ਨਵੀਂ ਦਿੱਲੀ, 13 ਫਰਵਰੀ (ਪੀ. ਟੀ. ਆਈ.)-ਦਿੱਲੀ ਦੀ ਇਕ ਅਦਾਲਤ ਨੇ ਸ਼ੁੱਕਰਵਾਰ ਨੂੰ ਰਾਸ਼ਟਰੀ ਜਾਂਚ ਏਜੰਸੀ ਨੂੰ 10 ਨਵੰਬਰ, 2025 ਨੂੰ ਲਾਲ ਕਿਲ੍ਹੇ ਨੇੜੇ ਹੋਏ ਧਮਾਕੇ ਦੇ ਸੰਬੰਧ 'ਚ ਆਪਣੀ ਜਾਂਚ ਪੂਰੀ ਕਰਨ ਲਈ 45 ਦਿਨ ਹੋਰ ਦਿੱਤੇ ਹਨ | ਪਟਿਆਲਾ ਹਾਊਸ ਅਦਾਲਤਾਂ ਦੇ ਪਿ੍ੰਸੀਪਲ ਜ਼ਿਲ੍ਹਾ ਤੇ ਸੈਸ਼ਨ ਜੱਜ ਪੀਤਾਂਬਰ ਦੱਤ ਨੇ ਐਨ. ਆਈ. ਏ. ਦੀ ਪਟੀਸ਼ਨ 'ਤੇ ਵਾਧੂ ਸਮਾਂ ਦਿੱਤਾ, ਜਿਸ ਵਿਚ ਮੁਲਜ਼ਮਾਂ ਦੇ ਵਿੱਤੀ ਤੇ ਡਿਜੀਟਲ ਲਿੰਕਾਂ ਦੀ ਹੋਰ ਜਾਂਚ ਦੇ ਆਧਾਰ 'ਤੇ 90 ਦਿਨਾਂ ਦਾ ਵਾਧਾ ਕਰਨ ਦੀ ਮੰਗ ਕੀਤੀ ਗਈ ਸੀ | ਅਦਾਲਤ ਨੇ ਸੱਤ ਮੁਲਜ਼ਮਾਂ ਅਮੀਰ ਰਸ਼ੀਦ ਮੀਰ, ਜਸਿਰ ਬਿਲਾਲ ਵਾਨੀ, ਮੁਫਤੀ ਇਰਫਾਨ ਅਹਿਮਦ ਵਾਗੇ, ਡਾ. ਮੁਜ਼ਾਮਿਲ ਸ਼ਕੀਲ ਗਨੀ, ਡਾ. ਅਦੀਲ ਅਹਿਮਦ ਰਾਥਰ, ਡਾ. ਸ਼ਾਹੀਨ ਸਈਦ ਤੇ ਸੋਇਆਬ ਦੀ ਨਿਆਂਇਕ ਹਿਰਾਸਤ 13 ਮਾਰਚ ਤੱਕ ਵਧਾ ਦਿੱਤੀ |
