ਮਾਛੀਵਾੜਾ ਸਾਹਿਬ, 2 ਮਾਰਚ (ਮਨੋਜ ਕੁਮਾਰ)-ਸਤਲੁਜ ਦਰਿਆ 'ਤੇ ਬਣੇ ਮਾਛੀਵਾੜਾ ਤੋਂ ਨਵਾਂਸ਼ਹਿਰ ਨੂੰ ਜੋੜਦੇ ਪੁਲ ਦੇ ਰਾਹੋਂ ਵਾਲੇ ਪਾਸੇ ਬਣੀ ਕਈ ਸਾਲਾਂ ਪੁਰਾਣੀ ਪੁਲਿਸ ਚੌਂਕੀ ਨੂੰ ਫਿਲਹਾਲ ਬੰਦ ਕਰ ਦਿੱਤਾ ਗਿਆ ਹੈ | ਇਹ ਪੁਲਿਸ ਚੌਂਕੀ ਪੁਲ ਪਾਰ ਕਰਦੇ ਹੀ ਕੁੱਝ ਕਦਮਾਂ ਦੀ ਦੂਰੀ 'ਤੇ ਸਥਿਤ ਸੀ | ਇਸ ਦਾ ਅਸਲ ਕਾਰਨ ਪਿਛਲੇ ਦਿਨੀਂ ਗੁਰਦਾਸਪੁਰ ਵਿਚ ਵਾਪਰੇ ਪੁਲਿਸ ਮੁਲਾਜ਼ਮਾਂ ਦੇ ਹੱਤਿਆਕਾਂਡ ਤੋਂ ਬਾਦ ਸੀਨੀਅਰ ਅਧਿਕਾਰੀਆਂ ਨੇ ਸੁਰੱਖਿਆ ਦੇ ਮੱਦੇਨਜ਼ਰ ਕਿਹਾ ਜਾ ਰਿਹਾ ਹੈ | ਪਰ ਇਸ ਚੌਂਕੀ ਦੇ ਬੰਦ ਹੋਣ ਨਾਲ ਸ਼ਰਾਰਤੀ ਅਨਸਰਾਂ ਦੇ ਹੌਸਲੇ ਪਹਿਲਾਂ ਨਾਲੋਂ ਵੀ ਹੋਰ ਬੁਲੰਦ ਹੋ ਜਾਣਗੇ | ਹਾਲਾਂਕਿ ਪੁਲਿਸ ਚੌਂਕੀ ਹੋਣ ਦੇ ਬਾਵਜੂਦ ਵੀ ਗੈਰ ਕਾਨੂੰਨੀ ਮਾਈਨਿੰਗ ਆਪਣੇ ਪੂਰੇ ਜੋਬਨ 'ਤੇ ਰਹਿੰਦੀ ਸੀ ਤੇ ਸਾਰੀ ਰਾਤ ਰੇਤੇ ਨਾਲ ਭਰੇ ਟਿੱਪਰ ਆਰ ਪਾਰ ਹੁੰਦੇ ਰਹਿੰਦੇ ਸਨ | ਪਰ ਕਿਤੇ ਨਾ ਕਿਤੇ ਹੋਰ ਸ਼ਰਾਰਤੀ ਤੱਤਾਂ ਨੂੰ ਇਸ ਦਾ ਖ਼ੌਫ਼ ਵੀ ਸੀ | ਹਾਲਾਂਕਿ ਇੱਥੇ ਤਾਇਨਾਤ ਮੁਲਾਜ਼ਮਾਂ ਨੂੰ ਇਸ ਚੌਂਕੀ ਤੋਂ ਥੋੜੀ ਦੂਰ ਪਹਿਲਾਂ ਬਣੀ ਪੁਲਿਸ ਚੌਂਕੀ ਵਿਚ ਸ਼ਿਫ਼ਟ ਕਰ ਦਿੱਤਾ ਗਿਆ ਹੈ |
