ਵਪਾਰ ਸਮਝੌਤੇ 'ਤੇ ਗੱਲਬਾਤ ਲਈ ਅਮਰੀਕੀ ਵਫ਼ਦ ਵਲੋਂ ਭਾਰਤ ਦੌਰਾ 1 ਜੂਨ ਤੋਂ
ਅਜੀਤ ਡੈਸਕ
28-05-2026
ਨਵੀਂ ਦਿੱਲੀ, 27 ਮਈ (ਏਜੰਸੀ)-ਅੰਤਰਿਮ ਵਪਾਰ ਸਮਝੌਤੇ ਸੰਬੰਧੀ ਅਮਰੀਕੀ ਵਫ਼ਦ ਵਲੋਂ 1 ਤੋਂ 4 ਜੂਨ ਤੱਕ ਭਾਰਤ ਦਾ ਦੌਰਾ ਕੀਤਾ ਜਾਵੇਗਾ | ਇਕ ਸਰਕਾਰੀ ਅਧਿਕਾਰੀ ਨੇ ਦੱਸਿਆ ਕਿ ਅਮਰੀਕੀ ਵਫ਼ਦ ਵਲੋਂ ਅਗਲੇ ਹਫ਼ਤੇ ਭਾਰਤ ਦਾ ਦੌਰਾ ਕੀਤਾ ਜਾ ਰਿਹਾ ਹੈ, ਤਾਂ ਜੋ ਅੰਤਰਿਮ ਵਪਾਰ ਸਮਝੌਤੇ ਦੀ ਬਾਰੀਕੀਆਂ ਨੂੰ ਅੰਤਿਮ ਰੂਪ ਦਿੱਤਾ ਜਾ ਸਕੇ ਅਤੇ ਵਿਆਪਕ ਦੁਵੱਲੇ ਵਪਾਰ ਸਮਝੌਤੇ ਤਹਿਤ ਵੱਖ-ਵੱਖ ਖੇਤਰਾਂ ਜਿਵੇਂ ਬਾਜ਼ਾਰ ਪਹੁੰਚ, ਗੈਰ-ਟੈਰਿਫ਼ ਉਪਾਅ ਅਤੇ ਕਸਟਮ ਡਿਊਟੀ ਸੰਬੰਧੀ ਗੱਲਬਾਤ ਨੂੰ ਅੱਗੇ ਵਧਾਇਆ ਜਾ ਸਕੇ | ਭਾਰਤ ਅਤੇ ਅਮਰੀਕਾ ਨੇ 7 ਫਰਵਰੀ ਨੂੰ ਇਕ ਸਾਂਝਾ ਬਿਆਨ ਜਾਰੀ ਕੀਤਾ ਸੀ, ਜਿਸ 'ਚ ਦੁਵੱਲੇ ਲਾਭਕਾਰੀ ਵਪਾਰ ਸੰਬੰਧੀ ਇਕ ਅੰਤਰਿਮ ਵਪਾਰ ਸਮਝੌਤੇ ਸੰਬੰਧੀ ਇਕ ਢਾਂਚੇ 'ਤੇ ਸਹਿਮਤੀ ਬਣੀ ਸੀ | ਇਸ ਤੋਂ ਬਾਅਦ ਭਾਰਤੀ ਵਫ਼ਦ ਨੇ 20-23 ਅਪ੍ਰੈਲ ਨੂੰ ਅਮਰੀਕਾ ਦਾ ਦੌਰਾ ਕੀਤਾ ਸੀ | ਹੁਣ ਗੱਲਬਾਤ ਨੂੰ ਅੱਗੇ ਵਧਾਉਣ ਲਈ ਮੁੱਖ ਵਾਰਤਾਕਾਰ ਦੀ ਅਗਵਾਈ ਵਾਲਾ ਅਮਰੀਕੀ ਵਫ਼ਦ 1-4 ਜੂਨ ਨੂੰ ਭਾਰਤ ਦਾ ਦੌਰਾ ਕਰੇਗਾ |
