸਰ ਪਿਆ ਸੀ, ਪਰ ਅੱਜ ਤੜਕੇ ਪਏ ਤਕਨੀਕੀ ਨੁਕਸ ਨੇ ਆਮ ਲੋਕਾਂ ਦੇ ਅੱਤ ਦੀ ਗਰਮੀ ’ਚ ਚੰਗਿਆੜੇ ਕੱਢ ਕੇ ਰੱਖ ਦਿੱਤੇ। ਬਿਜਲੀ ਸਪਲਾਈ ਬਹਾਲ ਕਰਨ ਲਈ ਆਮ ਲੋਕਾਂ ਨੇ ਵੀ ਬੜੀ ਜਦੋ ਜਹਿਦ ਕੀਤੀ, ਬਿਜਲੀ ਸਪਲਾਈ ਬਹਾਲ ਨਹੀਂ ਹੋਈ।
