ਲੰਡਨ ਮੈਟ ਪੁਲਿਸ ਨੇ ਕੈਟਫੋਰਡ ਇਲਾਕੇ ਚੋਂ 40 ਲੱਖ ਪੌਂਡ ਨਕਦੀ ਅਤੇ 1 ਕਿੱਲੋ ਕੋਕੀਨ ਕੀਤੀ ਜ਼ਬਤ
ਅਜੀਤ ਡੈਸਕ
01-08-2026
ਪੁਲਿਸ ਵੱਲੋਂ ਦਿੱਤੀ ਜਾਣਕਾਰੀ ਅਨੁਸਾਰ ਕੈਟਫੋਰਡ ਵਿੱਚ ਸਭ ਤੋਂ ਪਹਿਲਾਂ ਇੱਕ ਕਾਰ ਨੂੰ ਰੋਕਿਆ, ਜਿਸ ਵਿੱਚੋਂ ਲਗਭਗ 35 ਹਜ਼ਾਰ ਪੌਂਡ ਨਕਦ ਬਰਾਮਦ ਹੋਏ। ਮੌਕੇ ‘ਤੇ ਹੀ ਇੱਕ 54 ਸਾਲਾ ਵਿਅਕਤੀ ਨੂੰ ਅਪਰਾਧਿਕ ਜਾਇਦਾਦ/ਧਨ ਰੱਖਣ ਦੇ ਸ਼ੱਕ ਹੇਠ ਗ੍ਰਿਫ਼ਤਾਰ ਕਰ ਲਿਆ ਗਿਆ।
ਇਸ ਤੋਂ ਬਾਅਦ ਜਦੋਂ ਉਸ ਨਾਲ ਸਬੰਧਤ ਇੱਕ ਗੁਪਤ ਠਿਕਾਣੇ ‘ਤੇ ਛਾਪਾ ਮਾਰਿਆ ਗਿਆ, ਤਾਂ ਦੋ ਬੈੱਡਰੂਮਾਂ ਵਿੱਚੋਂ ਝੋਲਿਆਂ ਵਿੱਚ ਛੁਪਾ ਕੇ ਰੱਖੀ ਲਗਭਗ 40 ਲੱਖ ਪੌਂਡ ਦੀ ਨਕਦੀ ਅਤੇ 1 ਕਿੱਲੋ ਕੋਕੀਨ ਬਰਾਮਦ ਹੋਈ।
ਮੈਟ ਪੁਲਿਸ ਅਨੁਸਾਰ ਇੰਨੀ ਵੱਡੀ ਮਾਤਰਾ ਵਿੱਚ ਗੈਰ-ਕਾਨੂੰਨੀ ਪੈਸਾ ਜ਼ਬਤ ਕਰਨਾ ਸੰਗਠਿਤ ਅਪਰਾਧਿਕ ਗਿਰੋਹਾਂ ਦੇ ਨੈੱਟਵਰਕ ਨੂੰ ਤੋੜਨ ਲਈ ਬੇਹੱਦ ਜ਼ਰੂਰੀ ਹੈ। ਪੁਲਿਸ ਨੇ ਕਿਹਾ ਕਿ ਅਪਰਾਧੀਆਂ ਦੀ ਆਰਥਿਕ ਕਮਰ ਤੋੜਨ ਨਾਲ ਲੰਡਨ ਭਰ ਵਿੱਚ ਹੋਣ ਵਾਲੀ ਗੰਭੀਰ ਹਿੰਸਾ ਨੂੰ ਘਟਾਉਣ ਵਿੱਚ ਵੱਡੀ ਮਦਦ ਮਿਲੀ ਹੈ। ਪੁਲਿਸ ਵੱਲੋਂ ਗ੍ਰਿਫ਼ਤਾਰ ਕੀਤੇ ਗਏ ਵਿਅਕਤੀ ਨੂੰ ਰਿਮਾਂਡ ਉੱਤੇ ਭੇਜ ਦਿੱਤਾ ਗਿਆ ਹੈ।
