ਮਾਛੀਵਾੜਾ ਸਾਹਿਬ, 18 ਮਈ (ਮਨੋਜ ਕੁਮਾਰ)-ਕੇਂਦਰ ਸਰਕਾਰ ਵਲੋਂ ਦੇਸ਼ ਅੰਦਰ ਚੱਲ ਰਹੀ ਜਨਗਣਨਾ ਨੂੰ ਲੈ ਕੇ ਨਜ਼ਦੀਕੀ ਪਿੰਡ ਗੜੀ ਬੇਟ ਵਿਖੇ ਸ੍ਰੀ ਗੁਰੂ ਰਵਿਦਾਸ ਧਰਮਸ਼ਾਲਾ ਵਿਖੇ ਰਵਿਦਾਸੀਆ ਭਾਈਚਾਰੇ ਨਾਲ ਸਬੰਧਿਤ ਪਰਮਿੰਦਰ ਰੱਲ ਵਲੋਂ ਵਿਚਾਰ-ਵਟਾਂਦਰਾ ਕੀਤਾ ਗਿਆ | ਪਰਮਿੰਦਰ ਰੱਲ ਨੇ ਪੈੱ੍ਰਸ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਦੇਸ਼ ਅੰਦਰ ਜਾਤੀ ਨੂੰ ਲੈ ਕੇ ਚੱਲ ਰਹੀ ਜਨਗਣਨਾ ਸਾਡੇ ਭਾਈਚਾਰੇ ਲਈ ਬਹੁਤ ਹੀ ਮਹੱਤਵਪੂਰਨ ਹੈ | ਉਨ੍ਹਾਂ ਨੇ ਕਿਹਾ ਕਿ ਇਸ ਜਨਗਣਨਾ ਵਿਚ ਵੱਖ-ਵੱਖ ਜਾਤੀਆਂ ਲਈ ਕਾਲਮ ਬਣਾਏ ਗਏ ਹਨ | ਉਸ ਵਿਚ ਸਾਡੇ ਸਮਾਜ ਦੇ ਆਗੂਆਂ ਅਤੇ ਸੱਚਖੰਡ ਬੱਲਾਂ ਵਲੋਂ ਵੀ ਅਨੇਕਾਂ ਹੀ ਚਿੱਠੀਆਂ ਪਾਈਆਂ ਗਈਆਂ ਹਨ ਕਿ ਸਾਡੇ ਰਵਿਦਾਸੀਆ ਧਰਮ ਦਾ ਵੀ ਇੱਕ ਕਾਲਮ ਵੱਖਰਾ ਹੋਵੇ ਤਾਂ ਕਿ ਇਸ ਜਨਗਣਨਾ ਵਿਚ ਸਾਡਾ ਸਮਾਜ ਕਾਲਮ ਵਿਚ ਰਵਿਦਾਸੀਆ ਧਰਮ ਹੀ ਲਿਖ ਸਕੇ | ਉਨ੍ਹਾਂ ਕਿਹਾ ਕਿ ਅਸੀਂ ਗੁਰੂ ਰਵਿਦਾਸ ਜੀ ਨੂੰ ਮੰਨਣ ਵਾਲੇ ਹਾਂ, ਇਸ ਲਈ ਸਾਡਾ ਧਰਮ ਰਵਿਦਾਸੀਆ ਧਰਮ ਹੀ ਹੈ | ਉਨ੍ਹਾਂ ਨੇ ਸਮਾਜ ਦੇ ਲੋਕਾਂ ਨੂੰ ਅਪੀਲ ਕਰਦਿਆਂ ਕਿਹਾ ਕਿ ਇਸ ਵਾਰ ਜੋ ਜਨਗਣਨਾ ਹੋ ਰਹੀ ਹੈ, ਉਸ ਵਿਚ ਸਿਰਫ਼ ਰਵਿਦਾਸੀਆ ਧਰਮ ਹੀ ਲਿਖਿਆ ਜਾਵੇ |
