ਭੁਲੱਥ ਵਿਖੇ ‘ਨੂਰ ਜੋਤਾਂ ਵਾਲੀ-2026’ ਅਧਿਆਤਮਿਕ ਸਮਾਗਮ ਦਾ ਅੱਜ ਤੋਂ, ਤਿਆਰੀਆਂ ਮੁਕੰਮਲ

ਭੁਲੱਥ, 14 ਅਕਤੂਬਰ (ਮਨਜੀਤ ਸਿੰਘ ਰਤਨ)-ਮਾਂ ਚਿੰਤਪੁਰਨੀ ਜੀ ਦੀ ਅਪਾਰ ਕਿਰਪਾ ਸਦਕਾ ਭੁਲੱਥ ਵਿਖੇ ਪੰਜ ਦਿਨਾਂ ਅਧਿਆਤਮਿਕ ਅਤੇ ਰੂਹਾਨੀਅਤ ਨਾਲ ਭਰਪੂਰ ਸਮਾਗਮ ‘ਨੂਰ ਜੋਤਾਂ ਵਾਲੀ-2026’ ਦਾ ਸ਼ੁੱਭ ਆਰੰਭ ਅੱਜ ਤੋਂ ਹੋਣ ਜਾ ਰਿਹਾ ਹੈ | ਸਮਾਗਮ ਵਿਚ 22 ਸ਼੍ਰੀ ਸਿੱਧ ਸ਼ਕਤੀਪੀਠਾਂ ਤੋਂ ਮਾਂ ਦੀਆਂ ਪਵਿੱਤਰ ਜੋਤਾਂ ਦਾ ਆਗਮਨ ਵਿਸ਼ੇਸ਼ ਖਿੱਚ ਦਾ ਕੇਂਦਰ ਰਹੇਗਾ | ਜੇਐਮਡੀ ਸੇਵਾਦਾਰ ਪਰਿਵਾਰ ਦੇ ਮੈਂਬਰਾਂ ਨੇ ਦੱਸਿਆ ਕਿ ਅੱਜ 15 ਅਕਤੂਬਰ ਨੂੰ ਸ਼ਾਮ 5 ਵਜੇ ਮਾਂ ਦੀਆਂ ਪਵਿੱਤਰ ਜੋਤਾਂ ਦੇ ਆਗਮਨ ਸਬੰਧੀ ਅਲੌਕਿਕ ਸ਼ੋਭਾ ਯਾਤਰਾ ਸਜਾਈ ਜਾਵੇਗੀ | ਸ਼ੋਭਾ ਯਾਤਰਾ ਉਪਰੰਤ ਇਨ੍ਹਾਂ ਪਵਿੱਤਰ ਜੋਤਾਂ ਨੂੰ ਸ਼੍ਰੀ ਰਾਧੇ-ਸ਼ਿਆਮ ਮੰਦਰ, ਭੁਲੱਥ ਵਿਖੇ ਮਾਂ ਦੇ ਸੁੰਦਰ ਭਵਨਾਂ ਵਿਚ ਆਸਣ ਦਿੱਤਾ ਜਾਵੇਗਾ, 16 ਅਕਤੂਬਰ ਤੋਂ ਸਵੇਰੇ ਅਤੇ ਸ਼ਾਮ ਮਾਂ ਦੀ ਸ਼ਾਹੀ ਆਰਤੀ ਹੋਵੇਗੀ ਤੇ ਸ਼ਾਮ 8 ਵਜੇ ਬਾਬਾ ਬਾਲਕ ਨਾਥ ਜੀ ਦੀ ਚੌਂਕੀ ਕਰਵਾਈ ਜਾਵੇਗੀ | ਇਸ ਮੌਕੇ ਸ਼੍ਰੀ ਸ਼੍ਰੀ 1008 ਮਹਾਨ ਸੰਤ ਅਤੇ ਤਪੱਸਵੀ ਮਹੰਤ ਰਾਜਿੰਦਰ ਗਿਰੀ ਜੀ ਮਹਾਰਾਜ ਸੰਗਤਾਂ ਨੂੰ ਦਰਸ਼ਨ ਦੇਣ ਲਈ ਪਹੁੰਚਣਗੇ | ਬਾਬਾ ਬਾਲਕ ਨਾਥ ਜੀ ਦਾ ਗੁਣਗਾਨ ਕਰਨ ਲਈ ਪ੍ਰਸਿੱਧ ਗਾਇਕ ਅਰੁਣ ਗੋਸਵਾਮੀ ਵੀ ਵਿਸ਼ੇਸ਼ ਤੌਰ ‘ਤੇ ਸ਼ਿਰਕਤ ਕਰਨਗੇ | 17 ਅਕਤੂਬਰ ਨੂੰ ‘ਏਕ ਸ਼ਾਮ ਨੰਗਲੀ ਵਾਲੇ ਕੇ ਨਾਮ’ ਸਮਾਗਮ ਕਰਵਾਇਆ ਜਾਵੇਗਾ | 18 ਅਕਤੂਬਰ ਨੂੰ ਦੁਪਹਿਰ ਸਮੇਂ ਸਰਬੱਤ ਦੇ ਭਲੇ ਦੀ ਕਾਮਨਾ ਨਾਲ ਪਾਵਨ ਸ਼੍ਰੀ ਦੁਰਗਾ ਸਤੁਤੀ ਜੀ ਦੇ 105 ਪਾਠ ਕੀਤੇ ਜਾਣਗੇ | 19 ਅਕਤੂਬਰ ਨੂੰ ਸਵੇਰੇ 10 ਵਜੇ ਸ਼੍ਰੀ ਅਸ਼ਟਮੀ ਦੇ ਪਾਵਨ ਮੌਕੇ ‘ਤੇ 301 ਕੰਜ਼ਕਾਂ ਦਾ ਪੂਜਣ ਕੀਤਾ ਜਾਵੇਗਾ | 20 ਅਕਤੂਬਰ ਨੂੰ ਸਵੇਰੇ 11 ਵਜੇ ਵਿਸ਼ੇਸ਼ ਭੋਗ ਪਾਏ ਜਾਣਗੇ | ਇਸ ਉਪਰੰਤ ਸ਼੍ਰੀ ਕੰਜ਼ਕ ਪੂਜਣ ਕੀਤਾ ਜਾਵੇਗਾ ਅਤੇ ਮਾਂ ਦੀਆਂ ਪਵਿੱਤਰ ਜੋਤਾਂ ਦੀ ਵਾਪਸੀ ਹੋਵੇਗੀ |