ਗਰਮੀ ਪਿੰਡੇ ਦੰਦੀਆਂ ਵੱਢਣ ਲੱਗੀ ਸੀ | ਤਾਪਮਾਨ ਚਾਲੀ ਤੋਂ ਉੱਪਰ ਚੜ੍ਹਨ ਲੱਗਿਆ ਸੀ....! ਗਰਮੀ ਦੇ ਮੱਦੇਨਜ਼ਰ ਸਕੂਲ ਕੁਝ ਸਮਾਂ ਪਹਿਲਾਂ ਬੰਦ ਕਰ ਦਿੱਤੇ ਗਏ....!
ਸਵੇਰੇ ਬਾਦਾ ਅਖ਼ਬਾਰ 'ਚ ਚਾਰ ਰੋਟੀਆਂ ਲਪੇਟ ਝੋਲਾ ਸਾਈਕਲ ਦੇ ਹੈਂਡਲ ਨਾਲ ਬੰਨ੍ਹ ਤੁਰਨ ਲੱਗਿਆ ਤਾਂ ਅੱਗੋਂ ਛੇਵੀਂ ਕਲਾਸ ਚ ਪੜ੍ਹਦੀ ਨਿੱਕੀ ਨੇ ਕਿਹਾ , 'ਪਾਪਾ! ਤੁਸੀਂ ਵੀ ਗਰਮੀ 'ਚ ਛੁੱਟੀਆਂ ਕਰ ਲਓ, ਧੁੱਪ ਬਹੁਤ ਹੁੰਦੀ ਆ, ਨਾਲੇ ਪਾਪਾ! ਸਰਾਂ ਨੇ ਕਿਹਾ ਸੀ ਬਈ ਛੁੱਟੀਆਂ ਤੋਂ ਬਾਅਦ ਸਾਰੇ ਬੱਚੇ ਵਰਦੀ ਪਾ ਕੇ ਆਇਓ | ਸਕੂਲੀ ਵਰਦੀ ਪਿੱਛੋਂ ਹਾਲੇ ਆਈ ਨਹੀਂ | ਕਿਤਾਬਾਂ ਕਾਪੀਆਂ ਸਭ ਕੋਲ ਪੂਰੀਆਂ ਹੋਣੀਆਂ ਚਾਹੀਦੀਆਂ ਨੇ......! ਬਾਦੇ ਨੂੰ ਆਪਣੀ ਮਾਸੂਮ ਧੀ ਦਾ ਬੜਾ ਮੋਹ ਆਇਆ, ਜਿਸ ਨੂੰ ਆਪਣੇ ਬਾਪ ਦਾ ਧੁੱਪ 'ਚ ਤਪਣ ਦਾ ਫਿਕਰ ਸੀ ਪਰ ਦੂਜੇ ਪਾਸੇ ਵਰਦੀ ਤੇ ਸਕੂਲੀ ਸਟੇਸ਼ਨਰੀ ਅਤੇ ਘਰੇਲੂ ਜ਼ਿੰਮੇਵਾਰੀ ਨੇ ਉਹਨੂੰ ਮਨਮਾਨੀ ਨਾ ਕਰਨ ਦਿੱਤੀ.....!
ਕਿਹੜੀ ਧੁੱਪ ਤੇ ਕਿਹੜੀਆਂ ਛੁੱਟੀਆਂ ਮਨ ਹੀ ਮਨ ਸੋਚਦਾ ਉਹ ਟੁੱਟੀ ਕਬੀਲਦਾਰੀ ਨੂੰ ਗੰਢਣ ਲਈ ਸਾਈਕਲ ਵੀਹੀ 'ਚੋਂ ਕੱਢ 'ਤਪਦੇ ਸੂਰਜ' ਵੱਲ ਵੇਖਦਾ ਕੰਮ ਨੂੰ ਸਿੱਧਾ ਹੋ ਗਿਆ ਸੀ....!
-ਪਿੰਡ ਤੇ ਡਾਕ ਦੱਧਾਹੂਰ, ਤਹਿ. ਰਾਏਕੋਟ ਜ਼ਿਲ੍ਹਾ ਲੁਧਿਆਣਾ ਵੰਸ਼ਵੰਸ਼
ਮੋਬਾਈਲ : 98156-88236
