ਮਹਿੰਗਾਈ ਵਿਚਾਲੇ ਅਕਤੂਬਰ ’ਚ ਜ਼ੋਰਦਾਰ ਖਰੀਦਦਾਰੀ

ਨਵੀਂ ਦਿੱਲੀ, 2 ਨਵੰਬਰ (ਏਜੰਸੀ)-ਦੇਸ਼ ’ਚ ਮਹਿੰਗਾਈ, ਉਚੀਆਂ ਵਿਆਜ਼ ਦਰਾਂ ਤੇ ਦੁਨੀਆ ’ਚ ਚੱਲ ਰਹੇ ਤਣਾਅ ਦੇ ਬਾਵਜੂਦ ਲੋਕਾਂ ਨੇ ਅਕਤੂਬਰ ’ਚ ਜ਼ੋਰਦਾਰ ਖਰੀਦਦਾਰੀ ਕੀਤੀ। ਤਿਉਹਾਰੀ ਸੀਜ਼ਨ ’ਚ ਬਾਜ਼ਾਰ ’ਚ ਰੌਣਕ ਰਹੀ। ਇਸ ਦਾ ਅਸਰ ਜੀ.ਐਸ.ਟੀ. ਵਸੂਲੀ, ਕਾਰਾਂ ਦੀ ਵਿਕਰੀ, ਡਿਜੀਟਲ ਅਦਾਇਗੀ ਤੇ ਬਿਜਲੀ ਦੀ ਖਪਤ ਦੇ ਅੰਕੜਿਆਂ ’ਚ ਵੀ ਦਿਸਿਆ। ਅਕਤੂਬਰ ’ਚ ਦੇਸ਼ ਦੀ ਜੀ.ਐਸ.ਟੀ. ਵਸੂਲੀ ਪਿਛਲੇ ਸਾਲ ਦੇ ਮੁਕਾਬਲੇ 22.9 ਫੀਸਦੀ ਵੱਧ ਕੇ 2.31 ਲੱਖ ਕਰੋੜ ਰੁਪਏ ਹੋ ਗਈ ਹੈ। ਪਿਛਲੇ ਸਾਲ ਇਸੇ ਮਹੀਨੇ ਇਹ ਕਰੀਬ 1.88 ਲੱਖ ਕਰੋੜ ਰੁਪਏ ਸੀ। ਅਕਤੂਬਰ ’ਚ ਦੇਸ਼ ’ਚ 5.25 ਤੋਂ 5.30 ਲੱਖ ਕਾਰਾਂ ਵਿਕੀਆਂ। ਇਹ ਇਕ ਮਹੀਨੇ ’ਚ ਹੁਣ ਤੱਕ ਦੀ ਸਭ ਤੋਂ ਵੱਧ ਵਿਕਰੀ ਹੈ। ਅਕਤੂਬਰ ’ਚ 2.24 ਲੱਖ ਰਿਕਾਰਡ ਇਲੈਕਟ੍ਰਿਕ ਦੋ-ਪਹੀਆ ਵਾਹਨ ਵਿਕੇ। ਵਾਹਨ ਪੋਰਟਲ ਮੁਤਾਬਿਕ ਇਹ ਹੁਣ ਤੱਕ ਦਾ ਸਭ ਤੋਂ ਵੱਡਾ ਮਹੀਨਾਵਾਰ ਅੰਕੜਾ ਹੈ।