ਭਾਰਤੀ ਮਹਿਲਾ ਹਾਕੀ ਟੀਮ ਦੀ ਲਗਾਤਾਰ ਤੀਸਰੀ ਜਿੱਤ

ਕਾਕਾਮਿਗਾਹਰ, 23 ਸਤੰਬਰ (ਏਜੰਸੀ)- ਭਾਰਤੀ ਮਹਿਲਾ ਹਾਕੀ ਟੀਮ ਨੇ ਏਸ਼ਿਆਈ ਖੇਡਾਂ 2026 ’ਚ ਜਿੱਤ ਦੀ ਹੈਟ੍ਰਿਕ ਲਗਾ ਦਿੱਤੀ ਹੈ। ਪੂਲ-ਬੀ ਦੇ ਮੁਕਾਬਲੇ ’ਚ ਭਾਰਤ ਨੇ ਥਾਈਲੈਂਡ ਨੂੰ 20-1 ਨਾਲ ਹਰਾ ਦਿੱਤਾ। ਗਿਫੂ ਪ੍ਰੀਫੈਕਚਰਲ ਗਰੀਨ ਸਟੇਡੀਅਮ ’ਚ ਖੇਡੇ ਗਏ ਮੁਕਾਬਲੇ ’ਚ ਦੀਪਿਕਾ ਸ਼ੇਰਾਵਤ ਨੇ 9 ਗੋਲ ਕੀਤੇ। ਉਸ ਦੇ ਸਾਰੇ ਗੋਲ ਪੈਨਲਟੀ ਕਾਰਨਰ ’ਚ ਆਏ। ਨਵਨੀਤ ਕੌਰ ਨੇ 4 ਗੋਲ ਦਾਗੇ। ਰੁਤੁਜਾ ਦਾਦਾਸੋ ਪਿਸਲ ਨੇ ਹੈਟ੍ਰਿਕ ਲਗਾਈ। ਨੇਹਾ, ਲਾਲਰੇਮਸਿਆਮੀ, ਸਾਕਸ਼ੀ ਰਾਣਾ ਤੇ ਕਪਤਾਨ ਸਲੀਮਾ ਟੇਟੇ ਨੇ ਵੀ ਗੋਲ ਕੀਤੇ। ਥਾਈਲੈਂਡ ਵਲੋਂ ਸੁਪਾਂਸਾ ਸਾਮਾਂਸੋ ਨੇ ਇਕਮਾਤਰ ਗੋਲ ਕੀਤਾ। ਦੀਪਿਕਾ ਦਾ ਇਹ ਏਸ਼ਿਆਈ ਖੇਡਾਂ ’ਚ ਲਗਾਤਾਰ ਦੂਸਰਾ ਰਿਕਾਰਡ ਪ੍ਰਦਰਸ਼ਨ ਹੈ। ਟੂਰਨਾਮੈਂਟ ਦੇ ਪਹਿਲੇ ਮੈਚ ’ਚ ਉਸ ਨੇ ਉਜਬੇਕਿਸਤਾਨ ਦੇ ਖਿਲਾਫ਼ ਗੋਲ ਕੀਤੇ ਸਨ। ਉਦੋਂ ਉਹ ਇਕ ਏਸ਼ਿਆਈ ਖੇਡਾਂ ਮਹਿਲਾ ਹਾਕੀ ਮੈਚ ’ਚ ਸਭ ਤੋਂ ਵੱਧ ਗੋਲ ਕਰਨ ਵਾਲੀ ਖਿਡਾਰਨ ਬਣੀ ਸੀ। ਥਾਈਲੈਂਡ ਖਿਲਾਫ਼ 9 ਗੋਲ ਕਰਕੇ ਉਸ ਨੇ ਆਪਣਾ ਹੀ ਰਿਕਾਰਡ ਬਿਹਤਰ ਕਰ ਲਿਆ। ਟੂਰਨਾਮੈਂਟ ’ਚ ਦੀਪਿਕਾ ਦੇ ਹੁਣ 20 ਗੋਲ ਹੋ ਚੁੱਕੇ ਹਨ। ਉਸ ਨੇ ਉਜਬੇਕਿਸਤਾਨ ਖਿਲਾਫ਼ 8 ਤੇ ਇੰਡੋਨੇਸ਼ੀਆ ਖਿਲਾਫ਼ 3 ਗੋਲ ਕੀਤੇ ਸਨ। ਭਾਰਤ ਦਾ ਅਗਲਾ ਮੁਕਾਬਲਾ ਮੇਜਬਾਨ ਜਪਾਨ ਨਾਲ 25 ਸਤੰਬਰ ਨੂੰ ਹੋਵੇਗਾ। ਜਪਾਨ ਪੂਲ-ਬੀ ’ਚ ਭਾਰਤ ਨਾਲ ਪ੍ਰਮੁੱਖ ਟੀਮਾਂ ’ਚ ਹੈ। ਇਸ ਮੁਕਾਬਲੇ ਬਾਅਦ ਸੈਮੀਫਾਈਨਲ ਦੀ ਤਸਵੀਰ ਹੋਰ ਸਾਫ਼ ਹੋਵੇਗੀ।