ਮੀਂਹ ਪੈਣ ਨਾਲ ਪੁਲ ਦੇ ਨਾਲ ਲਗਾਈਆਂ ਮਿੱਟੀ ਦੀਆਂ ਢਿੱਗਾਂ ਡਿਗੀਆਂ

ਹੰਡਿਆਇਆ, 4 ਜੁਲਾਈ (ਗੁਰਜੀਤ ਸਿੰਘ ਖੁੱਡੀ)-ਓਵਰਬ੍ਰਿਜ ਦੇ ਨਾਲ ਲਗਾਈ ਮਿੱਟੀ ਮੀਂਹ ਪੈਣ ਨਾਲ ਡਿੱਗ ਗਈ। ਜਿਸ ਕਾਰਨ ਵੱਡਾ ਨੁਕਸਾਨ ਹੋਣ ਦਾ ਖ਼ਦਸ਼ਾ ਬਣਿਆ ਹੋਇਆ ਹੈ। ਕੌਮੀ ਮਾਰਗ ਨੰਬਰ 703 ਬਰਨਾਲਾ-ਮੋਗਾ ਉੱਪਰ ਖੁੱਡੀ ਕਲਾਂ-ਬਰਨਾਲਾ ਨੂੰ ਆਉਣ-ਜਾਣ ਵਾਲਾ ਓਵਰਬ੍ਰਿਜ ਥੋੜੇ੍ਹ ਸਾਲ ਪਹਿਲਾਂ ਬਣਾਇਆ ਗਿਆ ਸੀ। ਪੁਲ ਦੇ ਆਸੇ ਪਾਸੇ ਦੋਵੇਂ ਸਾਈਡ ਮਿੱਟੀ ਲਾ ਕੇ ਪੁਲ ਨੂੰ ਰੋਕਿਆ ਗਿਆ ਹੈ ਪਰ ਬੀਤੇ ਦਿਨੀਂ ਮੀਂਹ ਪੈਣ ਨਾਲ ਮਿੱਟੀ ਦੀਆਂ ਦੂਰ ਤੱਕ ਢਿੱਗਾਂ ਡਿੱਗ ਗਈਆਂ ਜਿਸ ਦੇ ਨਾਲ ਡਰ ਹੈ ਕਿ ਓਵਰਬ੍ਰਿਜ ਦਾ ਕੋਈ ਨੁਕਸਾਨ ਨਾ ਹੋ ਜਾਵੇ। ਇਸ ਸਬੰਧੀ ਰਵਿੰਦਰ ਸਿੰਘ ਰੰਮੀ ਢਿੱਲੋਂ, ਅਜੈਬ ਸਿੰਘ ਸਿੱਧੂ, ਭਗਤ ਸਿੰਘ ਔਲਖ, ਨੈਬ ਸਿੰਘ ਨੇ ਡਿਪਟੀ ਕਮਿਸ਼ਨਰ ਬਰਨਾਲਾ ਤੋਂ ਮੰਗ ਕੀਤੀ ਕਿ ਪੁੱਲ ਨੇੜਿਉਂ ਡਿੱਗੀ ਮਿੱਟੀ ਦੀ ਸਹੀ ਤਰੀਕੇ ਨਾਲ ਮੁਰੰਮਤ ਕਰਾਈ ਜਾਵੇ।