ਪਾਕਿ ਦੇ ਨਾਰੋਵਾਲ ’ਚ ਮਦਰੱਸੇ ਦੇ ਵਿਸਥਾਰ ਲਈ ਢਾਹਿਆ ਇਕ ਸਦੀ ਪੁਰਾਣਾ ਹਿੰਦੂ ਮੰਦਿਰ

ਅੰਮ੍ਰਿਤਸਰ, 1 ਸਤੰਬਰ (ਸੁਰਿੰਦਰ ਕੋਛੜ)-ਲਹਿੰਦੇ ਪੰਜਾਬ ਦੇ ਜ਼ਿਲ੍ਹਾ ਸ਼ੇਖ਼ੂਪੁਰਾ ਦੇ ਫ਼ਾਰੂਕਾਬਾਦ ’ਚ ਸਥਿਤ ਗੁਰਦੁਆਰਾ ਸ੍ਰੀ ਗੁਰੂ ਸਿੰਘ ਸਭਾ ਤੇ ਸੂਬਾ ਬਲੋਚਿਸਤਾਨ ਦੀ ਰਾਜਧਾਨੀ ਕੋਇਟਾ ਦੇ ਗੁਰਦੁਆਰਾ ਸ੍ਰੀ ਗੁਰੂ ਸਿੰਘ ਸਭਾ ਨੂੰ ਸ਼ਾਪਿੰਗ ਪਲਾਜ਼ਾ ਬਣਾਏ ਜਾਣ ਹਿਤ ਢਾਹੇ ਜਾਣ ਤੋਂ ਬਾਅਦ ਹੁਣ ਲਹਿੰਦੇ ਪੰਜਾਬ ਦੇ ਨਾਰੋਵਾਲ ਜ਼ਿਲ੍ਹੇ ਦੇ ਪਿੰਡ ਸਿਰਾਜ ’ਚ 100 ਸਾਲ ਤੋਂ ਵੀ ਪੁਰਾਣੇ ਇਤਿਹਾਸਕ ਹਿੰਦੂ ਮੰਦਿਰ ਦੇ ਢਹਿ-ਢੇਰੀ ਹੋਣ ਨੂੰ ਲੈ ਕੇ ਵੱਡਾ ਵਿਵਾਦ ਖੜ੍ਹਾ ਹੋ ਗਿਆ ਹੈ। ਘੱਟ ਗਿਣਤੀਆਂ ਦੇ ਹੱਕਾਂ ਲਈ ਕੰਮ ਕਰਨ ਵਾਲੀ ਜਥੇਬੰਦੀ ਪਾਕਿਸਤਾਨ ਮਸੀਹਾ ਮਿੱਲਤ ਪਾਰਟੀ (ਪੀ. ਐੱਮ. ਐੱਮ. ਪੀ.) ਨੇ ਦੋਸ਼ ਲਗਾਇਆ ਹੈ ਕਿ ਨਾਲ ਲੱਗਦੇ ਇਕ ਮਦਰਸੇ ਦੇ ਵਿਸਥਾਰ ਲਈ ਮੰਦਿਰ ਨੂੰ ਜਾਣਬੁੱਝ ਕੇ ਢਾਹਿਆ ਗਿਆ ਹੈ। ਪੀ. ਐੱਮ. ਐੱਮ. ਪੀ. ਦੇ ਚੇਅਰਮੈਨ ਅਸਲਮ ਪਰਵੇਜ਼ ਸਹੋਤਰਾ ਨੇ ਦੋਸ਼ ਲਗਾਇਆ ਕਿ ਕੱਟੜਪੰਥੀ ਇਸਲਾਮਿਕ ਪਾਰਟੀ ਤਹਿਰੀਕ-ਏ-ਲੈਬਬੈਕ ਪਾਕਿਸਤਾਨ (ਟੀ. ਐੱਲ. ਪੀ.) ਦੇ ਕੁਝ ਲੋਕਾਂ ਨੇ ਮੰਦਿਰ ਨੂੰ ਢਾਹ ਦਿੱਤਾ ਤੇ ਇਸ ਦੀਆਂ ਇੱਟਾਂ, ਗੁੰਬਦ ਦੀਆਂ ਧਾਤੂ ਫਿਟਿੰਗਾਂ ਅਤੇ ਹੋਰ ਸਾਰਾ ਸਮਾਨ ਉੱਥੋਂ ਚੁੱਕ ਕੇ ਲੈ ਗਏ। ਸਹੋਤਰਾ ਨੇ ਪਿੰਡ ਸਿਰਾਜ ਦੇ ਸਥਾਨਕ ਲੋਕਾਂ ਸਮੇਤ ਲਹਿੰਦੇ ਪੰਜਾਬ ਦੇ ਵਧੀਕ ਗ੍ਰਹਿ ਸਕੱਤਰ ਨਾਲ ਮੁਲਾਕਾਤ ਕਰਕੇ ਲਿਖਤੀ ਦਰਖ਼ਾਸਤ ਸੌਂਪੀ ਹੈ। ਸਹੋਤਰਾ ਅਨੁਸਾਰ ਮੰਦਿਰ ਨਾਲ ਲੱਗਦੀ ਜ਼ਮੀਨ ਇਵੈਕੂਈ ਟਰੱਸਟ ਪ੍ਰਾਪਰਟੀ ਬੋਰਡ (ਈ. ਟੀ. ਪੀ. ਬੀ.) ਵਲੋਂ ਇਕ ਮਦਰਸੇ ਨੂੰ ਲੀਜ਼ ’ਤੇ ਦਿੱਤੀ ਗਈ ਸੀ । ਕਈ ਸਾਲਾਂ ਤੱਕ ਕਿਰਾਇਆ ਨਾ ਭਰਨ ਕਾਰਨ ਇਹ ਲੀਜ਼ ਰੱਦ ਕਰ ਦਿੱਤੀ ਗਈ ਸੀ । ਦੂਜੇ ਪਾਸੇ, ਬੋਰਡ ਦੇ ਅਧਿਕਾਰੀ ਇਫ਼ਤਿਖ਼ਾਰ ਰਾਣਾ ਨੇ ਮੰਦਿਰ ਨੂੰ ਢਾਹੁਣ ਦੇ ਦੋਸ਼ਾਂ ਨੂੰ ਸਿਰੇ ਤੋਂ ਖ਼ਾਰਜ ਕੀਤਾ।