ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਭੁਲੱਥ ਦੇ ਗਰਾਊਂਡ ਵਿਚ ਜਲਦ ਬਣੇਗੀ ਆਧੁਨਿਕ ਬਾਕਸ ਕਿ੍ਕਟ ਸਹੂਲਤ : ਡਿਪਟੀ ਕਮਿਸ਼ਨਰ

ਭੁਲੱਥ, 3 ਸਤੰਬਰ (ਮੇਹਰ ਚੰਦ ਸਿੱਧੂ)-ਖੇਡਾਂ ਦੇ ਬੁਨਿਆਦੀ ਢਾਂਚੇ ਨੂੰ ਹੁਲਾਰਾ ਦੇਣ ਅਤੇ ਨੌਜਵਾਨਾਂ ਨੂੰ ਉਸਾਰੂ ਗਤੀਵਿਧੀਆਂ ਨਾਲ ਜੋੜਨ ਦੇ ਮਕਸਦ ਨਾਲ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ, ਖੱਸਣ, ਭੁਲੱਥ ਦੇ ਗਰਾਊਂਡ ਵਿਚ ਬਾਕਸ ਕਿ੍ਕਟ ਵਿਕਸਿਤ ਕੀਤੀ ਜਾਵੇਗੀ | ਡਿਪਟੀ ਕਮਿਸ਼ਨਰ ਆਕਾਸ਼ ਬਾਂਸਲ ਨੇ ਦੱਸਿਆ ਕਿ ਇਸ ਪ੍ਰਾਜੈਕਟ ਨੂੰ ਪਹਿਲਾਂ ਹੀ ਪ੍ਰਸ਼ਾਸਨਿਕ ਮਨਜ਼ੂਰੀ ਮਿਲ ਚੁੱਕੀ ਹੈ ਅਤੇ ਜਲਦ ਹੀ ਟੈਂਡਰ ਅਲਾਟ ਕੀਤੇ ਜਾਣਗੇ | ਉਨ੍ਹਾਂ ਦੱਸਿਆ ਕਿ ਪ੍ਰਸਤਾਵਿਤ ਗਰਾਊਂਡ, ਜਿਸ ਦਾ ਕਵਰਡ ਖੇਤਰ ਲਗਭਗ 6,000 ਵਰਗ ਫੁੱਟ ਹੋਵੇਗਾ, ਨੂੰ ਕੰਮ ਸ਼ੁਰੂ ਹੋਣ ਤੋਂ ਦੋ ਮਹੀਨਿਆਂ ਦੇ ਅੰਦਰ ਮੁਕੰਮਲ ਕਰ ਲਿਆ ਜਾਵੇਗਾ | ਉਨ੍ਹਾਂ ਕਿਹਾ ਕਿ ਮਿਆਰੀ ਬਾਕਸ ਕਿ੍ਕਟ ਗਰਾਊਂਡ ਇੱਕ ਛੋਟਾ, ਪੂਰੀ ਤਰ੍ਹਾਂ ਘਿਰਿਆ ਹੋਇਆ ਆਇਤਾਕਾਰ ਮੈਦਾਨ ਹੁੰਦਾ ਹੈ, ਜਿਸ ਵਿਚ ਨਕਲੀ ਘਾਹ, ਉੱਚ ਸੁਰੱਖਿਆ ਜਾਲ ਅਤੇ ਤੇਜ਼ ਰਫ਼ਤਾਰ ਮਨੋਰੰਜਕ ਖੇਡ ਲਈ ਏਕੀਕਿ੍ਤ ਫਲੱਡ ਲਾਈਟਾਂ ਹੁੰਦੀਆਂ ਹਨ | ਇਸ ਸਹੂਲਤ ਦੀ ਵਰਤੋਂ ਸਥਾਨਕ ਟੂਰਨਾਮੈਂਟਾਂ, ਕੋਚਿੰਗ ਸੈਸ਼ਨਾਂ ਅਤੇ ਦੋਸਤਾਨਾ ਮੈਚਾਂ ਲਈ ਵੀ ਕੀਤੀ ਜਾਵੇਗੀ | ਡਿਪਟੀ ਕਮਿਸ਼ਨਰ ਨੇ ਕਿਹਾ ਕਿ ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਦੀ ਅਗਵਾਈ ਵਾਲੀ ਪੰਜਾਬ ਸਰਕਾਰ ਸੂਬੇ ਭਰ ਵਿਚ ਆਧੁਨਿਕ ਖੇਡ ਬੁਨਿਆਦੀ ਢਾਂਚਾ ਤਿਆਰ ਕਰਕੇ ਨੌਜਵਾਨਾਂ ਵਿਚ ਖੇਡਾਂ ਨੂੰ ਉਤਸ਼ਾਹਿਤ ਕਰਨ ਲਈ ਵਚਨਬੱਧ ਹੈ | ਉਨ੍ਹਾਂ ਕਿਹਾ ਕਿ ਅਜਿਹੇ ਪ੍ਰਾਜੈਕਟ ਨਾ ਸਿਰਫ਼ ਖੇਡ ਪ੍ਰਤਿਭਾ ਨੂੰ ਨਿਖਾਰਨਗੇ, ਸਗੋਂ ਇੱਕ ਸਿਹਤਮੰਦ, ਵਧੇਰੇ ਅਨੁਸ਼ਾਸਿਤ ਅਤੇ ਨਸ਼ਾ-ਮੁਕਤ ਸਮਾਜ ਦੀ ਉਸਾਰੀ ਵਿਚ ਵੀ ਯੋਗਦਾਨ ਪਾਉਣਗੇ |