ਨਿਊਯਾਰਕ, 25 ਜੁਲਾਈ (ਰਾਜੂ ਸਹਿਬਾਜ਼ਪੁਰਾ)-ਦੱਖਣੀ ਫਿਲਾਡੈਲਫੀਆ ’ਚ ਤੇਜ਼ ਰਫ਼ਤਾਰ ਕਾਰ ਕਾਰਨ ਵਾਪਰੇ ਭਿਆਨਕ ਹਾਦਸੇ ਦੌਰਾਨ 16 ਸਾਲਾ ਲੜਕੀ ਦੀ ਮੌਤ ਹੋ ਗਈ, ਜਦਕਿ 5 ਹੋਰ ਨਾਬਾਲਗ ਜ਼ਖ਼ਮੀ ਹੋਏ ਹਨ। ਜ਼ਖ਼ਮੀਆਂ ਵਿਚੋਂ ਇਕ 17 ਸਾਲਾ ਲੜਕੀ ਦੀ ਹਾਲਤ ਗੰਭੀਰ ਦੱਸੀ ਗਈ ਹੈ। ਪੁਲਿਸ ਅਨੁਸਾਰ ਹਾਦਸਾ ਸਵੇਰੇ ਕਰੀਬ ਇਕ ਵਜੇ ਵਾਪਰਿਆ। 6 ਨਾਬਾਲਗਾਂ ਨਾਲ ਭਰੀ ਕਾਰ ਆਈ-95 ਤੋਂ ਵਾਸ਼ਿੰਗਟਨ ਐਵੇਨਿਊ ਵਾਲੇ ਰੈਂਪ ਰਾਹੀਂ ਬਾਹਰ ਨਿਕਲ ਰਹੀ ਸੀ। ਤੇਜ਼ ਰਫ਼ਤਾਰ ਨਾਲ ਮੋੜ ਕੱਟਦਿਆਂ ਕਾਰ ਫੁੱਟਪਾਥ ਦੇ ਕਿਨਾਰੇ ਨਾਲ ਟਕਰਾਈ, ਹਵਾ ’ਚ ਉੱਛਲੀ ਤੇ ਕ੍ਰਿਸਟੋਫਰ ਕੋਲੰਬਸ ਬੁਲੇਵਾਰਡ ਉੱਤੇ ਇਕ ਪਾਸੇ ਪਲਟ ਗਈ। ਬਚਾਅ ਕਰਮਚਾਰੀਆਂ ਨੇ ਕਾਰ ’ਚ ਫਸੇ ਸਾਰੇ 6 ਨਾਬਾਲਗਾਂ ਨੂੰ ਬਾਹਰ ਕੱਢਿਆ। ਜਦਕਿ 16 ਸਾਲਾ ਲੜਕੀ ਨੇ ਹਸਪਤਾਲ ’ਚ ਦਮ ਤੋੜ ਦਿੱਤਾ। 17 ਸਾਲਾ ਡਰਾਈਵਰ ਸਮੇਤ ਬਾਕੀ ਜ਼ਖ਼ਮੀਆਂ ਨੂੰ ਵੱਖ-ਵੱਖ ਹਸਪਤਾਲਾਂ ’ਚ ਦਾਖ਼ਲ ਕਰਵਾਇਆ ਗਿਆ ਹੈ।
