ਰੂਪਨਗਰ, 28 ਅਪ੍ਰੈਲ (ਸਤਨਾਮ ਸਿੰਘ ਸੱਤੀ)-ਸਿਵਲ ਹਸਪਤਾਲ ਰੂਪਨਗਰ ਦੀ ਐਨੇਸਥੀਸੀਆ ਵਿਸ਼ੇਸ਼ ਮਾਹਿਰ ਡਾ. ਆਰਤੀ ਵਰਮਾ ਨੇ ਅਹਿਮਦਾਬਾਦ (ਗੁਜਰਾਤ) ਵਿਚ ਇੰਡੀਅਨ ਸੋਸਾਇਟੀ ਆਫ਼ ਐਨੇਸਥੀਸਿਓਲੋਜਿਸਟਸ ਦੀ ਰਾਸ਼ਟਰੀ ਕਾਨਫ਼ਰੰਸ ਦੌਰਾਨ ਹੋਏ ਆਲ ਇੰਡੀਆ ਬੈਡਮਿੰਟਨ ਟੂਰਨਾਮੈਂਟ ਵਿਚ ਸੋਨੇ ਦਾ ਤਮਗ਼ਾ ਜਿੱਤ ਕੇ ਰੂਪਨਗਰ ਅਤੇ ਪੰਜਾਬ ਦਾ ਨਾਮ ਰੌਸ਼ਨ ਕੀਤਾ ਹੈ | ਯੂਵਾਕਾਨ ਸਮਾਗਮ ਤਹਿਤ ਕਰਵਾਏ ਗਏ ਇਸ ਟੂਰਨਾਮੈਂਟ ਵਿਚ ਦੇਸ਼ ਭਰ ਤੋਂ ਐਨੇਸਥੀਸੀਆ ਵਿਦਵਾਨਾਂ ਨੇ ਭਾਗ ਲਿਆ, ਜਿੱਥੇ ਡਾ. ਵਰਮਾ ਨੇ ਆਪਣੀ ਬਿਹਤਰੀਨ ਖੇਡ, ਦਿ੍ੜ ਨਿਸ਼ਚੇ ਅਤੇ ਖਿਡਾਰੀ ਜਜ਼ਬੇ ਨਾਲ ਖ਼ਿਤਾਬ ਆਪਣੇ ਨਾਮ ਕੀਤਾ | ਉਨਾਂ ਨੇ ਮੁਕਾਬਲੇ ਦੌਰਾਨ ਲਗਾਤਾਰ ਸ਼ਾਨਦਾਰ ਪ੍ਰਦਰਸ਼ਨ ਕਰਦੇ ਹੋਏ ਫਾਈਨਲ ਵਿਚ ਜਿੱਤ ਦਰਜ ਕੀਤੀ | ਡਾ. ਵਰਮਾ ਅਗਰਵਾਲ ਹਸਪਤਾਲ ਰੂਪਨਗਰ ਨਾਲ ਸੰਬੰਧਿਤ ਪ੍ਰਸਿੱਧ ਡਾਕਟਰ ਡਾ. ਰਾਜੀਵ ਅਗਰਵਾਲ ਦੇ ਪਤਨੀ ਵੀ ਹਨ | ਉਨਾਂ ਦੀ ਇਸ ਉਪਲਬਧੀ ਨੂੰ ਸਥਾਨਕ ਮੈਡੀਕਲ ਭਾਈਚਾਰੇ ਵਲੋਂ ਖ਼ੂਬ ਸਰਾਹਿਆ ਜਾ ਰਿਹਾ ਹੈ ਅਤੇ ਇਸਨੂੰ ਪੇਸ਼ੇ ਦੇ ਨਾਲ ਨਾਲ ਖੇਡਾਂ ਵਿਚ ਸੰਤੁਲਨ ਦਾ ਸ਼ਾਨਦਾਰ ਉਦਾਹਰਨ ਕਰਾਰ ਦਿੱਤਾ ਹੈ | ਡਾ. ਵਰਮਾ ਨੇ ਆਪਣੀ ਸਫਲਤਾ ਲਈ ਆਯੋਜਕਾਂ ਅਤੇ ਆਪਣੇ ਸਮਰਥਕਾਂ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਇਹ ਅਨੁਭਵ ਬਹੁਤ ਹੀ ਮੁਕਾਬਲਾ ਤਮਕ ਅਤੇ ਪ੍ਰੇਰਣਾਦਾਇਕ ਰਿਹਾ | ਉਨਾਂ ਦੀ ਇਹ ਕਾਮਯਾਬੀ ਹੋਰ ਡਾਕਟਰਾਂ ਅਤੇ ਨੌਜਵਾਨਾਂ ਲਈ ਪੇ੍ਰਰਨਾ ਸਰੂਪ ਹੈ ਅਤੇ ਸਿਹਤਮੰਦ ਜੀਵਨ ਸ਼ੈਲੀ ਦੀ ਮਹੱਤਤਾ ਨੂੰ ਵੀ ਉਭਾਰਦੀ ਹੈ |