ਜਲੰਧਰ, 30 ਜਨਵਰੀ (ਪਵਨ ਖਰਬੰਦਾ)- ਏ.ਪੀ.ਜੇ. ਸਕੂਲ ਮਹਾਂਵੀਰ ਮਾਰਗ 'ਚ 12ਵੀਂ ਜਮਾਤ ਦੇ ਵਿਦਿਆਰਥੀਆਂ ਲਈ ਵਿਦਾਇਗੀ ਸਮਾਰੋਹ ਬੜੇ ਹੀ ਉਤਸ਼ਾਹ ਨਾਲ ਕੀਤਾ ਗਿਆ | ਸਮਾਰੋਹ ਦਾ ਉਦੇਸ਼ ਵਿਦਿਆਰਥੀਆਂ ਨੂੰ ਉਨ੍ਹਾਂ ਦੀ ਸਕੂਲੀ ਯਾਤਰਾ ਦੀਆਂ ਸੁਹਾਵਣੀਆਂ ਯਾਦਾਂ ਨਾਲ ਰੁਖ਼ਸਤ ਕਰਨਾ ਅਤੇ ਭਵਿੱਖ ਲਈ ਸ਼ੁਭਕਾਮਨਾਵਾਂ ਦੇਣਾ ਸੀ | ਪ੍ਰੋਗਰਾਮ ਦਾ ਅਰੰਭ ਪਿ੍ੰਸੀਪਲ ਸ਼੍ਰੀ ਯਸ਼ਪਾਲ ਸ਼ਰਮਾ ਅਤੇ ਵਾਈਸ ਪਿ੍ੰਸੀਪਲ ਆਰਤੀ ਸ਼ੋਰੀ ਭੱਟ ਨੇ ਦੀਪ ਜਲਾ ਕੇ ਕੀਤਾ | ਪ੍ਰੋਗਰਾਮ ਦੀ ਸ਼ੁਰੂਆਤ ਸੁਰੀਲੇ ਸੰਗੀਤ ਨਾਲ ਹੋਈ | ਇਸ ਤੋਂ ਬਾਅਦ ਵਿਦਿਆਰਥੀਆਂ ਵੱਲੋਂ ਪੇਸ਼ ਕੀਤੇ ਗਏ ਰੰਗਾਰੰਗ ਨਿ੍ਤ (ਡਾਂਸ) ਨੇ ਦਰਸ਼ਕਾਂ ਦਾ ਮਨ ਮੋਹ ਲਿਆ | ਸਕੂਲ ਦੇ ਹੈੱਡ ਬੁਆਏ ਦਿੱਗਵਿਜੇ ਮਾਗੋ ਤੇ ਹੈੱਡ ਗਰਲ ਸਿਹਰ ਮਲਹੋਤਰਾ ਨੇ ਆਪਣੇ ਭਾਸ਼ਣ ਰਾਹੀਂ ਸਕੂਲ ਵਿੱਚ ਬਿਤਾਏ ਪਲਾਂ ਨੂੰ ਸਾਂਝਾ ਕੀਤਾ | ਸਮਾਰੋਹ ਦੌਰਾਨ ਮਨੋਰੰਜਕ ਗੇਮਜ਼ ਵੀ ਕਰਵਾਈਆਂ ਗਈਆਂ | ਵਿਦਿਆਰਥੀਆਂ ਦੀ ਸ਼ਖ਼ਸੀਅਤ ਤੇ ਪ੍ਰਤੀਭਾ ਨੂੰ ਨਿਖਾਰਨ ਲਈ ਵੈੱਲ ਡ੍ਰੈਸ, ਅਰਲੀ ਬਰਡ ਤੇ ਮਿਸ ਐਂਡ ਮਾਸਟਰ ਮੁਕਾਬਲੇ ਕਰਵਾਏ ਗਏ | ਦਿੱਗਵਿਜੇ ਮਾਗੋ ਨੇ ਮਾਸਟਰ ਏ.ਪੀ.ਜੇ. ਤੇ ਸਿਹਰ ਮਲਹੋਤਰਾ ਨੇ ਮਿਸ ਏ.ਪੀ.ਜੇ. ਦਾ ਖਿਤਾਬ ਹਾਸਿਲ ਕੀਤਾ | ਅਕਸ਼ਿਤਾ ਬਲੂਜਾ ਮਿਸ ਰਨਰ ਅੱਪ ਤੇ ਅਰਜੁਨ ਕੁਮਾਰ ਮਾਸਟਰ ਰਨਰ ਅੱਪ ਰਹੇ | ਵਿਦਿਆਰਥੀਆਂ ਦੇ ਗੁਣਾਂ ਨੂੰ ਦੇਖਦਿਆਂ ਹੋਇਆਂ ਉਨ੍ਹਾਂ ਨੂੰ ਮੋਸਟ ਕੋਪਰੇਟਿਵ, ਮੋਸਟ ਰੈਗੂਲਰ, ਮੋਸਟ ਡਸਿਪਲਿਨ, ਮੋਸਟ ਇਨੋਵੇਟਿਵ, ਮੋਸਟ ਫਰੈਂਡਲੀ ਇਨਾਮਾਂ ਨਾਲ ਸਨਮਾਨਿਤ ਕੀਤਾ ਗਿਆ | ਇਸ ਮੌਕੇ 12ਵੀਂ ਜਮਾਤ ਨਾਲ ਸੰਬੰਧਿਤ ਯਾਦਗਾਰ ਵੀਡੀਓ ਵੀ ਦਿਖਾਈ ਗਈ | ਸਮਾਰੋਹ ਦੇ ਅੰਤ ਵਿੱਚ ਸਕੂਲ ਦੇ ਪਿ੍ੰਸੀਪਲ ਯਸ਼ ਪਾਲ ਸ਼ਰਮਾ ਨੇ ਵਿਦਿਆਰਥੀਆਂ ਨੂੰ ਉਨ੍ਹਾਂ ਦੀ ਮਿਹਨਤ, ਅਨੁਸ਼ਾਸਨ ਤੇ ਉਪਲਬਧੀਆਂ ਦੀ ਸ਼ਲਾਘਾ ਕੀਤੀ ਤੇ ਉਨ੍ਹਾਂ ਨੂੰ ਭਵਿੱਖ ਲਈ ਸ਼ੁਭਕਾਮਨਾਵਾਂ ਦਿੱਤੀਆਂ |
