ਮਲੋਟ, 21 ਜੁਲਾਈ (ਪਾਟਿਲ)-ਡੀ.ਏ.ਵੀ. ਕਾਲਜ ਮਲੋਟ ਦੇ ਕਾਰਜਕਾਰੀ ਪ੍ਰਿੰਸੀਪਲ ਸੁਦੇਸ਼ ਗਰੋਵਰ ਅਤੇ ਐਸੋਸੀਏਟ ਐੱਨ.ਸੀ.ਸੀ. ਅਫ਼ਸਰ ਕੈਪਟਨ (ਡਾ.) ਮੁਕਤਾ ਮੁਟਨੇਜਾ ਦੀ ਰਹਿਨੁਮਾਈ ਹੇਠ ਕਾਲਜ ਦੇ ਸੱਤ ਐੱਨ.ਸੀ.ਸੀ. ਕੈਡਿਟਾਂ ਨੇ ਪੋਂਗ ਡੈਮ ਕਾਂਗੜਾ ਵਿਖੇ ਲਗਾਏ ਐਡਵੈਂਚਰ ਕੈਂਪ ਵਿਚ ਭਾਗ ਲੈ ਕੇ ਰੋਮਾਂਚ ਤੇ ਸਾਹਸ ਨਾਲ ਭਰਪੂਰ ਅਨੁਭਵ ਪ੍ਰਾਪਤ ਕੀਤਾ। ਕੈਂਪ ਦੌਰਾਨ ਕੈਡਿਟਾਂ ਨੇ ਕਾਯਾਕਿੰਗ, ਰਾਫਟਿੰਗ, ਫੋਇਲ ਸਰਫਬੋਰਡਿੰਗ ਤੇ ਤੈਰਾਕੀ ਵਰਗੀਆਂ ਵੱਖ-ਵੱਖ ਸਾਹਸਿਕ ਅਤੇ ਜਲ-ਆਧਾਰਿਤ ਗਤੀਵਿਧੀਆਂ ਵਿਚ ਭਾਗ ਲਿਆ। ਇਨ੍ਹਾਂ ਗਤੀਵਿਧੀਆਂ ਰਾਹੀਂ ਕੈਡਿਟਾਂ ਨੇ ਨਾ ਸਿਰਫ਼ ਨਵੇਂ ਸਾਹਸਿਕ ਹੁਨਰ ਸਿੱਖੇ, ਸਗੋਂ ਆਤਮ-ਵਿਸ਼ਵਾਸ, ਹਿੰਮਤ, ਅਨੁਸ਼ਾਸਨ, ਟੀਮ ਭਾਵਨਾ, ਲੀਡਰਸ਼ਿਪ ਯੋਗਤਾ ਤੇ ਚੁਣੌਤੀਪੂਰਨ ਸਥਿਤੀਆਂ ਦਾ ਡਟ ਕੇ ਸਾਹਮਣਾ ਕਰਨ ਵਰਗੇ ਮਹੱਤਵਪੂਰਨ ਜੀਵਨ-ਮੁੱਲ ਵੀ ਵਿਕਸਿਤ ਕੀਤੇ। ਕਮਾਂਡਿੰਗ ਅਫ਼ਸਰ ਲੈਫ਼ਟੀਨੈਂਟ ਕਰਨਲ ਭੁਪਿੰਦਰ ਸਿੰਘ ਮਾਨ ਨੇ ਕੈਡਿਟਾਂ ਦੀ ਸਰਗਰਮ ਭਾਗੀਦਾਰੀ ਤੇ ਜੋਸ਼ ਦੀ ਸ਼ਲਾਘਾ ਕੀਤੀ। ਇਸ ਮੌਕੇ ਕਾਲਜ ਦੇ ਸਮੂਹ ਸਟਾਫ਼ ਨੇ ਸਾਰੇ ਕੈਡਿਟਾਂ ਨੂੰ ਉਨ੍ਹਾਂ ਦੀ ਸ਼ਾਨਦਾਰ ਭਾਗੀਦਾਰੀ ਲਈ ਵਧਾਈ ਦਿੱਤੀ।
