02-12-2525

 ਜਾਤਾਂ ਦੇ ਨਾਂਅ 'ਤੇ ਹੋਕੇ ਬੰਦ ਕਰੋ

ਗੁਰੂਆਂ ਪੀਰਾਂ ਦੀ ਧਰਤੀ ਪੰਜਾਬ ਵਿਚ ਜਾਤ-ਪਾਤ ਦਾ ਬੋਲਬਾਲਾ ਅੱਜ ਵੀ ਵੱਡੇ ਪੱਧਰ 'ਤੇ ਵੇਖਿਆ ਜਾ ਸਕਦਾ ਹੈ। ਸਾਡੇ ਗੁਰੂ ਸਾਹਿਬਾਨ ਨੇ ਤਾਂ ਜਾਤ-ਪਾਤ ਨੂੰ ਖ਼ਤਮ ਕਰ ਦਿੱਤਾ ਸੀ। ਪਰੰਤੂ ਬਹੁਤ ਹੀ ਦੁਖ ਨਾਲ ਕਹਿਣਾ ਪੈ ਰਿਹਾ ਹੈ ਕਿ ਅੱਜ ਕੱਲ੍ਹ ਬਹੁਤੇ ਗੁਰੂ ਘਰਾਂ ਤੋਂ ਵਿਆਹਾਂ, ਭੋਗਾਂ ਦੇ ਹੋਕੇ ਬੰਦੇ ਦੀ ਜਾਤ ਨਾਲ ਜੋੜ ਕੇ ਹੀ ਬੋਲੇ ਜਾਂਦੇ ਹਨ। ਜਿਸ ਨਾਲ ਸਮਾਜਿਕ ਭੇਦਭਾਵ ਵਧਦਾ ਹੈ। ਲੋਕਾਂ ਦੀ ਭਾਈਚਾਰਕ ਸਾਂਝ ਹਮੇਸ਼ਾ ਬਣੀ ਰਹੇ ਤੇ ਸਭ ਲੋਕ ਇਨਸਾਨੀਅਤ ਤੌਰ 'ਤੇ ਸਭ ਨੂੰ ਬਰਾਬਰ ਹੀ ਸਮਝਣ। ਇਸ ਲਈ ਪੰਜਾਬ ਸਰਕਾਰ ਅਤੇ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਨੂੰ ਗੁਰੂ ਘਰਾਂ ਵਿਚੋਂ ਜਾਤਾਂ ਦੇ ਨਾਂਅ ਹੇਠ ਵੱਜਦੇ ਹੋਕਿਆਂ ਨੂੰ ਤੁਰੰਤ ਰੋਕਣਾ/ਬੰਦ ਕਰਨਾ ਚਾਹੀਦਾ ਹੈ।

-ਅੰਗਰੇਜ ਸਿੰਘ ਵਿੱਕੀ
ਪਿੰਡ ਤੇ ਡਾਕ. ਕੋਟਗੁਰੂ (ਬਠਿੰਡਾ)

