ਕਪੂਰਥਲਾ, 11 ਜੂਨ (ਸਡਾਨਾ)-ਵਾਰਡ ਨੰਬਰ 5 ਤੋਂ ਆਮ ਆਦਮੀ ਪਾਰਟੀ ਦੇ ਨਵੇਂ ਚੁਣੇ ਗਏ ਕੌਂਸਲਰ ਆਰਕੀਟੈਕਟ ਜਸਜੀਤ ਸਿੰਘ ਢੋਟ ਵਲੋਂ ਅੱਜ ਸਥਾਨਕ ਮਾਲ ਰੋਡ, ਡੀ.ਸੀ. ਚੌਂਕ ਤੇ ਕੈਮਰਾ ਬਾਗ ਵਿਖੇ ਸਟਰੀਟ ਲਾਈਟਾਂ ਦੀ ਮੁਰੰਮਤ ਸ਼ੁਰੂ ਕਰਵਾਈ ਗਈ | ਇਸ ਸਬੰਧੀ ਕੌਂਸਲਰ ਜਸਜੀਤ ਸਿੰਘ ਢੋਟ ਤੇ ਪਰਵਿੰਦਰ ਸਿੰਘ ਢੋਟ ਜ਼ਿਲ੍ਹਾ ਇੰਚਾਰਜ ਵਿਰਾਸਤ ਸੇਵਾ ਸੰਗਠਨ ਨੇ ਦੱਸਿਆ ਕਿ ਮਾਲ ਰੋਡ 'ਤੇ ਸਟਰੀਟ ਲਾਈਟਾਂ ਸੁਚਾਰੂ ਰੂਪ ਵਿਚ ਕੰਮ ਨਹੀਂ ਸੀ ਕਰ ਰਹੀਆਂ ਤੇ ਕੈਮਰਾ ਬਾਗ ਸੈਰਗਾਹ ਵਿਖੇ ਵੀ ਤਾਰ ਦੀ ਖ਼ਰਾਬੀ ਕਾਰਨ ਲਾਈਟਾਂ ਕਾਫੀ ਸਮੇਂ ਤੋਂ ਬੰਦ ਸਨ | ਉਨ੍ਹਾਂ ਦੱਸਿਆ ਕਿ ਇਸ ਸਬੰਧੀ ਨਵੀਂ ਤਾਰ ਪਵਾਈ ਗਈ ਅਤੇ ਕੈਮਰਾ ਬਾਗ ਦੇ ਨਾਲ-ਨਾਲ ਬੰਦ ਪਈਆਂ ਮਾਲ ਰੋਡ ਦੀਆਂ ਸਟਰੀਟ ਲਾਈਟਾਂ ਨੂੰ ਠੀਕ ਕਰਵਾਉਣ ਦਾ ਕੰਮ ਸ਼ੁਰੂ ਕਰਵਾਇਆ ਗਿਆ ਹੈ | ਕੌਂਸਲਰ ਢੋਟ ਨੇ ਦੱਸਿਆ ਕਿ ਮਾਲ ਰੋਡ ਉਨ੍ਹਾਂ ਦੇ ਵਾਰਡ ਦੇ ਅਧੀਨ ਆਉਂਦਾ ਹੈ ਤੇ ਉਨ੍ਹਾਂ ਦੀ ਪੂਰੀ ਕੋਸ਼ਿਸ਼ ਹੈ ਕਿ ਉਹ ਇਸ ਨੂੰ ਖ਼ੂਬਸੂਰਤ ਬਣਾਉਣ, ਜਿਸ ਲਈ ਆਉਂਦੇ ਦਿਨਾਂ ਦੌਰਾਨ ਹੋਰ ਵੀ ਉਪਰਾਲੇ ਕੀਤੇ ਜਾਣਗੇ | ਇਸ ਮੌਕੇ ਉਨ੍ਹਾਂ ਦੇ ਨਾਲ ਹਰਦੇਵ ਸਿੰਘ ਤੇ ਸਿਮਰਪ੍ਰੀਤ ਸਿੰਘ ਵੀ ਹਾਜ਼ਰ ਸਨ |
