08-01-2026

 ਨਿੱਜੀ ਹਸਪਤਾਲਾਂ ਦੀ ਲੁੱਟ
ਸੂਬੇ 'ਚ ਨਿੱਜੀ ਹਸਪਤਾਲਾਂ ਦੀ ਤਾਦਾਦ ਦਿਨ-ਬ-ਦਿਨ ਵਧਦੀ ਜਾ ਰਹੀ ਹੈ। ਨਿੱਜੀ ਹਸਪਤਾਲ ਇੰਨੇ ਜ਼ਿਆਦਾ ਬਿੱਲ ਬਣਾ ਦਿੰਦੇ ਹਨ ਕਿ ਆਮ ਲੋਕ ਇਨ੍ਹਾਂ ਹਸਪਤਾਲਾਂ ਵਿਚ ਜਾਣ ਤੋਂ ਡਰਦੇ ਹਨ। ਨਿੱਜੀ ਹਸਪਤਾਲਾਂ ਵਾਲੇ ਲੋਕਾਂ ਨੂੰ ਠੀਕ ਕਰਨ ਦਾ ਝਾਂਸਾ ਦੇ ਕੇ ਉਨ੍ਹਾਂ ਨੂੰ ਲੁੱਟਦੇ ਹਨ। ਸਰਕਾਰ ਮਰੀਜ਼ਾਂ ਨੂੰ ਇਨ੍ਹਾਂ ਦੀ ਲੁੱਟ ਤੋਂ ਬਚਾਉਣ ਲਈ ਉਨ੍ਹਾਂ ਦਾ ਵਧੀਆ ਤੇ ਮੁਫ਼ਤ ਇਲਾਜ ਸਰਕਾਰੀ ਹਸਪਤਾਲਾਂ 'ਚ ਕਰਵਾਉਣਾ ਚਾਹੀਦਾ ਹੈ।