ਮਿਹਨਤ ਦੀ ਕਮਾਈ

ਮਨੁੱਖਾ ਜ਼ਿੰਦਗੀ ਵਿਚ ਤਰੱਕੀ ਵਾਸਤੇ ਮਿਹਨਤ ਨਾਲ ਕੀਤੀ ਕਮਾਈ ਆਪਣੀ ਹੀ ਅਹਿਮੀਅਤ ਰੱਖਦੀ ਹੈ। ਜਿਹੜੀ ਖ਼ੁਸ਼ੀ ਅਤੇ ਸੰਤੁਸ਼ਟੀ ਮਨੁੱਖੀ ਮਨ ਨੂੰ ਮਿਹਨਤ ਕਰ ਕੇ ਕੀਤੀ ਗਈ ਕਮਾਈ ਦਿੰਦੀ ਹੈ, ਉਹ ਸ਼ਾਇਦ ਹੋਰ ਕਿਸੇ ਢੰਗ ਨਾਲ ਕੀਤੀ ਕਮਾਈ ਨਹੀਂ ਦੇ ਸਕਦੀ ਅਤੇ ਕੋਈ ਵੀ ਕੰਮ ਅਗਰ ਇਮਾਨਦਾਰੀ, ਲਗਨ ਅਤੇ ਮਿਹਨਤ ਨਾਲ ਕੀਤਾ ਜਾਵੇ ਤਾਂ ਉਹ ਕੇਵਲ ਸਫਲਤਾ ਪੂਰਬਕ ਨੇਪਰੇ ਹੀ ਨਹੀਂ ਚੜ੍ਹਦਾ, ਸਗੋਂ ਮਨੁੱਖੀ ਮਨ ਨੂੰ ਸਕੂਨ ਵੀ ਪ੍ਰਦਾਨ ਕਰਦਾ ਹੈ। ਇਸ ਦੇ ਉਲਟ ਸਵਾਰਥ, ਇਮਾਨਦਾਰੀ, ਲਗਨ ਤੇ ਮਿਹਨਤ ਤੋਂ ਸੱਖਣਾ ਕੰਮ ਨਾ ਤਾਂ ਮਨੁੱਖ ਨੂੰ ਖ਼ੁਸ਼ੀ ਹੀ ਦੇ ਸਕਦਾ ਹੈ ਅਤੇ ਉਹ ਸਫਲਤਾ ਪੂਰਬਕ ਨੇਪਰੇ ਵੀ ਨਹੀਂ ਚੜ੍ਹ ਸਕਦਾ। ਸਿਆਣਿਆਂ ਦਾ ਕਥਨ ਹੈ ਕਿ 'ਮਿਹਨਤ ਹੀ ਸਫਲਾ ਦੀ ਕੂੰਜੀ ਹੈ ਅਤੇ ਮਿਹਨਤ ਦਾ ਫਲ ਤਾਂ ਪਰਮਾਤਮਾ ਵੀ ਨਹੀਂ ਰੱਖਦਾ।' ਪਰ ਸਮੇਂ ਦੇ ਮੌਜੂਦਾ ਦੌਰ ਵਿਚ ਮਨੁੱਖ ਲਗਨ, ਮਿਹਨਤ ਅਤੇ ਇਮਾਨਦਾਰੀ ਨਾਲ ਕਮਾਈ ਕਰਨ ਦੀ ਥਾਵੇਂ ਗ਼ਲਤ ਢੰਗ ਨਾਲ ਅਰਥਾਤ ਦੋ ਨੰਬਰ ਦੀ ਕਮਾਈ ਉੱਪਰ ਜ਼ਿਆਦਾ ਭਰੋਸਾ ਰੱਖਦਾ ਹੈ, ਅਜਿਹੀ ਕਮਾਈ ਮਨੁੱਖੀ ਮਨ ਨੂੰ ਸ਼ਾਂਤੀ/ਸਕੂਨ ਨਹੀਂ ਦੇ ਸਕਦੀ। ਦੋ ਨੰਬਰ ਦੀ ਕੀਤੀ ਕਮਾਈ ਤਾਂ ਕਈ ਵਾਰ ਹੱਕ-ਹਲਾਲ ਦੀ ਕਮਾਈ ਨੂੰ ਨਾਲ ਲੈ ਜਾਂਦੀ ਹੈ ਤਦ ਮਨੁੱਖੀ ਮਨ ਦੁਖੀ ਅਤੇ ਪ੍ਰੇਸ਼ਾਨ ਹੋਏ ਬਿਨਾਂ ਨਹੀਂ ਰਹਿ ਸਕਦਾ ਅਤੇ ਮਨ ਅੰਦਰ ਪਛਤਾਵਾ ਵੀ ਹੁੰਦਾ ਹੈ। ਇਸ ਲਈ ਮਨੁੱਖ ਨੂੰ ਮਿਹਨਤ, ਲਗਨ ਅਤੇ ਇਮਾਨਦਾਰੀ ਨਾਲ ਹੱਕ-ਹਲਾਲ ਦੀ ਹੀ ਕਮਾਈ ਕਰਨੀ ਚਾਹੀਦੀ ਹੈ।

