ਚੌਕ ਮਹਿਤਾ, 11 ਮਈ (ਜਗਦੀਸ਼ ਸਿੰਘ ਬਮਰਾਹ)-ਬੀਤੀ ਰਾਤ ਇਲਾਕੇ ਵਿਚ ਆਏ ਖਤਰਨਾਕ ਤੂਫ਼ਾਨ ਕਾਰਨ ਜਿੱਥੇ ਵੱਡੇ-ਵੱਡੇ ਦਰਖਤ ਜੜ੍ਹਾਂ ਤੋਂ ਹੀ ਪੁੱਟੇ ਗਏ, ਮੱਕਈ ਦੀ ਫ਼ਸਲ ਦਾ ਬਹੁਤ ਭਾਰੀ ਨੁਕਸਾਨ ਹੋਇਆ, ਉੱਥੇ ਹੀ ਸਬ ਡਿਵੀਜ਼ਨ ਮਹਿਤਾ ਚੌਂਕ ਪਾਵਰਕਾਮ ਦੇ ਅਧੀਨ ਚੱਲ ਰਹੇ ਵੱਖ-ਵੱਖ ਫੀਡਰਾਂ ਦਾ ਵੀ ਬਹੁਤ ਭਾਰੀ ਨੁਕਸਾਨ ਹੋਇਆ ਹੈ | ਪਾਵਰਕਾਮ ਦੇ ਐੱਸ. ਡੀ. ਓ. ਹਰਭਿੰਦਰ ਸਿੰਘ ਚਾਹਲ ਵਲੋਂ ਪ੍ਰਾਪਤ ਜਾਣਕਾਰੀ ਅਨੁਸਾਰ ਜੇ. ਈ. ਅਮਰਜੀਤ ਸਿੰਘ ਦੇ 35 ਪੋਲ ਟੁੱਟ ਗਏ ਅਤੇ 7 ਟਰਾਂਸਫਾਰਮ ਡਿੱਗੇ, ਜੇ. ਈ. ਬਲਵਿੰਦਰ ਕੁਮਾਰ ਦੇ 20 ਪੋਲ ਟੁੱਟੇ, ਜੇ. ਈ. ਗੁਰਜੀਤ ਸਿੰਘ ਦੇ 20 ਪੋਲ ਟੁੱਟੇ ਅਤੇ 7 ਟ੍ਰਾਂਸਫਾਰਮ ਡਿੱਗੇ, ਜੇ. ਈ. ਸਰਬਜੀਤ ਸਿੰਘ ਦੇ 37 ਪੋਲ ਟੁੱਟੇ ਅਤੇ 5 ਟਰਾਂਸਫਾਰਮ ਡਿੱਗੇ, ਜੇ. ਈ. ਨਰਿੰਦਰ ਪਾਲ ਸਿੰਘ ਦੇ 10 ਪੋਲ ਟੁੱਟ ਗਏ ਹਨ | ਐੱਸ. ਡੀ. ਓ. ਹਰਭਿੰਦਰ ਸਿੰਘ ਚਾਹਲ ਨੇ ਦੱਸਿਆ ਕਿ ਅਰਬਨ ਫੀਡਰਾਂ ਦੀ ਸਪਲਾਈ ਤਾਂ ਅੱਜ ਹੀ ਚਾਲੂ ਕਰ ਦਿੱਤੀ ਗਈ ਹੈ ਤੇ ਖੇਤੀਬਾੜੀ ਵਾਲੇ ਫੀਡਰਾਂ ਦੀ ਸਪਲਾਈ ਨੂੰ ਬਹਾਲ ਕਰਨ ਵਿਚ ਕੁਝ ਸਮਾਂ ਲੱਗ ਸਕਦਾ ਹੈ |
