ਪ੍ਰਧਾਨ ਮੰਤਰੀ ਮੋਦੀ ਕਿਰਗਿਜ਼ਸਤਾਨ ਪਹੁੰਚੇ

ਬਿਸਕੇਕ, 30 ਅਗਸਤ (ਏਜੰਸੀ)-ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਐਤਵਾਰ ਨੂੰ ਕਿਰਗਿਜ਼ਸਤਾਨ ਪਹੁੰਚ ਗਏ ਹਨ, ਜਿਥੇ ਉਹ ਸ਼ੰਘਾਈ ਸਹਿਯੋਗ ਸੰਗਠਨ (ਐਸ.ਸੀ.ਓ.) ਸਿਖਰ ਸੰਮੇਲਨ ’ਚ ਹਿੱਸਾ ਲੈਣਗੇ ਅਤੇ ਨਾਲ ਹੀ ਕਈ ਦੁਵੱਲੀਆਂ ਬੈਠਕਾਂ ਵੀ ਕਰਨਗੇ। ਹਵਾਈ ਅੱਡੇ ’ਤੇ ਮੰਤਰੀ ਮੰਡਲ ਮੰਤਰਾਲੇ ਦੇ ਚੇਅਰਮੈਨ ਕਾਸਿਮਾਲੀਵ ਆਦਿਲਬੇਕ ਅਲੇਸ਼ੋਵਿਚ ਨੇ ਪ੍ਰਧਾਨ ਮੰਤਰੀ ਦਾ ਸਵਾਗਤ ਕੀਤਾ। ਪ੍ਰਧਾਨ ਮੰਤਰੀ ਦੇ ਸਵਾਗਤ ਲਈ ਹਵਾਈ ਅੱਡੇ ’ਤੇ ਰਸਮੀ ਕਿਰਗਿਜ਼ ਨਾਚ ਦਾ ਪ੍ਰਦਰਸ਼ਨ ਵੀ ਕੀਤਾ ਗਿਆ। ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਰਣਧੀਰ ਜਾਇਸਵਾਲ ਨੇ ‘ਐਕਸ’ ’ਤੇ ਪੋਸਟ ਕੀਤੀ ਕਿ ਸਿਖਰ ਸੰਮੇਲਨ ਖੇਤਰੀ ਤੇ ਵਿਸ਼ਵ ਮੁੱਦਿਆਂ ’ਤੇ ਗੱਲਬਾਤ ਤੇ ਸਹਿਯੋਗ ਨੂੰ ਅੱਗੇ ਵਧਾਉਣ ਲਈ ਦਸ ਮੈਂਬਰ ਦੇਸ਼ਾਂ, 15 ਭਾਈਵਾਲ ਦੇਸ਼ਾਂ ਤੇ ਦੋ ਆਬਜ਼ਰਵਰ ਦੇਸ਼ਾਂ ਨੂੰ ਇਕੱਠੇ ਲਿਆਉਂਦਾ ਹੈ। ਇਕ ਹੋਟਲ ’ਚ ਪਹੁੰਚਣ ’ਤੇ ‘ਵੰਦੇ ਮਾਤਰਮ’ ਦੇ ਨਾਅਰਿਆਂ ਨਾਲ ਮੋਦੀ ਦਾ ਸਵਾਗਤ ਕੀਤਾ ਗਿਆ। ਉਨ੍ਹਾਂ ‘ਮਾਂ ਤੁਝੇ ਸਲਾਮ’ ਦੀਆਂ ਦੇਸ਼ਭਗਤੀ ਪੂਰਨ ਧੁਨਾਂ ਨਾਲ ਸ਼ਾਨਦਾਰ ਯੋਗ ਪ੍ਰਦਰਸ਼ਨ ਵੀ ਵੇਖਿਆ। ਮੋਦੀ 31 ਅਗਸਤ-1 ਸਤੰਬਰ ਨੂੰ ਹੋਣ ਵਾਲੇ 26ਵੇਂ ਐਸ.ਸੀ.ਓ. ਸਿਖਰ ਸੰਮੇਲਨ ’ਚ ਹਿੱਸਾ ਲੈਣ ਲਈ ਰਾਸ਼ਟਰਪਤੀ ਸਾਦਿਰ ਝਾਪਾਰੋਵ ਦੇ ਸੱਦੇ ’ਚੇ ਕਿਰਗਿਜ਼ਸਤਾਨ ਦੀ ਯਾਤਰਾ ਕਰ ਰਹੇ ਹਨ। 10-ਮੈਂਬਰੀ ਐਸ.ਸੀ.ਓ. ਸੰਗਠਨ ਦੇ 25 ਸਾਲ ਪੂਰੇ ਹੋਣ ਦਾ ਜਸ਼ਨ ਮਨਾ ਰਿਹਾ ਹੈ।