ਟੋਹਾਣਾ, 28 ਮਾਰਚ (ਮਨਜੀਤ ਸਿੰਘ) - ਟੋਹਾਣਾ ਇਲਾਕੇ ਦੇ ਪਿੰਡ ਸਮੈਣ, ਕੰਨ੍ਹੜੀ, ਗਾਜੂਵਾਲਾ, ਪਿ੍ਥਲਾ, ਲਲੋਦਾ, ਪਾਰਤਾ, ਨਾਂਗਲਾ, ਨਾਂਗਲੀ, ਕਮਾਲਵਾਲਾ, ਬੱਲਿਆਲਾ, ਬਿਢਾਈ ਖੇੜਾ, ਡਾਂਗਰਾ, ਰੱਤਾਖੇੜਾ, ਸਨਿਆਣਾ, ਭੀਮੇਵਾਲਾ ਅਤੇ ਮਾਦੂਆਣਾ ਸਮੇਤ ਆਸ-ਪਾਸ ਦੇ ਪਿੰਡਾਂ ਵਿੱਚ ਇਸ ਸਮੇਂ ਖੇਤਾਂ ਵਿੱਚ 'ਪੀਲਾ ਸੋਨਾ' ਲਹਿਰਾ ਰਿਹਾ ਹੈ | ਕਣਕ ਦੀ ਫਸਲ ਪੂਰੀ ਤਰ੍ਹਾਂ ਪੱਕਣ ਦੇ ਨੇੜੇ ਹੈ ਜਿਸ ਨਾਲ ਕਿਸਾਨਾਂ ਦੇ ਚਿਹਰਿਆਂ 'ਤੇ ਖ਼ੁਸ਼ੀ ਸਾਫ਼ ਝਲਕਦੀ ਨਜ਼ਰ ਆ ਰਹੀ ਹੈ | ਕਿਸਾਨਾਂ ਦਾ ਕਹਿਣਾ ਹੈ ਕਿ ਜੇ ਮੌਸਮ ਸਹੀ ਰਿਹਾ ਤਾਂ 10 ਅਪ੍ਰੈਲ ਤੋਂ ਕਣਕ ਦੀ ਵਾਢੀ ਸ਼ੁਰੂ ਹੋ ਜਾਵੇਗੀ | ਕਈ ਪਿੰਡਾਂ ਵਿੱਚ ਵਾਢੀ ਲਈ ਤਿਆਰੀਆਂ ਵੀ ਸ਼ੁਰੂ ਹੋ ਚੁੱਕੀਆਂ ਹਨ ਅਤੇ ਕਿਸਾਨ ਆਪਣੀ ਫ਼ਸਲ ਨੂੰ ਸੁਰੱਖਿਅਤ ਘਰ ਲਿਆਉਣ ਲਈ ਪੂਰੀ ਤਰ੍ਹਾਂ ਤਿਆਰ ਹਨ | ਕਿਸਾਨਾਂ ਨੇ ਪਰਮ ਪਿਤਾ ਪ੍ਰਮਾਤਮਾ ਅੱਗੇ ਅਰਦਾਸ ਕੀਤੀ ਹੈ ਕਿ ਮੌਸਮ ਮਿਹਰਬਾਨ ਬਣਿਆ ਰਹੇ ਤਾਂ ਜੋ ਫ਼ਸਲ ਨੂੰ ਕਿਸੇ ਵੀ ਕਿਸਮ ਦਾ ਨੁਕਸਾਨ ਨਾ ਹੋਵੇ | ਇਸ ਵਾਰ ਫ਼ਸਲ ਦੀ ਹਾਲਤ ਚੰਗੀ ਹੋਣ ਕਰਕੇ ਕਿਸਾਨਾਂ ਵਿੱਚ ਕਾਫ਼ੀ ਉਤਸ਼ਾਹ ਹੈ ਅਤੇ ਵਧੀਆ ਪੈਦਾਵਾਰ ਦੀ ਉਮੀਦ ਕੀਤੀ ਜਾ ਰਹੀ ਹੈ | ਬੇਸ਼ੱਕ ਸਰ੍ਹੋਂ ਦੀ ਵਾਢੀ ਚੱਲ ਰਹੀ ਹੈ | ਪਿੰਡਾਂ ਵਿੱਚ ਇਸ ਸਮੇਂ ਖੇਤਾਂ ਦੀ ਸੁਨਹਿਰੀ ਰੌਣਕ ਹਰ ਕਿਸੇ ਨੂੰ ਆਪਣੇ ਵੱਲ ਖਿੱਚ ਰਹੀ ਹੈ, ਜਦਕਿ ਕਿਸਾਨ ਆਪਣੀ ਮਿਹਨਤ ਦਾ ਫਲ ਮਿਲਣ ਨੂੰ ਲੈ ਕੇ ਬਹੁਤ ਉਤਸ਼ਾਹਿਤ ਨਜ਼ਰ ਆ ਰਹੇ ਹਨ |