-ਲਵਪ੍ਰੀਤ ਕੌਰ

ਧੋਖਾਧੜੀ ਤੋਂ ਰਹੋ ਸੁਚੇਤ

ਅਜੋਕੇ ਸਮੇਂ ਵਿਚ ਠੱਗੀ ਤੇ ਧੋਖਾਧੜੀ ਦੇ ਨਿੱਤ ਨਵੇਂ ਤਰੀਕੇ ਆ ਰਹੇ ਹਨ। ਜਿਨ੍ਹਾਂ ਤੋਂ ਸੁਚੇਤ ਰਹਿਣਾ ਸਾਡੇ ਲਈ ਬਹੁਤ ਜ਼ਰੂਰੀ ਹੈ। ਬੀਤੇ ਦਿਨ ਵੀ ਵਾਇਰਲ ਹੋ ਰਹੀ ਇਕ ਖ਼ਬਰ ਜਿਸ ਵਿਚ ਮੋਗਾ ਦਾ ਜਨਮਿਆ ਤੇ ਦੁਬਈ ਤੋਂ ਪਰਤਿਆ ਦੀਪਕ ਵੀ ਧੋਖੇ ਦਾ ਸ਼ਿਕਾਰ ਹੋ ਗਿਆ। ਦੀਪਕ ਦੀ 3 ਸਾਲ ਪਹਿਲਾਂ ਸੋਸ਼ਲ ਮੀਡੀਆ 'ਤੇ ਇਕ ਲੜਕੀ ਨਾਲ ਦੋਸਤੀ ਹੋ ਗਈ ਅਤੇ ਪਿਆਰ ਵਿਚ ਬਦਲ ਕੇ ਵਿਆਹ ਤੱਕ ਪੁੱਜ ਗਈ, ਲੜਕੀ ਦੀ ਸ਼ਰਤ ਸੀ ਕਿ ਉਹ ਵਿਆਹ ਤੋਂ ਪਹਿਲਾਂ ਆਪਣਾ ਮੂੰਹ ਨਹੀਂ ਦਿਖਾਏਗੀ। ਲੜਕਾ ਫਿਰ ਵੀ ਮੰਨ ਗਿਆ। ਪਿਆਰ ਅੰਨ੍ਹਾ ਹੁੰਦਾ ਹੈ ਸਿਰਫ਼ ਸੁਣਿਆ ਸੀ, ਅੱਜ ਦੇਖ ਵੀ ਲਿਆ। ਆਪਣੇ ਆਪ ਨੂੰ ਵਕੀਲ ਦੱਸਣ ਵਾਲੀ ਲੜਕੀ ਮਨਪ੍ਰੀਤ ਨੇ ਵਿਆਹ ਦੇ ਪ੍ਰਬੰਧਾਂ ਲਈ ਦੀਪਕ ਤੋਂ 50,000 ਰੁਪਏ ਲਏ। ਜਦੋਂ ਦੀਪਕ ਡੇਢ ਸੌ ਬਰਾਤੀਆਂ ਨਾਲ ਬਾਰਾਤ ਲੈ ਕੇ ਪਹੁੰਚਿਆ ਤਾਂ ਉਹ ਪੈਲੇਸ ਹੀ ਸ਼ਹਿਰ ਵਿਚ ਮੌਜੂਦ ਨਹੀਂ ਸੀ, ਜਿਥੇ ਵਿਆਹ ਹੋਣਾ ਸੀ। ਦੀਪਕ ਨੇ ਮਨਪ੍ਰੀਤ ਨਾਲ ਗੱਲ ਕਰਨੀ ਚਾਹੀ ਤਾਂ ਫ਼ੋਨ ਬੰਦ ਆ ਰਿਹਾ ਸੀ। ਦੀਪਕ ਧੋਖਾਧੜੀ ਦਾ ਸ਼ਿਕਾਰ ਹੋ ਚੁੱਕਿਆ ਸੀ। ਦੀਪਕ ਨੇ ਪੁਲਿਸ ਥਾਣੇ ਵਿਚ ਐੱਫ.ਆਈ.ਆਰ. ਦਰਜ ਕਰਵਾ ਦਿੱਤੀ ਪਰੰਤੂ ਅਜੇ ਤੱਕ ਲੜਕੀ ਅਤੇ ਧੋਖਾ ਕਰਨ ਵਾਲਿਆਂ ਦੀ ਕੋਈ ਉੱਘ ਸੁੱਘ ਨਹੀਂ ਮਿਲੀ। ਇਹ ਕੋਈ ਪਹਿਲੀ ਘਟਨਾ ਨਹੀਂ ਡਿਜੀਟਲ ਅਰੈਸਟ ਵਰਗੀਆਂ ਘਟਨਾਵਾਂ ਰੋਜ਼ ਵਾਪਰਦੀਆਂ ਰਹਿੰਦੀਆਂ ਹਨ। ਸੋਸ਼ਲ ਮੀਡੀਆ ਨੇ ਆਪਣਿਆਂ ਵਿਚ ਦਰਾਰਾਂ ਪਾ ਕੇ ਅਣਜਾਣ ਲੋਕਾਂ ਵੱਲ ਖਿੱਚ ਨੂੰ ਵਧਾਇਆ ਹੈ। ਜਿਨ੍ਹਾਂ ਨੂੰ ਅਸੀਂ ਜਾਣਦੇ ਤੱਕ ਨਹੀਂ ਕੁਝ ਸਮੇਂ ਵਿਚ ਹੀ ਅਸੀਂ ਉਨ੍ਹਾਂ ਨੂੰ ਆਪਣੇ ਬਣਾ ਕੇ ਸਭ ਕੁਝ ਗਵਾ ਲੈਂਦੇ ਹਾਂ। ਸੋਸ਼ਲ ਮੀਡੀਆ ਦੀ ਵਰਤੋਂ ਕਰਦੇ ਸਮੇਂ ਅਣਜਾਣ ਵਿਅਕਤੀਆਂ ਨੂੰ ਆਪਣੀ ਨਿੱਜੀ ਜਾਣਕਾਰੀ ਦੱਸਣਾ ਧੋਖਾਧੜੀ ਦੀ ਪਹਿਲੀ ਪੌੜੀ ਹੈ।

