ਸਮਾਲਸਰ, 10 ਜੂਨ (ਗੁਰਜੰਟ ਕਲਸੀ ਲੰਡੇ)-ਭਾਰਤੀ ਥਲ ਸੈਨਾ ਦੇ 3 ਸਿੱਖ ਲਾਈ ਦਾ ਰੈਜਮਿੰਟ ਸੈਂਟਰ ਫਤਹਿਗੜ (ਉੱਤਰ ਪ੍ਰਦੇਸ਼) ਦੇ ਨੌਜਵਾਨ ਹੌਲਦਾਰ ਕੁਲਵੰਤ ਸਿੰਘ ਆਪਣੀ 20 ਸਾਲ ਦੀ ਭਾਰਤੀ ਸੈਨਾ ਵਿਚ ਸੇਵਾ ਨਿਭਾਉਣ ਤੋਂ ਬਾਅਦ ਆਪਣੇ ਪਿੰਡ ਪਹੁੰਚੇ | ਉਨ੍ਹਾਂ ਦਾ ਪਿੰਡ ਪਹੁੰਚਣ ਤੇ ਪਿੰਡ ਵਾਸੀਆਂ ਵਲੋਂ ਸ਼ਾਨਦਾਰ ਢੰਗ ਨਾਲ ਸਵਾਗਤ ਕੀਤਾ ਗਿਆ | ਕੁਲਵੰਤ ਸਿੰਘ ਇਕ ਮਜ਼ਦੂਰ ਪਰਿਵਾਰ ਨਾਲ ਸੰਬੰਧ ਰੱਖਦੇ ਹਨ | ਉਨ੍ਹਾਂ ਦੱਸਿਆ ਕਿ ਉਹ ਇਸ ਮੁਕਾਮ ਤੇ ਪਹੁੰਚਣ ਲਈ ਬੜੀਆਂ ਤੰਗੀਆਂ, ਤੁਰਸ਼ੀਆਂ, ਔਕੜਾਂ ਦਾ ਸਾਹਮਣਾ ਕੀਤਾ | ਉਨ੍ਹਾਂ ਨੇ ਦੇਸ਼ ਵਿਚ ਸ੍ਰੀਨਗਰ, ਜੰਮੂ, ਗੁਹਾਟੀ, ਆਸਾਮ, ਸਿੱਕਮ, ਮਊ ਆਦਿ ਵੱਖ-ਵੱਖ ਥਾਵਾਂ 'ਤੇ ਸੇਵਾ ਨਿਭਾਈ | ਪਿੰਡ ਪਹੁੰਚਣ ਉਪਰੰਤ ਸਭ ਤੋਂ ਪਹਿਲਾਂ ਉਨ੍ਹਾਂ ਗੁਰਦੁਆਰਾ ਸਾਹਿਬ ਮੱਥਾ ਟੇਕਿਆ | ਪਿੰਡ ਵਾਸੀਆਂ ਨੇ ਉਨ੍ਹਾਂ ਦੇ ਉਜਲ ਭਵਿੱਖ ਦੀ ਕਾਮਨਾ ਕੀਤੀ | ਉਨ੍ਹਾਂ ਦੇ ਪਿਤਾ ਨੇ ਮੌਕੇ ਤੇ ਹਾਜ਼ਰ ਸਮੂਹ ਗ੍ਰਾਮ ਪੰਚਾਇਤਾਂ, ਮੁਹਤਬਰਾਂ, ਨੰਬਰਦਾਰਾਂ, ਸਰਪੰਚਾਂ, ਬਲਾਕ ਸੰਮਤੀ ਮੈਂਬਰਾਂ ਆਦਿ ਦਾ ਸ਼ੁਕਰੀਆ ਅਦਾ ਕੀਤਾ |
