ਬਾਬਾ ਬਕਾਲਾ ਸਾਹਿਬ, 14 ਫਰਵਰੀ (ਸ਼ੇਲਿੰਦਰਜੀਤ ਸਿੰਘ ਰਾਜਨ)-ਅੱਜ ਇੱਥੇ ਅਧਿਆਪਕ ਦਲ ਪੰਜਾਬ ਦੇ ਜਥੇਬੰਦਕ ਸਕੱਤਰ ਸ: ਹਰਿੰਦਰਜੀਤ ਸਿੰਘ ਜਸਪਾਲ ਨੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ 2008 ਤੋਂ ਪਹਿਲਾਂ ਭਰਤੀ ਹੋਏ ਅਧਿਆਪਕ ਤਕਰੀਬਨ ਬਹੁ-ਗਿਣਤੀ ਉਹ ਹਨ ਜੋ ਕਿ ਲਿਖਤੀ ਟੈਸਟ ਪਾਸ ਕਰਕੇ ਹੀ ਈ.ਟੀ.ਟੀ. ਜਾਂ ਬੀ-ਐੱਡ ਦਾ ਕੋਰਸ ਕਰਕੇ ਅਧਿਆਪਨ ਖੇਤਰ ਵਿਚ ਆਏ ਹਨ | ਇਨ੍ਹਾਂ ਅਧਿਆਪਕਾਂ ਉੱਪਰ ਟੈੱਟ ਕਿਸੇ ਵੀ ਤਰ੍ਹਾਂ ਜ਼ਰੂਰੀ ਨਹੀਂ ਹੋਣਾ ਚਾਹੀਦਾ | ਸਮੂਹ ਅਧਿਆਪਕ ਵਰਗ ਨੂੰ ਇਸ ਬੇ-ਲੋੜੇ ਟੈਸਟ ਦਾ ਵਿਰੋਧ ਕਰਨਾ ਚਾਹੀਦਾ | ਵਿਭਾਗ ਅਤੇ ਸਰਕਾਰ ਨੂੰ ਇਹ ਟੈਸਟ ਮੂਲੋਂ ਰੱਦ ਕਰਕੇ ਪਹਿਲਾਂ ਦੀ ਤਰ੍ਹਾਂ ਆਮ ਰੁਟੀਨ ਵਿਚ ਹੀ ਪ੍ਰਮੋਸ਼ਨਾਂ ਕਰਨੀਆਂ ਚਾਹੀਦੀਆਂ ਹਨ | ਕੋਈ ਵੀ ਟੈਸਟ ਕੋਰਸ ਲਈ ਜ਼ਰੂਰੀ ਹੁੰਦਾ ਹੈ, ਨਾ ਕਿ ਕਿਸੇ ਵੀ ਨੌਕਰੀ ਵਿਚ ਭਰਤੀ ਹੋਣ ਲਈ | ਸੈਂਟਰ ਸਰਕਾਰ ਨੂੰ ਵੀ ਇਸ ਸੁਪਰੀਮ ਕੋਰਟ ਦੇ ਫੈਸਲੇ ਖਿਲਾਫ ਮਤਾ ਪਾਸ ਕਰਨਾ ਚਾਹੀਦਾ ਅਤੇ ਦੇਸ਼ ਦੇ ਲੱਖਾਂ ਅਧਿਆਪਕਾਂ ਨੂੰ ਰਾਹਤ ਦੇਣੀ ਚਾਹੀਦੀ ਹੈ | ਜੇਕਰ ਸਰਕਾਰ ਇਸ ਫੈਸਲੇ ਨੂੰ ਰੱਦ ਨਹੀਂ ਕਰਦੀ ਤਾਂ ਅਧਿਆਪਕ ਦਲ ਪੰਜਾਬ ਟੱੈਟ ਦੇ ਵਿਰੁੱਧ ਸੰਘਰਸ਼ ਕਰੇਗਾ | ਪਰ ਕੋਈ ਵੀ ਅਧਿਆਪਕ ਟੈੱਟ ਦਾ ਟੈਸਟ ਦੇਣ ਲਈ ਸਹਿਮਤੀ ਨਹੀਂ ਦੇਵੇਗਾ | ਸ. ਜਸਪਾਲ ਨੇ ਸਮੂਹ ਅਧਿਆਪਕ ਵਰਗ ਨੂੰ ਅਪੀਲ ਕੀਤੀ ਕਿ ਆਪਸੀ ਸਹਿਯੋਗ ਅਤੇ ਤਾਲਮੇਲ ਨਾਲ ਇਹ ਲੜਾਈ ਲੜੀ ਜਾਵੇ |