ਘਾਨਾ ਦੇ ਸੋਸ਼ਲਾਈਟ ਅਬੂ ਟ੍ਰਿਕਾ ਨੂੰ 80 ਲੱਖ ਡਾਲਰ ਦੀ ਆਨਲਾਈਨ ਠੱਗੀ ਦੇ ਦੋਸ਼ਾਂ ਤਹਿਤ ਅਮਰੀਕਾ ਹਵਾਲੇ ਕੀਤਾ ਗਿਆ

ਨਿਊਯਾਰਕ, 12 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ)-ਘਾਨਾ ਸਰਕਾਰ ਨੇ ਮਸ਼ਹੂਰ ਸੋਸ਼ਲ ਮੀਡੀਆ ਸ਼ਖ਼ਸੀਅਤ ਫ੍ਰੇਡਰਿਕ ਕੁਮੀ, ਜਿਸ ਨੂੰ ਅਬੂ ਟ੍ਰਿਕਾ ਦੇ ਨਾਂ ਨਾਲ ਜਾਣਿਆ ਜਾਂਦਾ ਹੈ, ਨੂੰ ਅਮਰੀਕਾ ਹਵਾਲੇ ਕਰ ਦਿੱਤਾ ਹੈ। 31 ਸਾਲਾ ਅਬੂ ਟ੍ਰਿਕਾ ਉੱਤੇ ਦੋਸ਼ ਹੈ ਕਿ ਉਹ ਇੱਕ ਅੰਤਰਰਾਸ਼ਟਰੀ ਗਿਰੋਹ ਦਾ ਹਿੱਸਾ ਸੀ, ਜਿਸ ਨੇ ਆਨਲਾਈਨ “ਰੋਮਾਂਸ ਸਕੈਮ” ਰਾਹੀਂ ਖ਼ਾਸ ਕਰਕੇ ਬਜ਼ੁਰਗ ਅਮਰੀਕੀ ਨਾਗਰਿਕਾਂ ਨੂੰ ਨਿਸ਼ਾਨਾ ਬਣਾ ਕੇ ਲਗਭਗ 80 ਲੱਖ ਅਮਰੀਕੀ ਡਾਲਰ ਦੀ ਠੱਗੀ ਕੀਤੀ। ਅਮਰੀਕੀ ਅਧਿਕਾਰੀਆਂ ਮੁਤਾਬਕ ਇਹ ਗਿਰੋਹ ਜਾਅਲੀ ਪਹਿਚਾਣਾਂ ਬਣਾਉਂਦਾ, ਸੋਸ਼ਲ ਮੀਡੀਆ ਅਤੇ ਡੇਟਿੰਗ ਪਲੇਟਫਾਰਮਾਂ ਰਾਹੀਂ ਲੋਕਾਂ ਨਾਲ ਭਾਵਨਾਤਮਕ ਰਿਸ਼ਤੇ ਕਾਇਮ ਕਰਦਾ ਅਤੇ ਫਿਰ ਮੈਡੀਕਲ ਖਰਚਿਆਂ, ਯਾਤਰਾ ਜਾਂ ਨਿਵੇਸ਼ ਦੇ ਬਹਾਨੇ ਉਨ੍ਹਾਂ ਤੋਂ ਪੈਸੇ ਮੰਗਦਾ ਸੀ। ਦੋਸ਼ ਹੈ ਕਿ ਪੀੜਤਾਂ ਵੱਲੋਂ ਭੇਜੀ ਗਈ ਰਕਮ ਨੂੰ ਅਬੂ ਟ੍ਰਿਕਾ ਅਤੇ ਉਸ ਦੇ ਸਾਥੀ ਅਮਰੀਕਾ ਤੋਂ ਘਾਨਾ ਅਤੇ ਹੋਰ ਦੇਸ਼ਾਂ ਵਿੱਚ ਟਰਾਂਸਫਰ ਕਰਦੇ ਸਨ। ਅਬੂ ਟ੍ਰਿਕਾ ਨੂੰ ਦਸੰਬਰ 2025 ਵਿੱਚ ਘਾਨਾ ਵਿੱਚ ਗ੍ਰਿਫ਼ਤਾਰ ਕੀਤਾ ਗਿਆ ਸੀ। ਉਸ ਦੇ ਵਕੀਲਾਂ ਨੇ ਅਮਰੀਕਾ ਹਵਾਲਗੀ ਰੋਕਣ ਲਈ ਕਈ ਕਾਨੂੰਨੀ ਕੋਸ਼ਿਸ਼ਾਂ ਕੀਤੀਆਂ, ਪਰ ਅਦਾਲਤ ਨੇ ਸਰਕਾਰ ਦੀ ਹਵਾਲਗੀ ਅਰਜ਼ੀ ਮਨਜ਼ੂਰ ਕਰ ਲਈ। ਹਾਲਾਂਕਿ ਅਬੂ ਟ੍ਰਿਕਾ ਨੇ ਸਾਰੇ ਦੋਸ਼ਾਂ ਤੋਂ ਇਨਕਾਰ ਕੀਤਾ ਹੈ। ਇੱਕ ਟੀਵੀ ਇੰਟਰਵਿਊ ਵਿੱਚ ਉਸ ਨੇ ਕਿਹਾ ਕਿ ਉਸ ਨੇ 80 ਲੱਖ ਡਾਲਰ ਨਹੀਂ, ਸਗੋਂ ਕੇਵਲ 13 ਹਜ਼ਾਰ ਡਾਲਰ ਹੀ ਪ੍ਰਾਪਤ ਕੀਤੇ ਸਨ। ਉਸ ਨੇ ਇਹ ਵੀ ਦਾਅਵਾ ਕੀਤਾ ਕਿ ਗ੍ਰਿਫ਼ਤਾਰੀ ਦੌਰਾਨ ਉਸ ਨਾਲ ਬਦਸਲੂਕੀ ਕੀਤੀ ਗਈ ਅਤੇ ਐਫਬੀਆਈ ਤੇ ਘਾਨਾ ਦੀਆਂ ਸੁਰੱਖਿਆ ਏਜੰਸੀਆਂ ਨੇ ਉਸ ਦੇ ਮਨੁੱਖੀ ਅਧਿਕਾਰਾਂ ਦੀ ਉਲੰਘਣਾ ਕੀਤੀ, ਜਿਸ ਸਬੰਧੀ ਉਸ ਨੇ ਹਰਜਾਨੇ ਲਈ ਮਾਮਲਾ ਵੀ ਦਰਜ ਕਰਵਾਇਆ ਹੈ।