-ਰਜਵਿੰਦਰ ਪਾਲ ਸ਼ਰਮਾ

ਲੇਖ 'ਚ ਵਡਮੁੱਲੀ ਜਾਣਕਾਰੀ

ਡਾ. ਸਾਧੂ ਸਿੰਘ ਹਮਦਰਦ ਹੋਰਾਂ ਨੂੰ ਯਾਦ ਕਰਦਿਆਂ ਸਤਨਾਮ ਸਿੰਘ ਮਾਣਕ ਦੀ ਰਚਨਾ ਪੰਜਾਬ ਤੇ ਦੇਸ਼ ਲਈ ਡਾ. ਸਾਧੂ ਸਿੰਘ ਹਮਦਰਦ ਦਾ ਯੋਗਦਾਨ ਪੜ੍ਹੀ, ਜਿਸ ਬਾਰੇ ਲੇਖਕ ਨੇ ਉਨ੍ਹਾਂ ਦੀ ਜੀਵਨੀ ਅਤੇ ਪੱਤਰਕਾਰੀ ਵਿਚ ਉਨ੍ਹਾਂ ਦੇ ਪਾਏ ਯੋਗਦਾਨ ਬਾਰੇ ਵਡਮੁੱਲੀ ਜਾਣਕਾਰੀ ਦਿੱਤੀ ਹੈ, ਕਾਬਲੇ ਗ਼ੌਰ ਸੀ। ਡਾ. ਸਾਧੂ ਸਿੰਘ ਹਮਦਰਦ ਆਜ਼ਾਦੀ ਸੰਗਰਾਮੀ, ਪੱਤਰਕਾਰ ਤੇ ਸੰਪਾਦਕ ਸਨ। ਉਹ ਉਰਦੂ ਅਤੇ ਪੰਜਾਬੀ ਦੋਵੇਂ ਭਾਸ਼ਾਵਾਂ ਵਿਚ ਪ੍ਰਬੀਨ ਸਨ। ਨਵੇਕਲੀ ਕਿਸਮ ਦੇ ਕਵੀ ਸਨ। ਉਹ ਰੋਜ਼ਾਨਾ ਅਜੀਤ ਦੇ ਮੁੱਖ ਸੰਪਾਦਕ ਸਨ। ਜਦੋਂ ਦੀ ਹੋਸ਼ ਸੰਭਾਲੀ ਹੈ ਇਸ ਅਖ਼ਬਾਰ ਨੂੰ ਪੜ੍ਹ ਰਿਹਾ ਹਾਂ, ਇਹ ਅਖ਼ਬਾਰ ਪੰਜਾਬੀਆਂ ਦੀ ਆਵਾਜ਼ ਹੈ।

-ਗੁਰਮੀਤ ਸਿੰਘ ਵੇਰਕਾ

ਸੜਕਾਂ ਦੀ ਹਾਲਤ ਹੋਵੇ ਦਰੁਸਤ

ਕਿਸੇ ਰਾਜ ਦੀ ਉੱਨਤੀ ਨੂੰ ਮਾਪਣ ਦਾ ਸਭ ਤੋਂ ਉੱਤਮ ਜ਼ਰੀਆ ਸੜਕਾਂ ਹੁੰਦੀਆਂ ਹਨ। ਜਿਸ ਰਾਜ ਦੀਆਂ ਸੜਕਾਂ ਸਾਫ਼ ਸੁਥਰੀਆਂ ਅਤੇ ਸੁਰੱਖਿਅਤ ਹਨ, ਸੈਲਾਨੀ ਉਸ ਰਾਜ ਨੂੰ ਵਧੀਆ ਰਾਜ ਦਾ ਦਰਜਾ ਦਿੰਦੇ ਹਨ। ਸੜਕਾਂ ਵਪਾਰ ਨੂੰ ਖਿੱਚਣ ਲਈ ਵੀ ਕਾਫੀ ਸਹਾਈ ਹੁੰਦੀਆਂ ਹਨ। ਜਿਥੇ ਸੜਕਾਂ ਦੀ ਹਾਲਤ ਵਧੀਆ ਹੋਵੇਗੀ, ਉੱਥੇ ਆਵਾਜਾਈ ਵੀ ਵਧੀਆ ਹੋਵੇਗੀ। ਪਰ ਬਹੁਤੇ ਇਲਾਕਿਆਂ ਵਿਚ ਸੜਕਾਂ ਦਾ ਬੁਰਾ ਹਾਲ ਹੋਣ ਕਰਕੇ ਲੋਕਾਂ ਨੂੰ ਕਾਫੀ ਦਿੱਕਤਾਂ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ। ਨਿੱਤ ਵਾਪਰਦੇ ਸੜਕ ਹਾਦਸਿਆਂ 'ਚ ਲੋਕ ਆਪਣੀਆਂ ਜਾਨਾਂ ਗੁਆ ਰਹੇ ਹਨ। ਸਰਕਾਰ ਨੂੰ ਸੜਕਾਂ ਵਾਲੇ ਪਾਸੇ ਹੋਰ ਸੁਹਿਰਦ ਹੋ ਕੇ ਧਿਆਨ ਦੇਣਾ ਹੋਵੇਗਾ ਤਾਂ ਜੋ ਮਨੁੱਖੀ ਜਾਨਾਂ ਨੂੰ ਬਚਾਇਆ ਜਾ ਸਕੇ ਅਤੇ ਪੰਜਾਬ ਦੀ ਦਿੱਖ ਨੂੰ ਹੋਰ ਸਵਾਰਿਆ ਜਾ ਸਕੇ।

-ਜੋਬਨ ਖਹਿਰਾ
ਪਿੰਡ ਖਹਿਰਾ, ਤਹਿਸੀਲ ਸਮਰਾਲਾ, ਲੁਧਿਆਣਾ।