ਬਾਲਿਆਂਵਾਲੀ, 18 ਮਈ (ਕੁਲਦੀਪ ਮਤਵਾਲਾ)-ਹਰ ਛਿਮਾਹੀ ਤੇ ਪਿੰਡ ਮੰਡੀ ਕਲਾਂ ਦੀਆਂ ਸੰਗਤਾਂ ਵਲੋਂ ਗੁਰਦੁਆਰਾ ਲੰਗਰ ਸਾਹਿਬ ਨੰਦੇੜ ਸਾਹਿਬ ਰੋਡ (ਨਗੀਨਾ ਘਾਟ) ਲਈ ਹਾੜ੍ਹੀ ਅਤੇ ਸਾਉਣੀ ਦੀ ਫ਼ਸਲ ਦੀ ਰਸਦਾਂ ਇਕੱਠੀਆਂ ਕਰਕੇ ਸੱਚ ਖੰਡ ਸ੍ਰੀ ਹਜ਼ੂਰ ਸਾਹਿਬ ਲਈ ਭੇਜੀਆਂ ਜਾਂਦੀਆਂ ਹਨ | ਇਸ ਅਸਥਾਨ 'ਤੇ ਸੰਤ ਬਾਬਾ ਨਰਿੰਦਰ ਸਿੰਘ ਅਤੇ ਸੰਤ ਬਾਬਾ ਬਲਵਿੰਦਰ ਸਿੰਘ ਸੇਵਾ ਕਰ ਰਹੇ ਹਨ | ਪਿੰਡ ਦੀਆਂ ਸਮੂਹ ਸੰਗਤਾਂ ਨੇ ਦੱਸਿਆ ਕਿ ਸਾਰਾ ਸਾਲ ਹੀ ਸੰਗਤਾਂ ਵੱਡੀ ਗਿਣਤੀ 'ਚ ਸ੍ਰੀ ਹਜ਼ੂਰ ਸਾਹਿਬ ਹਜ਼ੂਰ ਸਾਹਿਬ ਦਰਸ਼ਨਾਂ ਲਈ ਜਾਂਦੀਆਂ ਹਨ | ਉੱਥੇ ਸੰਗਤਾਂ ਦੇ ਰਹਿਣ-ਸਹਿਣ ਲਈ ਏ. ਸੀ. ਧਰਮਸ਼ਾਲਾਵਾਂ ਬਣੀਆਂ ਹਨ ਅਤੇ ਸੰਗਤਾਂ ਲਈ 24 ਘੰਟੇ ਲੰਗਰਾਂ ਦਾ ਪ੍ਰਬੰਧ ਹੁੰਦਾ ਹੈ ਜਦਕਿ ਜੋੜ ਮੇਲਿਆਂ 'ਤੇ ਵੱਖ-ਵੱਖ ਤਰ੍ਹਾਂ ਦੇ ਪਕਵਾਨ ਸੰਗਤਾਂ ਦੇ ਲਈ ਪਕਵਾਏ ਜਾਂਦੇ ਹਨ | ਇਸ ਲਈ ਸੰਗਤਾਂ ਵਲੋਂ ਇਸ ਅਸਥਾਨ ਲਈ ਆਪਣੀ ਸ਼ਰਧਾ ਮੁਤਾਬਿਕ ਹਰ ਛਿਮਾਹੀ ਤੇ ਕਣਕ ਅਤੇ ਝੋਨੇ ਦੀ ਫ਼ਸਲ ਦਾ ਦਸਵੰਧ ਕੱਢਕੇ ਭੇਜਿਆ ਜਾਂਦਾ ਹੈ ਤੇ ਇਸ ਵਾਰ ਮੰਡੀ ਕਲਾਂ ਦੀ ਸੰਗਤ ਵਲੋਂ 71 ਕੁਇੰਟਲ ਕਣਕ ਦੀ ਰਸਦ ਇਕੱਠੀ ਕਰਕੇ ਗੁਰਦੁਆਰਾ ਲੰਗਰ ਸਾਹਿਬ ਟਰੱਸਟ ਨੰਦੇੜ ਸਾਹਿਬ ਰੋਡ ਨਗੀਨਾ ਘਾਟ ਹਜ਼ੂਰ ਸਾਹਿਬ ਲਈ ਭੇਜੀ ਗਈ |
