ਗਲਾਸਗੋ ਰਾਸ਼ਟਰਮੰਡਲ ਖੇਡਾਂ ਦਾ ਸ਼ਾਨਦਾਰ ਸਮਾਪਨ, ਭਾਰਤ ਨੇ ਛੱਡੀ ਅਮਿੱਟ ਛਾਪ

ਗਲਾਸਗੋ, 3 ਅਗਸਤ (ਹਰਜੀਤ ਸਿੰਘ ਦੁਸਾਂਝ)-ਗਲਾਸਗੋ ਰਾਸ਼ਟਰਮੰਡਲ ਖੇਡਾਂ 2026 ਨੇ ਦੁਨੀਆ ਨੂੰ ਅਨੇਕਾਂ ਅਜਿਹੇ ਪਲ ਦਿੱਤੇ ਜੋ ਖੇਡ ਪ੍ਰੇਮੀਆਂ ਦੇ ਦਿਲਾਂ ’ਚ ਹਮੇਸ਼ਾ ਲਈ ਵੱਸ ਜਾਣਗੇ। 74 ਦੇਸ਼ਾਂ ਤੇ ਖੇਤਰਾਂ ਦੇ ਲਗਭਗ 3,000 ਖਿਡਾਰੀਆਂ ਨੇ 10 ਖੇਡਾਂ ਤੇ 6 ਪੈਰਾ ਖੇਡਾਂ ਵਿੱਚ ਹਿੱਸਾ ਲਿਆ, ਜਿੱਥੇ ਕੁੱਲ 1,168 ਤਗਮਿਆਂ ਲਈ ਮੁਕਾਬਲੇ ਹੋਏ। 41 ਦੇਸ਼ ਘੱਟੋ-ਘੱਟ ਇਕ ਤਗਮਾ ਜਿੱਤਣ ’ਚ ਸਫ਼ਲ ਰਹੇ, ਜਦਕਿ ਆਸਟ੍ਰੇਲੀਆ ਮੈਡਲ ਟੇਬਲ ’ਚ ਸਿਖਰ ’ਤੇ ਰਿਹਾ। ਸਕਾਟਲੈਂਡ ਦੇ ਵਿਸ਼ਵ ਰਿਕਾਰਡਧਾਰੀ ਜੋਸ਼ ਕੈਰ ਨੇ ਸਕੌਟਸਟਾਊਨ ਸਟੇਡੀਅਮ ’ਚ ਇਤਿਹਾਸਕ ਕਾਮਨਵੈਲਥ ਮਾਈਲ ਜਿੱਤ ਕੇ ਘਰੇਲੂ ਦਰਸ਼ਕਾਂ ਨੂੰ ਖੁਸ਼ੀ ਨਾਲ ਝੂਮਣ ਲਈ ਮਜਬੂਰ ਕਰ ਦਿੱਤਾ। ਡੰਕਨ ਸਕਾਟ, ਰਿਊਬਨ ਵਾਰਡ, ਐਂਘਾਰਡ ਐਵਨਜ਼, ਫੇ ਰੌਜਰਜ਼, ਬੈਨ ਸੈਂਡਿਲੈਂਡਜ਼ ਤੇ ਮੇਲਾਨੀ ਵੁਡਜ਼ ਨੇ ਵੀ ਸਕਾਟਲੈਂਡ ਲਈ ਯਾਦਗਾਰ ਸੋਨੇ ਦੇ ਤਗਮੇ ਜਿੱਤੇ। ਆਸਟ੍ਰੇਲੀਆ ਦੀ ਤੈਰਾਕ ਮੇਗ ਹੈਰਿਸ ਨੇ 6 ਸੋਨੇ ਦੇ ਤਗਮੇ ਜਿੱਤ ਕੇ ਖੇਡਾਂ ਦੀ ਸਭ ਤੋਂ ਸਫ਼ਲ ਖਿਡਾਰਨ ਬਣਨ ਦਾ ਮਾਣ ਹਾਸਲ ਕੀਤਾ, ਜਦਕਿ ਦੱਖਣੀ ਅਫ਼ਰੀਕਾ ਦੇ ਚੈਡ ਲੇ ਕਲੋਸ ਨੇ 21 ਰਾਸ਼ਟਰਮੰਡਲ ਤਗਮਿਆਂ ਨਾਲ ਨਵਾਂ ਇਤਿਹਾਸ ਰਚਿਆ। ਕੈਮਰੂਨ ਦੇ ਇਮੈਨੂਅਲ ਇਸੇਮੇ ਨੇ ਮੋਹਰਿਆਂ ਵਰਗੇ ਮੀਂਹ ’ਚ 9.83 ਸਕਿੰਟ ਦਾ ਸ਼ਾਨਦਾਰ ਸਮਾਂ ਕੱਢ ਕੇ ਪੁਰਸ਼ਾਂ ਦੀ 100 ਮੀਟਰ ਦੌੜ ਜਿੱਤੀ। ਭਾਰਤ ਨੇ ਵੀ ਛੱਡੀ ਆਪਣੀ ਛਾਪ - ਭਾਰਤ ਲਈ ਗਲਾਸਗੋ 2026 ਕਈ ਪੱਖੋਂ ਇਤਿਹਾਸਕ ਰਿਹਾ। ਸਟਾਰ ਵੇਟਲਿਫਟਰ ਮੀਰਾਬਾਈ ਚਾਨੂ ਨੇ ਮਹਿਲਾ 48 