ਧੂਰੀ, 7 ਜੂਨ (ਲਖਵੀਰ ਸਿੰਘ ਧਾਂਦਰਾ) - ਪੰਜਾਬ ਪ੍ਰਧਾਨਗੀ ਦੇ ਗੁਮਾਨ 'ਚ ਕੇਵਲ ਸਿੰਘ ਢਿੱਲੋਂ ਨੂੰ ਅਕਾਲੀ ਆਗੂਆਂ ਪ੍ਰਤੀ ਮਾਣ ਮਰਿਆਦਾ ਰੱਖਣੀ ਚਾਹੀਦੀ ਸੀ, ਇਨ੍ਹਾਂ ਵਿਚਾਰਾਂ ਦਾ ਪ੍ਰਗਟਾਵਾ ਸ਼੍ਰੋਮਣੀ ਅਕਾਲੀ ਦਲ ਬਾਦਲ ਦੇ ਹਲਕਾ ਧੂਰੀ ਦੇ ਇੰਚਾਰਜ ਰਣਜੀਤ ਸਿੰਘ ਰੰਧਾਵਾ ਕਾਤਰੋਂ ਕਰਦਿਆਂ ਕਿਹਾ ਕਿ ਬਰਨਾਲਾ ਦੇ ਮਰਹੂਮ ਅਕਾਲੀ ਆਗੂ ਮਲਕੀਤ ਸਿੰਘ ਕੀਤੂ, ਜਿਨ੍ਹਾਂ ਆਪਣੀ ਮਿਹਨਤ ਸਦਕਾ ਹਲਕਾ ਬਰਨਾਲਾ ਵਿਚ ਆਪਣਾ ਆਧਾਰ ਬਣਾਇਆ, ਉਹ ਵੱਖ-ਵੱਖ ਸੰਸਥਾਵਾਂ ਦੇ ਮੁਖੀ ਰਹੇ, ਉਨ੍ਹਾਂ ਦੇ ਹੁੰਦਿਆਂ ਕੋਈ ਵੀ ਆਗੂ, ਉਨ੍ਹਾਂ ਜਿੰਨਾ ਮਿਹਨਤੀ ਅਤੇ ਲੋਕ ਪੱਖੀ ਨਹੀਂ ਹੋਇਆ | ਰੰਧਾਵਾ ਕਾਤਰੋਂ ਨੇ ਕਿਹਾ ਕਿ ਮਲਕੀਤ ਸਿੰਘ ਕੀਤੂ ਨੇ ਆਟਾ ਦਾਲ ਸਕੀਮ ਅਧੀਨ ਲੋੜਵੰਦਾਂ ਨੂੰ ਆਪ ਆਟਾ ਵੰਡਣ, ਹਰ ਸਾਲ ਲੋੜਵੰਦ ਪਰਿਵਾਰ ਦੀਆਂ ਲੜਕੀਆਂ ਦੇ ਵਿਆਹ ਕਰਨ, ਕਪਾਲ ਮੋਚਨ ਵਿਖੇ ਲਗਾਤਾਰ ਲੰਗਰ ਚਲਾਉਣ, ਹਰ ਕੁੜੀ ਦੇ ਵਿਆਹ 'ਤੇ ਸ਼ਗਨ ਦੇਣ ਨੂੰ ਤੋਂ ਇਲਾਵਾ ਲੋੜਵੰਦ ਵਿਦਿਆਰਥੀਆਂ ਸਕੂਲ ਦਾ ਸਮਾਨ ਦੇਣ ਅਤੇ ਟਰੱਕ ਯੂਨੀਅਨ ਲਈ ਥਾਂ ਲੈ ਕੇ ਦੇਣ ਤੋਂ ਇਲਾਵਾ ਪੰਜਾਬ ਦੇ ਅਨੇਕਾਂ ਲੋੜਵੰਦਾਂ ਦੀ ਮਦਦ ਕੀਤੀ | ਉਨ੍ਹਾਂ ਕਿਹਾ ਕਿ ਅਮੀਰ ਘਰ ਵਿਚੋਂ ਆਏ, ਲੋਕਾਂ ਦੇ ਨਕਾਰੇ ਕੇਵਲ ਸਿੰਘ ਢਿੱਲੋਂ ਸਿਰਫ਼ ਵੱਡੀਆਂ ਗੱਲਾਂ ਹੀ ਕਰ ਸਕਦੇ ਹਨ, ਮਿਹਨਤ ਨਹੀਂ | ਉਨ੍ਹਾਂ ਸ: ਢਿੱਲੋਂ ਦੇ ਬਿਆਨ ਦੀ ਸਖ਼ਤ ਸ਼ਬਦਾਂ ਵਿਚ ਨਿਖੇਧੀ ਕਰਦਿਆਂ ਪ੍ਰਧਾਨਗੀ ਦੇ ਲਾਲਚ 'ਚ ਮਿਹਨਤੀ ਆਗੂ ਖ਼ਿਲਾਫ਼ ਬੋਲਣ ਦੀ ਨਿੰਦਾ ਕੀਤੀ | ਉਨ੍ਹਾਂ ਕਿਹਾ ਕੇਵਲ ਸਿੰਘ ਢਿੱਲੋਂ ਤੁਰੰਤ ਜਨਤਕ ਤੌਰ 'ਤੇ ਮੁਆਫ਼ੀ ਮੰਗਣ |
