ਪਾਕਿ ਫ਼ੌਜ ਦੀ ਸਰਪ੍ਰਸਤੀ ’ਚ ਵਧਦਾ ਫੁੱਲਦਾ ਰਿਹਾ ਜਮਾਤ-ਉਲ-ਅਹਰਾਰ ਸੰਗਠਨ

ਅੰਮ੍ਰਿਤਸਰ, 29 ਜੂਨ (ਸੁਰਿੰਦਰ ਕੋਛੜ)-ਪਾਕਿਸਤਾਨ ਦੀ ਆਰਥਿਕ ਰਾਜਧਾਨੀ ਕਰਾਚੀ ‘ਚ ਭੀੜ-ਭਾੜ ਵਾਲੀ ਯੂਨੀਵਰਸਿਟੀ ਰੋਡ ’ਤੇ ਪਾਕਿਸਤਾਨ ਰੇਂਜਰਜ਼ ਦੇ ਹੈੱਡਕੁਆਟਰ ’ਤੇ ਬੀਤੇ ਦਿਨ ਹੋਏ ਸ਼ਕਤੀਸ਼ਾਲੀ ਧਮਾਕੇ ਲਈ ਪਾਕਿਸਤਾਨੀ ਫ਼ੌਜ ਦੇ ਮੀਡੀਆ ਵਿੰਗ ਇੰਟਰ-ਸਰਵਿਸਿਜ਼ ਪਬਲਿਕ ਰਿਲੇਸ਼ਨਜ਼ (ਆਈ. ਐੱਸ. ਪੀ. ਆਰ.) ਨੇ ਜਮਾਤ-ਉਲ-ਅਹਰਾਰ ਅੱਤਵਾਦੀ ਸੰਗਠਨ ਨੂੰ ਜ਼ਿੰਮੇਵਾਰ ਦੱਸਦਿਆਂ ਇਸ ਦੇ ਭਾਰਤ ਨਾਲ ਸੰਬੰਧਿਤ ਹੋਣ ਦੇ ਦੋਸ਼ ਲਗਾਏ ਹਨ । ਫ਼ੌਜ ਦਾ ਦਾਅਵਾ ਹੈ ਕਿ ਇਹ ਹਮਲਾ ਜਮਾਤ-ਉਲ-ਅਹਰਾਰ ਦੇ ਖੁੱਲ੍ਹਾਫਾ-ਏ-ਰਸ਼ੀਦੀਨ ਇਸਤਿਸ਼ਾਦੀ ਬ੍ਰਿਗੇਡ ਨਾਮਕ ਆਤਮਘਾਤੀ ਦਸਤੇ ਦੁਆਰਾ ਕੀਤਾ ਗਿਆ । ਇਹ ਸਮੂਹ ਪਾਕਿਸਤਾਨੀ ਫ਼ੌਜ ਅਤੇ ਖ਼ੁਫ਼ੀਆ ਏਜੰਸੀ ਆਈ.ਐੱਸ.ਆਈ. ਦੀ ਸਰਪ੍ਰਸਤੀ ’ਚ ਵਧਦਾ ਫੁੱਲਦਾ ਰਿਹਾ ਹੈ ਅਤੇ ਇਹ ਪਾਕਿ ਦੇ ਸੂਬਾ ਖ਼ੈਬਰ ਪਖਤੂਨਖਵਾ ’ਚ ਸਰਗਰਮ ਹੈ । ਪਾਕਿ ਹੁਣ ਇਸ ਸੰਗਠਨ ਦੇ ਭਾਰਤ ਨਾਲ ਸੰਬੰਧਿਤ ਹੋਣ ਦੇ ਦੋਸ਼ ਲਗਾ ਰਿਹਾ ਹੈ। ਇਸ ਸੰਗਠਨ ਨਾਲ ਜੁੜੇ ਲੜਾਕੇ ਪਾਕਿ ਸਰਹੱਦੀ ਇਲਾਕਿਆਂ ‘ਚ ਸਰਗਰਮ ਹਨ ਅਤੇ ਸਮੇਂ-ਸਮੇਂ ‘ਤੇ ਆਪਣੀਆਂ ਗਤੀਵਿਧੀਆਂ ਨੂੰ ਅੰਜਾਮ ਦਿੰਦੇ ਹਨ।