-ਜਗਤਾਰ ਸਿੰਘ ਝੋਜੜ,
ਜ਼ਿਲਾ ਕਚਹਿਰੀਆਂ, ਹੁਸ਼ਿਆਰਪੁਰ।

ਨਾ ਮੁਆਫ਼ੀ ਯੋਗ ਕਾਰਾ

ਅਜਿਹੇ ਗ਼ੈਰ-ਮਨੁੱਖੀ ਕਾਰੇ ਕਦੀ-ਕਦੀ ਪਹਿਲਾਂ ਵੀ ਦੇਖਣ-ਸੁਣਨ ਵਿਚ ਆਉਂਦੇ ਰਹੇ ਹਨ, ਪਰ ਕੀ ਕੋਈ ਇਸ ਢੰਗ ਨਾਲ ਵੀ ਧਨ ਇਕੱਠਾ ਕਰ ਸਕਦਾ ਹੈ? ਇਹ ਸੋਚ ਕੇ ਦੁਨੀਆ ਤੋਂ ਵਿਸ਼ਵਾਸ ਉੱਠਦਾ ਜਾ ਰਿਹਾ ਹੈ। ਪਿਛਲੇ ਦਿਨੀਂ ਇਕ ਖ਼ਬਰ ਪੜ੍ਹਨ ਨੂੰ ਮਿਲੀ ਜੋ ਸਮੁੱਚੇ ਡਾਕਟਰੀ ਪੇਸ਼ੇ ਨੂੰ ਬਦਨਾਮ ਕਰਨ ਵਾਲੀ ਹੈ। ਗੁਜਰਾਤ ਦੇ ਇਕ ਡਾਕਟਰ ਨੇ ਆਮ ਇਨਸਾਨ ਦਾ ਡਾਕਟਰਾਂ ਤੋਂ ਵਿਸ਼ਵਾਸ ਹੀ ਉਠਾ ਦਿੱਤਾ ਹੈ। ਲੋਕ ਹਸਪਤਾਲ ਆਪਣੀ ਬਿਮਾਰੀ ਦਾ ਇਲਾਜ ਕਰਾਉਣ ਲਈ ਜਾਂਦੇ ਹਨ, ਪਰ ਇਹ ਡਾਕਟਰ ਸਾਹਿਬ ਨੇ ਚੰਗੇ ਭਲੇ ਚੈੱਕਅਪ ਲਈ ਆਏ ਮਰੀਜ਼ਾਂ ਨੂੰ ਜ਼ਿੰਦਗੀ ਭਰ ਲਈ ਦਵਾਈਆਂ ਦੇ ਵੱਸ ਪਾ ਦਿੱਤਾ ਹੈ। ਉਹ ਵੀ 1-2 ਮਰੀਜ਼ਾਂ ਦੇ ਨਹੀਂ ਪੂਰੇ 105 ਮਰੀਜ਼ਾਂ ਦੇ। ਅਸਲ ਵਿਚ ਮਰੀਜ਼ਾਂ ਦੇ ਆਯੁਸ਼ਮਾਨ ਕਾਰਡ ਸਕੀਮ ਅਧੀਨ ਇਲਾਜ ਦੀ ਕਰੋੜਾਂ ਦੀ ਰਕਮ ਇਹ ਤੇ ਇਸ ਦੇ ਹੋਰ ਸਾਥੀ ਹਜ਼ਮ ਕਰਦੇ ਰਹੇ। ਜਦੋਂ 6 ਕਰੋੜ ਦੇ ਬਿੱਲ ਇਸ ਸਕੀਮ ਅਧੀਨ ਸਰਕਾਰ ਨੂੰ ਜਮ੍ਹਾ ਕਰਵਾਏ ਗਏ ਤਾਂ ਮਾਮਲਾ ਸਾਹਮਣੇ ਆਇਆ। ਸਿਹਤ ਵਿਭਾਗ ਨੇ ਸ਼ੱਕ ਹੋਣ 'ਤੇ ਡਾਟਾ ਚੈੱਕ ਕੀਤਾ। ਇਹ ਸ਼ਖ਼ਸ ਸ਼ਹਿਰ ਦੇ ਹੋਰ ਡਾਕਟਰਾਂ ਨੂੰ ਮਰੀਜ਼ ਰੈਫਰ ਕਰਨ ਦਾ 20 ਫ਼ੀਸਦੀ ਕਮਿਸ਼ਨ ਲੈਂਦਾ ਸੀ। ਅਸੀਂ ਡਾਕਟਰ ਨੂੰ ਰੱਬ ਦਾ ਦੂਜਾ ਰੂਪ ਮੰਨਦੇ ਹਾਂ, ਉਹ ਹੈ ਵੀ ਪਰ ਕੁਝ ਕੁ ਇਸ ਤਰ੍ਹਾਂ ਦੇ ਵੀ ਹੁੰਦੇ ਹਨ ਜੋ ਅਜਿਹੇ ਨੀਚ ਤਰੀਕੇ ਨਾਲ ਪੈਸਾ ਇਕੱਠਾ ਕਰਦੇ ਹਨ। ਮਨੁੱਖੀ ਜ਼ਿੰਦਗੀ ਨਾਲ ਖੇਡਣ ਵਰਗੇ ਅਜਿਹੇ ਇਹ ਕਾਰੇ ਛੁਪੇ ਨਹੀਂ ਰਹਿੰਦੇ। ਦੇਰ ਸਵੇਰ ਅਜਿਹੇ ਕੰਮਾਂ ਦਾ ਪਰਦਾਫ਼ਾਸ਼ ਹੋ ਹੀ ਜਾਂਦਾ ਹੈ। ਕਾਨੂੰਨ ਨੂੰ ਚਾਹੀਦਾ ਹੈ ਕਿ ਅਜਿਹੇ ਸ਼ਖ਼ਸਾਂ ਨੂੰ ਕਿਸੇ ਵੀ ਕੀਮਤ 'ਤੇ ਬਖ਼ਸ਼ਿਆ ਨਾ ਜਾਵੇ ਸਗੋਂ ਮਿਸਾਲੀ ਸਜ਼ਾਵਾਂ ਦਿੱਤੀਆਂ ਜਾਣ ਤਾਂ ਕਿ ਅੱਗੇ ਤੋਂ ਕੋਈ ਅਜਿਹਾ ਕਰਨ ਤੋਂ ਪਹਿਲਾਂ ਹਜ਼ਾਰ ਵਾਰ ਸੋਚੇ।