ਕਿਲੋ ਭਾਰ ਵਰਗ ’ਚ ਤਿੰਨ ਨਵੇਂ ਗੇਮਜ਼ ਰਿਕਾਰਡ ਬਣਾਉਂਦਿਆਂ ਭਾਰਤ ਲਈ ਖੇਡਾਂ ਦਾ ਪਹਿਲਾ ਸੋਨ ਤਗਮਾ ਜਿੱਤਿਆ। ਜੂਡੋ ’ਚ ਭਾਰਤ ਨੇ ਇਤਿਹਾਸ ਰਚ ਦਿੱਤਾ। ਅਸਮੀਤਾ ਡੇਅ ਨੇ ਮਹਿਲਾ 48 ਕਿਲੋ ਵਰਗ ’ਚ 36 ਸਾਲਾਂ ਬਾਅਦ ਭਾਰਤ ਨੂੰ ਪਹਿਲਾ ਰਾਸ਼ਟਰਮੰਡਲ ਜੂਡੋ ਸੋਨਾ ਦਿਵਾਇਆ, ਜਦਕਿ ਹਰਸ਼ ਸਿੰਘ ਨੇ ਪੁਰਸ਼ਾਂ ਦੇ 60 ਕਿਲੋ ਵਰਗ ਦਾ ਖ਼ਿਤਾਬ ਜਿੱਤ ਕੇ ਭਾਰਤ ਲਈ ਇਤਿਹਾਸਕ ਜੂਡੋ ਡਬਲ ਪੂਰਾ ਕੀਤਾ। ਮੁੱਕੇਬਾਜ਼ੀ ’ਚ ਭਾਰਤ ਨੇ ਦਬਦਬਾ ਕਾਇਮ ਰੱਖਿਆ। ਜੈਸਮੀਨ, ਪ੍ਰੀਤੀ ਪਵਾਰ, ਸਾਕਸ਼ੀ, ਪ੍ਰਿਆ, ਅਰੁੰਧਤੀ ਚੌਧਰੀ, ਸਚਿਨ ਅਤੇ ਅੰਕੁਸ਼ ਨੇ ਆਪਣੇ-ਆਪਣੇ ਭਾਰ ਵਰਗਾਂ ’ਚ ਸੋਨੇ ਦੇ ਤਗਮੇ ਜਿੱਤ ਕੇ ਭਾਰਤ ਨੂੰ ਮੁੱਕੇਬਾਜ਼ੀ ’ਚ ਸ਼ਾਨਦਾਰ ਸਫ਼ਲਤਾ ਦਿਵਾਈ। ਲਵਲੀਨਾ ਬੋਰਗੋਹੈਨ ਅਤੇ ਜਾਦੂਮਣੀ ਸਿੰਘ ਨੇ ਚਾਂਦੀ ਦੇ ਤਗਮੇ ਜਿੱਤੇ। ਐਥਲੈਟਿਕਸ ’ ਚ ਪ੍ਰਵੀਣ ਚਿਤ੍ਰਾਵੇਲ ਨੇ ਟ੍ਰਿਪਲ ਜੰਪ ’ਚ ਚਾਂਦੀ ਤੇ ਸੇਲਵਾ ਪ੍ਰਭੂ ਤਿਰੁਮਾਰਨ ਨੇ ਕਾਂਸੀ ਦਾ ਤਗਮਾ ਜਿੱਤ ਕੇ ਭਾਰਤ ਨੂੰ ਇੱਕੋ ਮੁਕਾਬਲੇ ’ਚ 2 ਤਗਮੇ ਦਿਵਾਏ। ਪੈਰਾ ਖੇਡਾਂ ’ਚ ਭਾਰਤ ਨੇ ਆਪਣੇ ਰਾਸ਼ਟਰਮੰਡਲ ਇਤਿਹਾਸ ਦਾ ਸਰਵੋਤਮ ਪ੍ਰਦਰਸ਼ਨ ਕਰਦਿਆਂ ਸੱਤ ਤਗਮੇ ਜਿੱਤੇ। ਇਹ ਭਾਰਤੀ ਪੈਰਾ ਦਲ ਦਾ ਹੁਣ ਤੱਕ ਦਾ ਸਭ ਤੋਂ ਸਫ਼ਲ ਰਾਸ਼ਟਰਮੰਡਲ ਅਭਿਆਨ ਰਿਹਾ। ਗਲਾਸਗੋ 2026 ਨੇ ਨਾ ਸਿਰਫ਼ ਸ਼ਾਨਦਾਰ ਖੇਡ ਮੁਕਾਬਲੇ ਕਰਵਾਏ, ਸਗੋਂ ਇਹ ਵੀ ਦਿਖਾਇਆ ਕਿ ਰਾਸ਼ਟਰਮੰਡਲ ਖੇਡਾਂ ’ਚ ਹਰ ਦੇਸ਼ ਤੇ ਹਰ ਖਿਡਾਰੀ ਲਈ ਬਰਾਬਰ ਦਾ ਸਨਮਾਨ ਹੈ। ਹੁਣ ਖੇਡਾਂ ਦੀ ਇਹ ਵਿਰਾਸਤ ਭਾਰਤ ਦੇ ਅਹਿਮਦਾਬਾਦ 2030 ਵੱਲ ਰਵਾਨਾ ਹੋ ਚੁੱਕੀ ਹੈ, ਜਿੱਥੇ ਅਗਲੀਆਂ ਰਾਸ਼ਟਰਮੰਡਲ ਖੇਡਾਂ 2030 ਹੋਣਗੀਆਂ।