ਸਵੇਰ ਦਾ ਸਮਾਂ ਸੀ ਅਤੇ ਮਦਨ ਲਾਲ ਜੀ ਨੇ ਬੜੇ ਚਾਅ ਨਾਲ ਆਪਣੇ ਲੈਪਟਾਪ ਉੱਤੇ ਕੰਮ ਕਰਨਾ ਸ਼ੁਰੂ ਕੀਤਾ | ਉਨ੍ਹਾਂ ਸੋਚਿਆ ਕਿ ਅੱਜ ਦਫ਼ਤਰ ਦਾ ਸਾਰਾ ਕੰਮ ਸਮੇਂ ਸਿਰ ਨਿੱਬੜ ਜਾਵੇਗਾ | ਪਰ ਉਹ ਇਹ ਨਹੀਂ ਜਾਣਦੇ ਸਨ ਕਿ ਕਿਸਮਤ ਉਨ੍ਹਾਂ ਨਾਲ ਕੋਈ ਵੱਡਾ ਮਜ਼ਾਕ ਕਰਨ ਦੀ ਤਿਆਰੀ ਵਿਚ ਬੈਠੀ ਹੈ | ਅਜੇ ਉਨ੍ਹਾਂ ਨੇ ਦੋ ਲਾਈਨਾਂ ਹੀ ਲਿਖੀਆਂ ਸਨ ਕਿ ਲੈਪਟਾਪ ਦੀ ਸਕ੍ਰੀਨ ਇਕਦਮ ਨੀਲੀ ਹੋ ਗਈ ਅਤੇ ਉੱਤੇ ਅੰਗਰੇਜ਼ੀ ਵਿਚ ਲਿਖਿਆ ਆ ਗਿਆ "Windows Update in progress... 4on’t turn off your P3."
ਮਦਨ ਲਾਲ ਨੇ ਘੜੀ ਵੱਲ ਦੇਖਿਆ, ਅੱਧਾ ਘੰਟਾ ਬੀਤ ਗਿਆ ਪਰ ਅੱਪਡੇਟ ਸਿਰਫ਼ ਸੱਤ ਫ਼ੀਸਦੀ ਹੀ ਹੋਇਆ ਸੀ | ਉਨ੍ਹਾਂ ਦੇ ਮੱਥੇ 'ਤੇ ਪਸੀਨਾ ਆ ਗਿਆ ਕਿਉਂਕਿ ਉਨ੍ਹਾਂ ਨੇ ਜ਼ਰੂਰੀ ਰਿਪੋਰਟ ਭੇਜਣੀ ਸੀ | ਜਦੋਂ ਤੱਕ ਲੈਪਟਾਪ ਠੀਕ ਹੋਇਆ, ਉਦੋਂ ਤੱਕ ਬਿਜਲੀ ਚਲੀ ਗਈ ਅਤੇ ਇਨਵਰਟਰ ਨੇ ਵੀ ਬੋਲਦਿਆਂ ਤੌਬਾ ਕਰ ਦਿੱਤੀ | ਮਦਨ ਲਾਲ ਨੇ ਸਿਰ 'ਤੇ ਹੱਥ ਮਾਰਦਿਆਂ ਸੋਚਿਆ 'ਅੱਜ ਕੰਪਿਊਟਰ ਨੇ ਮੇਰਾ ਤੇਲ ਕੱਢਣ ਦੀ ਕਸਮ ਖਾਧੀ ਹੈ |'
ਕਿਸੇ ਤਰ੍ਹਾਂ ਮੋਬਾਈਲ ਦਾ ਹੌਟਸਪੌਟ ਆਨ ਕਰਕੇ ਉਨ੍ਹਾਂ ਨੇ ਕੰਮ ਮੁਕਾਇਆ ਅਤੇ ਭੱਜ ਕੇ ਦਫ਼ਤਰ ਵੱਲ ਨਿਕਲੇ | ਰਸਤੇ ਵਿਚ ਮੋਬਾਈਲ ਦੀ ਬੈਟਰੀ ਲੋਅ ਹੋ ਗਈ ਅਤੇ ਜਦੋਂ ਉਹ ਦਫ਼ਤਰ ਪਹੁੰਚੇ ਤਾਂ ਪਤਾ ਲੱਗਾ ਕਿ ਇੰਟਰਨੈੱਟ ਦੀ ਤਾਰ ਹੀ ਕੱਟੀ ਗਈ ਹੈ | ਕੰਪਨੀ ਦਾ ਆਈ.ਟੀ. ਮੁੰਡਾ ਕਹਿਣ ਲੱਗਾ, 'ਸਰ, ਅੱਜ ਨੈੱਟਵਰਕ ਦੀ ਤਾਰ ਚੂਹੇ ਕੁਤਰ ਗਏ ਨੇ, ਸ਼ਾਮ ਤੱਕ ਹੀ ਜੁੜੂਗੀ!'
ਸ਼ਾਮ ਨੂੰ ਜਦੋਂ ਮਦਨ ਲਾਲ ਹਾਰ-ਥੱਕ ਕੇ ਘਰ ਪਰਤੇ, ਤਾਂ ਉਨ੍ਹਾਂ ਦੀ ਧਰਮਪਤਨੀ ਨੇ ਦੱਸਿਆ ਕਿ ਵਾਈ-ਫਾਈ ਦਾ ਰਾਊਟਰ ਖ਼ਰਾਬ ਹੋ ਗਿਆ ਹੈ ਅਤੇ ਬੱਚੇ ਆਨਲਾਈਨ ਕਲਾਸ ਨਾ ਲੱਗਣ ਕਰਕੇ ਰੋ ਰਹੇ ਹਨ | ਇਹ ਸੁਣਦਿਆਂ ਹੀ ਮਦਨ ਲਾਲ ਨੇ ਆਪਣੇ ਵਾਲਾਂ ਨੂੰ ਹੱਥ ਪਾਇਆ, ਸੋਫੇ 'ਤੇ ਚੁੱਪਚਾਪ ਬੈਠ ਗਏ ਅਤੇ ਅਸਮਾਨ ਵੱਲ ਦੇਖ ਕੇ ਬੋਲੇ 'ਹੇ ਭਗਵਾਨ! ਮੈਂ ਤਾਂ ਆਫਿਸ ਦਾ ਕੰਮ ਕਰਨ ਆਇਆ ਸੀ, ਤੂੰ ਮੈਨੂੰ ਆਪ ਹੀ ਸਿਸਟਮ ਤੋਂ ਆਊਟ ਕਰ ਦਿੱਤਾ!'
-ਪਿੰਡ ਜੱਬੋਵਾਲ ਸ਼ਹੀਦ ਭਗਤ ਸਿੰਘ ਨਗਰ
ਮੋਬਾਈਲ : 82830-66125