-ਲਾਭ ਸਿੰਘ ਸ਼ੇਰਗਿੱਲ,
ਬਡਰੁੱਕਾਂ (ਸੰਗਰੂਰ)

ਬੱਚਿਆਂ ਦੀਆਂ ਟਿਊਸ਼ਨਾਂ

ਅੱਜ ਕੱਲ ਮਾਂ-ਬਾਪ ਵਿਚ ਬੱਚਿਆਂ ਦੀਆਂ ਟਿਊਸ਼ਨਾਂ ਰੱਖਣ ਦਾ ਰਿਵਾਜ਼ ਬਹੁਤ ਤੇਜ਼ੀ ਨਾਲ ਵਧ ਚੁੱਕਾ ਹੈ। ਖ਼ਾਸ, ਤੌਰ 'ਤੇ ਪ੍ਰਾਈਵੇਟ ਸਕੂਲਾਂ ਦੇ ਬੱਚੇ ਜਿਨ੍ਹਾਂ ਨੂੰ ਮਾਂ-ਬਾਪ ਦੁਆਰਾ ਪਹਿਲੀ ਕਲਾਸ ਤੋਂ ਹੀ ਟਿਊਸ਼ਨਾਂ 'ਤੇ ਲਗਾ ਦਿੱਤਾ ਜਾਂਦਾ ਹੈ। ਟਿਊਸ਼ਨਾਂ 'ਤੇ ਬੱਚਿਆਂ ਨੂੰ ਸਿਰਫ਼ ਸਕੂਲ ਦਾ ਕੰਮ ਕਰਵਾ ਕੇ ਹੀ ਭੇਜ ਦਿੱਤਾ ਜਾਂਦਾ ਹੈ। 5-6 ਸਾਲ ਦੇ ਬੱਚਿਆਂ ਲਈ ਇਹ ਹੱਸਣ ਖੇਡਣ ਦੀ ਉਮਰ ਹੁੰਦੀ ਹੈ, ਜਿਸ ਨੂੰ ਟਿਊਸ਼ਨਾਂ ਵਿਚ ਰੋਲ ਦਿੱਤਾ ਜਾਂਦਾ ਹੈ ਅਤੇ ਬੱਚੇ ਖੇਡਣ ਕੁੱਦਣ ਦੀ ਥਾਂ 'ਤੇ ਚਿੜਚਿੜੇ ਹੋ ਜਾਂਦੇ ਹਨ। ਬੱਚਿਆਂ ਦੇ ਵਧੀਆ ਭਵਿੱਖ ਲਈ ਉਨ੍ਹਾਂ ਦੀਆਂ ਮਾਵਾਂ ਨੂੰ ਹੀ ਅੱਗੇ ਵਧਣਾ ਪਵੇਗਾ ਤਾਂ ਜੋ ਉਨ੍ਹਾਂ ਨੂੰ ਘਰ ਸ਼ਾਮ ਵੇਲੇ ਪੜ੍ਹਾਇਆ ਜਾ ਸਕੇ ਅਤੇ ਉਨ੍ਹਾਂ ਨੂੰ ਖੇਡਣ ਦਾ ਵੀ ਸਮਾਂ ਮਿਲ ਜਾਵੇ ਨਹੀਂ ਤਾਂ ਬੱਚਿਆਂ ਦਾ ਭਵਿੱਖ ਉਲਝਿਆ ਹੀ ਰਹਿ ਜਾਵੇਗਾ।

-ਜਸਦੀਪ ਕੌਰ। ਦਸੌਂਧਾ ਸਿੰਘ ਵਾਲਾ