ਰਾਮਾਂ ਮੰਡੀ, 29 ਅਪ੍ਰੈਲ (ਤਰਸੇਮ ਸਿੰਗਲਾ) ਕਾਨੂੰਨੀ ਸਿਸਟਮ ਤੋਂ ਪ੍ਰੇਸ਼ਾਨ ਕੁਲਵਿੰਦਰ ਸਿੰਘ (45) ਪੁੱਤਰ ਦਰਸ਼ਨ ਸਿੰਘ ਵਾਸੀ ਨਵੀਂ ਬਸਤੀ, ਬਾਘਾ ਰੋਡ, ਗਲੀ ਨੰਬਰ 2 ਰਾਮਾਂ ਮੰਡੀ ਨੇ ਅੱਜ ਉਸ ਸਮੇਂ ਦਿਨਦਿਹਾੜੇ ਆਪਣੇ ਘਰ ਵਿਚ ਛੱਤ ਨਾਲ ਲਟਕ ਕੇ ਆਪਣੀ ਜੀਵਨ ਲੀਲਾ ਖਤਮ ਕਰ ਲਈ, ਜਦੋਂ ਉਹ ਘਰ ਵਿੱਚ ਇਕੱਲਾ ਸੀ | ਮਿ੍ਤਕ ਕੁਲਵਿੰਦਰ ਸਿੰਘ ਦੀ ਪਤਨੀ ਨੇ ਪੱਤਰਕਾਰਾਂ ਨੂੰ ਦੱਸਿਆ ਕਿ ਮੇਰਾ ਪਤੀ ਬਠਿੰਡਾ ਤੋਂ ਰਾਮਾਂ ਆਪਣੀ ਨਿੱਜੀ ਗੱਡੀ ਰਾਹੀਂ ਰੋਜ਼ਾਨਾ ਕਿਰਾਏ ਦਾ ਸਮਾਨ ਢੋਣ ਦਾ ਕੰਮ ਕਰਦਾ ਸੀ | ਕਰੀਬ ਇਕ ਸਾਲ ਪਹਿਲਾਂ ਉਸਨੇ ਆਪਣੀ ਗੱਡੀ ਵੇਚ ਦਿੱਤੀ ਸੀ, ਜਦੋਂਕਿ ਗੱਡੀ ਦੀ ਆਰ.ਸੀ.ਇੱਕ ਚਲਾਨ ਕੱਟੇ ਜਾਣ ਕਾਰਨ ਫਰੀਦਕੋਟ ਥਾਣੇ ਵਿਚ ਬੰਦ ਸੀ | ਜਿਸ ਵਿਅਕਤੀ ਨੂੰ ਮੇਰੇ ਪਤੀ ਨੇ ਗੱਡੀ ਵੇਚੀ ਸੀ ਉਹ ਲਗਾਤਾਰ ਆਰ.ਸੀ. ਦੀ ਮੰਗ ਕਰ ਰਿਹਾ ਸੀ ਅਤੇ ਮੇਰੀ ਪਤੀ ਨੂੰ ਤੰਗ ਪ੍ਰੇਸਾਨ ਵੀ ਕਰ ਰਿਹਾ ਸੀ | ਮੇਰੇ ਪਤੀ ਨੇ ਆਰ.ਸੀ.ਲੈਣ ਲਈ ਫ਼ਰੀਦਕੋਟ ਕਚੈਹਰੀਆਂ ਦੇ ਕਈ ਚੱਕਰ ਕੱਟੇ, ਪਰ ਆਰ.ਸੀ.ਨਹੀਂ ਮਿਲੀ | ਜਿਸ ਤੋਂ ਪ੍ਰੇਸ਼ਾਨ ਹੋ ਕੇ ਮੇਰੀ ਪਤੀ ਨੇ ਅੱਜ ਫਾਹਾ ਲੈ ਕੇ ਖੁਦਕਸ਼ੀ ਕਰ ਲਈ | ਮੇਰੀ ਪਤੀ ਵੱਲੋਂ ਖੁਦਕਸ਼ੀ ਕਰਨ ਤੋਂ ਬਾਅਦ ਲਾਸ਼ ਕੋਲੋਂ ਘਰ ਵਿੱਚੋਂ ਉਸਦਾ ਲਿਖਿਆ ਇੱਕ ਇੱਕ ਸੁਸਾਈਡ ਨੋਟ ਵੀ ਮਿਲਿਆ ਹੈ | ਸਮਾਚਾਰ ਲਿਖੇ ਜਾਣ ਤੱਕ ਪੁਲਿਸ ਮਾਮਲੇ ਦੀ ਜਾਂਚ ਕਰ ਰਹੀ ਸੀ | ਮਿ੍ਤਕ ਆਪਣੇ ਪਿੱਛੇ ਆਪਣੀ ਪਤਨੀ ਅਤੇ ਇੱਕ ਲੜਕਾ ਛੱਡ ਗਿਆ ਹੈ |